• වැඩිවන බඩු මිල ගැන සලකා වැඩ කරන ජනතාවගේ වැටුප් ඉහළ දැමීම මේ රජයේ ප්‍රතිපත්තියයි
• පෞද්ගලික අංශයේත් වැඩි කරන්න ඉල්ලීමක්
• විවිධ දේශපාලන කණ්ඩායම්වල ඉල්ලීම්වලට අනුව පඩි වැඩි කරන බවට කියන කතාවල කිසිදු පදනමක් නෑ

මෙවර අය-වැය මඟින් සියලුම රජයේ සේවකයන්ගේ වැටුප් වැඩි කරන බව ජනාධිපති රනිල් වික්‍රමසිංහ මහතා අමාත්‍ය මණ්ඩලය අමතා ඊයේ (30) පැවැසීය.

රජයේ සේවකයන්ගේ වැටුප් වැඩි වීමට සමගාමීව පෞද්ගලික අංශයේ වැටුප ද වැඩි කරන ලෙස ඉල්ලීමක් කරන බව ද ජනාධිපතිවරයා එහි දී වැඩිදුරටත් සඳහන් කළේය.

ජනාධිපති කාර්යාලයේ දී අමාත්‍ය මණ්ඩල හමුව ඊයේ පැවැත්වුණු අවස්ථාවේ දී ජනාධිපති රනිල් වික්‍රමසිංහ මහතා මේ බව කීය. ආණ්ඩුව රජයේ සේවකයන්ගේ වැටුප් වැඩි කරන බව දැනගෙන ජනතා විමුක්ති පෙරමුණ ඇතුළු ඇතැම් කණ්ඩායම් එය ඔවුන්ගේ බලපෑම අනුව සිදු වූ බවට පැවසීමට උත්සාහ දරන බව කීම කිසිදු පදනමක් නැති කතාවක් යැයිද ජනාධිපති රනිල් වික්‍රමසිංහ මහතා පැවැසීය.

දිනෙන් දිනම බඩු මිල වැඩි වීම මිස අඩු නොවන තත්ත්වය යටතේ වැඩ කරන ජනතාවගේ වැටුප් ඉහළ දැමීමට අදහස් කළ බව ද රනිල් වික්‍රමසිංහ මහතා තවදුරටත් කීය.

ජනාධිපති රනිල් වික්‍රමසිංහ මහතාගේ තුන්වැනි අය-වැය යෝජනාවලිය නොවැම්බර් 13 වැනිදා පාර්ලිමේන්තුවට ඉදිරිපත් කිරීමට නියමිතය.

මෙවර අය-වැය යෝජනාවලිය මගින් වැටුප් වැඩි කිරීමක් කරන බවට ප්‍රථමවරට නිල වශයෙන් ප්‍රකාශයට පත් කරනු ලැබුයේ ඊයේ පැවැති කැබිනට් මණ්ඩල රැස්වීමේදීය. වැටුප් වැඩිවන ප්‍රමාණය එහි දී ප්‍රකාශ නොවිණි.

දැන් ලෝක බලවතා ලෙස ඉදිරියට පැමිණ ඇත්තේ චීනයයි.

සංචාරකයන්ගේ පැමිණීම අඩු වීම අපේ ආර්ථිකයට හානිකරයි.

‘මැදපෙරදිග අර්බුදය’ යනුවෙන් ප්‍රකට ඊශ්‍රායල් – පලස්තීන ගැටුමේ වර්තමානය ඊට බලපෑ පසුබිම ඔස්සේ දකිමින් සහ උද්ගතව ඇති තත්ත්වය සෙසු ලෝකයටත් විශේෂයෙන් අප වැනි රටවලටත් බලපාන ආකාරය පිළිබඳ ප්‍රවීණ විදෙස් විත්ති විචාරක ජ්‍යෙෂ්ඨ මාධ්‍යවේදී මොහාන් සමරනායක මහතා සමඟ කළ සංවාදයකි මේ.

• මැදපෙරදිග අර්බුදයේ වර්තමාන ස්වභාවය හඳුනාගැනීම සඳහා ඊට හේතු වූ පසුබිම සැකෙවින් පැහැදිලි කළ හැකිද?

මැදපෙරදිග අර්බුදය වශයෙන් හඳුන්වන ඊශ්‍රායල් – පලස්තීන යුද ගැටුමේ වර්තමාන ස්වභාවය ගැන අපට කතා කරන්න වෙන්නෙ වත්මන් ලෝක රටාව තුළ දැකිය හැකි බෙදීමත් සමඟමයි. අධිපතිවාදී රටවල් මේ ගැටුමේදී සිටි‍න්නෙ ඊශ්‍රායලය සමඟ‍යි. අමෙරිකාවේ වඩා ප්‍රගතිශීලි නායකයෙක් ලෙස ප්‍රතිරූපයක් ඇති බර්නි සැන්ඩර්ස් පවා හමාස් ප්‍රහාරය හෙළා දකින තරම්ම ප්‍රබලව ඊශ්‍රායලයේ ප්‍රහාර ගැන කතා කරන්නේ නෑ. අපේ රටෙත් තිස් අවුරුද්දක් තිස්සේ පැවැති බෙදුම්වාදී යුද්ධයේදී LTTE මරාගෙන මැරෙන ප්‍රහාරවලින් නිරායුධ සිවිල් වැසියන් 50 – 60 ඇතැම් විට සිය ගණනින් මිය යද්දී අද හමාස් ත්‍රස්තවාදී ප්‍රහාරවලට විරෝධය පළ කරන අමෙරිකාව සහ බටහිර රටවල් LTTEය සුරතල් කළ බව අපට මතකයි. LTTE ත්‍රස්තවාදීන් විමුක්තිකාමීන් හැටියටයි හැඳින්වූවේ. හමුදාව සිදු කළ ප්‍රහාර ඉහළින්ම හෙළා දකින ගමන් ත්‍රස්තවාදීන් සිවිල් වැසියන් ඉලක්ක කර සැලසුම් සහගතව සිදුකළ ප්‍රහාර ගැන ඔවුන් නිහඬ වුණා. කතා කළා නම්, ඒ බොහෝ පහත් හඬකින්. මේ දෙබිඩි පිළිවෙත, බෙදීම ඒ නිසා අපට පැහැදිලියි.

මේ අර්බුදයේ වර්තමානය දකිමින් මේ ගැන අදහස් දක්වන අපේ රටෙත් බොහෝ අය, මෙය සිදුවුණේ ඔක්තෝබර් 07 වැනිදා සිදු වූ හමාස් ප්‍රහාරයත් සමඟ වැනි දෘෂ්ටියක සිටින බව පෙනෙනවා. ඒ කියන්නෙ ඊශ්‍රායලය නිවැරදි කියන්න වගේ හමාස් සංවිධානය රොකට් 5000ක් විතර ඊශ්‍රායලයට එල්ල කරලා, ආරක්ෂක වැට කපාගෙන රටට ඇතුළු වෙලා කුරිරු ලෙස මිනිසුන් මරා දැම්මා. සිය ගණනක් ප්‍රාණ ඇපයට ගත්තා. එසේ කිරීමෙන් වුණේ, මේ ප්‍රශ්නයට විසඳුමක් ලැබීම නොවෙයි. එය තවත් අවුලට පත්වීමයි. මේ අන්දමින් ඔක්තෝබර් 07 වැනිදා ප්‍රකාශයට පත්වුණේ අවුරුදු 75කට වැඩි කාලයක් තිස්සේ නොවිසඳී ඇති ඉතා බරපතළ මානුෂීය ඛේදවාචකයක්.

• මේ ප්‍රශ්නය තරමක් යටපත් වී තිබී හමාස් ප්‍රහාරයත් සමඟ යළි ඉහළට එසැවුණා කියන්න පුළුවන්ද?

21 වැනි සියවස ආරම්භය දක්වාම ලෝකය මේ ප්‍රශ්නය ගැන ඉහළින් කතා කළා. අවධානයෙන් සිටියා. ඒත්, එයින් පසුව එය යට ගියා. ඇත්තටම සිදු වුණේ එය යටපත්වීම නොවෙයි, යටපත් කිරීම. එ.ජාතීන්ගේ න්‍යාය පත්‍රයේ පවා එවක්පටන් ඊට ලැබුණෙ පහළ ස්ථානයක්. අමෙරිකාවට සහ බටහිර බලවතුන්ට එසේ කළ හැකි වුණේ ඒ වන විට සමාජවාදී කඳවුර, නොබැඳි රටවල් දුර්වල වී සිටි නිසා. පළමු ලෝක සංග්‍රාමය වන විට පලස්තීනය ඔටෝමන් අධිරාජ්‍ය යටතේ තිබුණෙ. ආතර් බැල්ෆර් සාමිවරයා 1917.11.02 දාතමින් යුද නායකයෙක් වූ රොක්සඩයිල්ඩ්

වෙත ලිපියක් ලිව්වා. මේක වචන 67ක ලිපියක්. ඔහු ඉන් දැනුම්දුන්නේ පලස්තීනයේ යුදෙව්වන් වෙනුවෙන් “ඔවුන්ගේම දේශයක්” (National Home) තනා දෙන බවයි. බ්‍රිතාන්‍ය තමන්ට අයිති නැති රටක අන්‍ය ජාතියක් වෙනුවෙන් එහෙම දේශයක් නිර්මාණය කරන්නේ කොහොමද කියන ප්‍රශ්නය මතු වුණේ නෑ. පළමු ලෝක සංග්‍රාමයට පසුව බිහි වූ ජාතීන්ගේ සංගමයෙන් (League of Nations) බ්‍රිතාන්‍ය පලස්තීන පාලනය කරන්න අවසර පත්‍රයක් (Mandate) ඉල්ලා සිටියා. අද මේ ප්‍රශ්නය ගැන කතා කරන අය කියනවා බ්‍රිතාන්‍ය පලස්තීනය පාලනය කළේ මේ බලපත්‍රය යටතේ කියලා. ඒත්, ඔවුන් එය ලබා ගත්තෙ ලොව සියලු රටවල් එක්වී බිහි කර ගත් සංවිධානයකින් නොවේ. තමන්ගේ වැරැදි සුජාතභාවයට පත් කිරීම සඳහා නිර්මාණය කරගත් ජාතීන්ගේ සංගමයෙන් (League of Nations) මේ කාලයේදී යුරෝපය හා තවත් රටවල සිටින යුදෙව්වො විශාල වශයෙන් පලස්තීනයට පැමිණියා. හිට්ලර් විසින් සිදු කළ මහා පරිමාණ යුදෙව් ඝාතන වගේම යුදෙව් විරෝධයත් ඊට පිටුබලයක් වුණා. සයොන්වාදයේ ප්‍රධාන චරිතයක් වන ‘පියදෝර් හර්ස්වෙල්ට්’ 1987 දී ‘යුදෙව් රාජ්‍ය’ කියලා පොතක් ලිව්වා. යුදෙව් සංක්‍රමණය සිදු වූ ආකාරය එයිනුත් පැහැදිලියි. 1920 ගණන්වල මුලදී 10%ක් වූ පලස්තීනයේ යුදෙව් ජනගහනය දෙවන ලෝක සංග්‍රාම අවදිය නිමා වන විට 25%ක් පමණ වී තිබුණා. මේ පිළිබඳ සොයා බලමින් 1936දී බ්‍රිතාන්‍ය‍ෙය් ‘p’ කොමිෂම නිර්දේශ කළේ පලස්තීනයට සිදු වන යුදෙව් සංක්‍රමණ සීමා කළ යුතු බව. ඒත්, මේ තීරණයට එරෙහිව යුදෙව්වන් කෝලාහල ඇති කළා. ඔවුන් මේ වන විට මාන බලමින් සිටියේ අලුත් රාජ්‍යයක් තැනීමටයි.

1947දී මේ ප්‍රශ්නය එක්සත් ජාතීන්ගේ සංවිධානයට යොමුකළ විට 1.8, 1 –(181) යෝජනා සම්මුතිය මඟින් පලස්තීනය බෙදා වෙන්කර ඊශ්‍රායලය හා පලස්තීනය යනුවෙන් රාජ්‍ය 2ක් බිහිකිරීමේ විසඳුම ලබා දුන්නා. එහෙත් මෙහිදී සිදු වූයේ පලස්තීනය ඉතා අසාධාරණ ලෙස බෙදීයාම එහිදී 35%ක් වූ යුදෙව්වන්ට භූමියෙන් 56%ක් හිමි වූ අතර, පලස්තීන, අරාබි ආදී සෙසු සියලු දෙනාට හිමිවූයේ 42%ක් පමණයි. 3%ක් ජෙරුසෙලමට ලබා දෙමින් එය අන්තර්ජාතික අධීක්ෂණය යටතේ තැබුවා. බ්‍රිතාන්‍ය පලස්තීන පාලනය සඳහා වූ මැන්ඩේට් එක අත්හැරියේ මෙයින් පසුව තමයි. මේ තමයි අර්බුදයේ මුල. මැදපෙරදිග ගැටුම නිසා පලස්තීනුවන් 750,000ක් සරණාගතයන් ලෙස බටහිර ඉවුර, ගාසා තීරය මෙන්ම ලෙබනනය, සිරියාව වැනි රටවල ද කොටු වුණා. 1967 සුප්‍රකට “සයදින යුද්ධයේදි” ඊශ්‍රායලය අරාබි ප්‍රදේශ රැසක් යටත්කර ගත්තා. නැගෙනහිර ජෙරුසෙලම, සිනායි කතර, සිරියාවේ ගෝලාන් කඳුකරය වැනි තැන්. එක්සත් ජාතීන්ගේ ආරක්ෂක මණ්ඩලය අංක 242 යෝජනාව සම්මත කරමින් එලෙස අල්ලා ගත් ප්‍රදේශවලින් ඉවත්වන ලෙසට ඊශ්‍රායලයට දැනුම් දුන්නත් එය සිදු වූයේ නෑ. පළමු ඊශ්‍රායල් – අරාබි යුද්ධයෙන් ජය ගත් ඊශ්‍රායලය සිය ජනපද තවත් පුළුල් කිරීමයි කළේ. ඒ නීතිවිරෝධී ව්‍යාප්තිය තවමත් සිදු වෙනවා.

මෙවැනි පසුබිමක පලස්තීනයේ සටන්කාමී කණ්ඩායම් බිහිවුණා. “ෆාටා” ඉන් එකක්. මේ සියලු කණ්ඩායම් එක්කර ගනිමින් තමයි, යසර් අර්ෆත්ගේ නායකත්වයෙන් පලස්තීන විමුක්ති සංවිධානය (PLO) බිහි කළේ. මුලදී ඊශ්‍රායලය විනාශ කළ යුතුය යන ස්ථාවරයේ සිට කටයුතු කළත් පසුව ඔවුන් ඉන් ඉවත් වුණා. 1987දී ‘හමාස් සංවිධානය’ බිහි කළේම යුදෙව් රාජ්‍ය විනාශ කිරීමේ අරමුණින්.

කෑම්ප් ඩේවිඩ් සම්මුතියට එළඹුණේ 1978දී. 1993දී ඔස්ලෝහිදී බිල් ක්ලින්ටන් ජනාධිපතිවරයාගේ ප්‍රධානත්වයෙන් ඇති කර ගත් සම්මුතිය යටතේ “පලස්තීන ස්වයං පාලන අධිකාරිය” බිහිවීම සිදු වුණා. පලස්තීනය යනුවෙන් අප හඳුන්වන්නේ එම පාලනයයි. මේ වන විට පලස්තීනුවන් මිලියන 2.3ක් දිගින් කි.මී. 41ක් සහ පළලින් කි.මී. 10ක් සහිත ගාසා තීරයේ ජීවත්වනවා. එය ලොව දුප්පත්කම වැඩිම භූමි ප්‍රදේශයක්. විරැකියාව 75%ක් පමණ. මන්දපෝෂණය, දරිද්‍රතාවය ප්‍රබල ගැටලු ලෙස තිබෙනවා.

• නොබැඳි, මධ්‍යස්ථ විදේශ ප්‍රතිපත්තියක් අනුගමනය කරන රටක් හැටියට ශ්‍රී ලංකාව මුල පටන්ම පලස්තීනය වෙනුවෙන් පෙනී සිටියා. මේ ස්ථාවරය ඔබ පැහැදිලි කරන්නේ කෙසේද?

පලස්තීනුවන්ට ද තමන්ගේම රාජ්‍යයක් තිබිය යුතුය යන්න සිරිමා බණ්ඩාරනායක අගමැතිනියගේ පාලන සමයේ පටන්ම ශ්‍රී ලංකාවේ ස්ථාවරය වුණා. මේ වන විට උද්ගතව ඇති තත්ත්වය දෙස බැලුවත් එය තමයි කල්පවත්නා විසඳුම. කෙසේ නමුත්, ඊශ්‍රායලයේ ස්ථාවරය වෙලා තියෙන්නේ අන්තිම හමාස් ත්‍රස්තවාදියත් මැරුම් කෑ යුතු බවයි. අගමැති බෙන්ජමින් නෙතන්යාහු කියා සිටියා සෑම හමාස් සාමාජිකයෙක්ම මිය යා යුතුයි කියලා. 1967 සය දින යුද්ධයේ දී වගේම අදත් අමෙරිකාව ඊශ්‍රායලයට උදවු කරනවා. පසුගියදා සිදු වූ හමාස් ප්‍රහාරයත් සමඟ ජනාධිපති බයිඩන් කියා සිටියේ අ‍ෙමරිකාව පර්වතයක් මෙන් නොසැලී සිටින බවයි. අපි මේ ප්‍රශ්නේ දිහා බලන්න ඕන පලස්තීන මිනිස්සුන්ගෙ සපත්තුවට බැහැලා කියලා හිටපු අ‍ෙමරිකානු ජනාධිපති බැරැක් ඔබාමා කියා තිබුණා. ලිබියාව විනාශ කළේ ඔබාමා පාලනය යටතේයි. ඒත්, ඔහු බයිඩන්ට වඩා වෙනස් කෝණයකින් මේ දෙස බලන බවක් තමයි පෙනෙන්නේ.

• ශිෂ්ට සම්පන්න ලෝකයට හමාස් ප්‍රහාරය අනුමත කළ නොහැකියි, වගේම ඊශ්‍රායලයේ ප්‍රතිචාර හමුවේ දෑස වසා සිටිය නොහැකියි. කෙසේ වුවත් අධිපතිවාදී රටවල් මෙයින් එක් පාර්ශ්වයක ප්‍රහාර අනුමත කරන බවක් පෙනෙනවා නේද?

සටනක දී දෙපාර්ශ්වයේ සටන්කරුවන් මිය යාමට වඩා මේ තත්ත්වය වෙනස්. හමාස් ප්‍රහාරය ශිෂ්ට සම්පන්න ලෝකය විසින් හෙළා දකිනවා. සංගීත සාදයකට සහභාගි වී සිටි තරුණ තරුණියන් මෙන්ම කුඩා දරුවන් පවා ඔවුන් මරා දැම්මා. මේ ප්‍රහාරයේ ම්ලේච්ඡත්වය, අශිෂ්ටත්වය ඒකක 10ක් නම්, ඊශ්‍රායල් ප්‍රතිචාරයේ කුරිරු බව ඒකක 1000ක් තරම්.

ඔක්තෝබර් 13 වැනිදා උතුරු ගාසා තීරයේ ලක්ෂ 11ක් පමණ පලස්තීනුවන්ට පැය විසි හතරක් තුළ දකුණ බලා යන ලෙසට ඊශ්‍රායලය දැනුම් දුන්නා. එසේ පිටව යන අයටත් ගුවනින් සහ බිමෙන් පහර දුන්නා.

• ශ්‍රී ලංකා රජය LTTE යට එරෙහිව සටන් කරද්දී LTTE මෙන් නොව රජය සංයමයෙන් ක්‍රියා කළ යුතු යැයි එදා කී අය අද ඊශ්‍රායල් රජය ද එසේ සංයමයෙන් ක්‍රියා කළ යුතු යැයි නොකියන්නේ ඇයි?

2009 දී මානුෂීය මෙහෙයුමේ අවසන් හරියේ දී ශ්‍රී ලංකාවට පැමිණි ඩේවිඩ් මිලිබෑන්ඩ් හා බර්නාඩ් කුෂ්නර් දෙපළ මහින්ද රාජපක්ෂ ජනාධිපතිවරයාට කිව්වෙ දෙමළ ජනයා මිය යන නිසා යුද්ධය නතර කළ යුතු බවයි. පලස්තීනයේ අහිංසක දරුවන්, කාන්තාවන් ඇතුළු සිවිල් වැසියන් මිය යන නිසා ප්‍රහාර නැවැත්විය යුතු යැයි අද ඔවුන් ඊශ්‍රායල් අගමැති නෙතන්යාහුට නොකියන්නෙ ඇයි? මේවායින් පෙනෙන්නේ අධිපතිවාදී රටවල දෙබිඩි පිළිවෙතයි. මේ ප්‍රශ්නයේ මූලය ඊශ්‍රායලය නමින් රාජ්‍යයක් බිහි වීම බව පැහැදිලියි. අද ඔවුන් ක්‍රියා කරමින් සිටින්නේ මූලය නොතකා හරිමින්. අ‍ෙමරිකාව මේ අර්බුදය ගැන කතා කරද්දී රුසියානු යුක්රේන ගැටුම ඈඳාගන්නේ ඇයි කියන එකත් මේ අනුව අපට තේරුම් ගන්න පුළුවන්.

• ශ්‍රී ලංකාව යුද්ධය අවසන් කර වසර දාහතරකට පසුව ජිනීවා මානව හිමිකම් කවුන්සිලයේ දී තවමත් අපට එරෙහිව චෝදනා නැ‍ඟෙනවා. ඇතැම් බටහිර නාළිකා අසත්‍ය ප්‍රචාර පවා කළා. නමුත් ඊශ්‍රායලය සම්බන්ධයෙන් ඔවුන් ඒ තීව්‍රතාවයෙන්ම හඬ නොනඟන්නේ ඇයි?

බටහිර මාධ්‍ය මේ ගැටුම වාර්තා කරන ස්වරූපය දෙස බැලුවාම එය ඉතා පැහැදිලියි. ඔවුන්ගේ ප්‍රවෘත්ති වාර්තාකරණයේ පලස්තීනයට පක්ෂ ප්‍රවෘත්ති 5% නම් ඊශ්‍රායලයට පක්ෂව එය 25%ක්. ලෝකයේ ව්‍යාපාරික මාධ්‍ය ඒකාධිකාරිය ප්‍රබලයි. සත්‍ය වාර්තා නොකරනවා පමණක් නෙවෙයි. අසත්‍ය ප්‍රචාර කිරීමත් ඔවුන්ගෙන් සිදු වෙනවා.

• මේ හේතුවෙන් සංචාරක කර්මාන්තයට හා අපේ අපනයනවලටත් යම් බලපෑමක් ඇති විය හැකිද?

මෙවැනි යුදමය වාතාවරණයක් යටතේ සංචාරකයන් සංචරණයට බියක් දැක්වීම ඊට හේතුවයි. සංචාරකයන් පැමිණීම අඩු වීමට එය බලපානවා. අපේ ආර්ථිකයට සංචාරක කර්මාන්තය විශාල ශක්තියක්. මේ වෙද්දී සංචාරක පැමිණීම් වැඩි වෙලා තියෙන්නේ. එසේ තිබියදී එහි විශාල අඩු වීමක් සිදු වුණොත් ඒකත් අපේ ආර්ථිකයට හානිකර අන්දමින් බලපානවා.

අපනයන වෙළෙඳපොළට ඇති විය හැකි බලපෑම ගැනත් අපි සිතිය යුතුයි. මේ රටවල් ආනයන සීමා කිරීමක් කළොත් හරි අපේ අපනයනවලට බාධා ඇති වුණොත් හරි ලැබෙන විනිමය අඩු වීම සිදු වෙනවා. ඒක අපේ ආර්ථිකයට බලපාන කාරණයක්. නිල වශයෙන් ප්‍රකාශ නොකළත් ඊශ්‍රායලයත් න්‍යෂ්ටික බලවතෙක්. යම් හෙයකින් ඔවුන් ඉරානය ඉලක්ක කළහොත් එය ලෝක සාමයට බලවත් තර්ජනයක් වනු ඇති.

• මේ තත්ත්වය යටතේ ශ්‍රී ලංකාව කුමක් කළ යුතු යැයි ඔබ අදහස් කරනවාද?

ශ්‍රී ලංකාව කුඩා රටක්. අපේ ආර්ථිකයත් බොහොම කුඩා එකක්. හැකිතාක් දුරට අපි අපේ සම්පත් උපයෝගී කරගනිමින් නැඟී සිටීම තමයි, කළ යුතු හොඳම දේ. නව ලිබරල් ආර්ථික මොඩලය යටතේ අර්බුදයට ගිය අපි දැන්වත් නිෂ්පාදන ආර්ථිකයකට යොමුවිය යුතුයි. සියල්ල රටින් ගෙන්වීම වෙනුවට ඒ ඒ ක්ෂේත්‍රවල තමන්ට හැකි අයුරින් කාර්යක්ෂම ලෙස නිෂ්පාදන ක්‍රියාවලියට දායක වීම විය යුතුයි.

ආදායම් බෙදී යාමේ විශාල පරතරයක් ඇති බවත් අප පිළිගත යුතු වෙනවා. එය ඉතා අසාධාරණ තත්ත්වයක්. ඇති – නැති පරතරය විශාලයි. එසේම දීර්ඝ කාලයක් තිස්සේ අප හුරු වී සිටින්නේ බටහිර පරිභෝජන රටාවටයි. බටහිර රටවල් එවැනි පරිභෝජන රටාවකට යොමු වුණේ සෙසු රටවල සම්පත් කොල්ලකෑමෙන්. රෝහල්වල බෙහෙත් හිඟයක් ගැනත් ඖෂධ මිල ඉහළ යාම ගැනත් කතා කරන අතර අපි V8 ගෙන්විය යුතු ද කියලා යථාර්ථවාදීව හිතන්න අවශ්‍යයි. බාහිර සාධක පාලනය කරන්න අපට පුළුවන්කමක් නෑ. ඒත්, මේ කියපු දේවල් ගැන නම් අපට කටයුතු කළ හැකියි.

මුහුදු මාර්ග ඔස්සේ ශ්‍රී ලංකාවට මත්ද්‍රව්‍ය රැගෙන ඒමේ සිදුවීම් නිරන්තරව වාර්තා වන බවත් මේ සම්බන්ධව විශේෂ අවධානයක් යොමුකර ත්‍රිවිධ හමුදාව හා පොලීසිය ඒකාබද්ධව වැටලීම් සිදු කිරීම වැදගත් බවත් මල්වතු අස්ගිරි මහනායක ස්වාමින්ද්‍රයන් වහන්සේ දෙනම පවසති.

ගුවන් හමුදාපති එයාර් මාර්ෂල් උදේනි රාජපක්ෂ මහතා ඊයේ (23) පෙරවරුවේ මල්වතු අස්ගිරි මහා විහාරවලට ගොස් මහානායක ස්වාමින්ද්‍රයන් වහන්සේ දෙනම බැහැදැක ආශිර්වාද ලබාගත් අවස්ථාවේ උන්වහන්සේලා මේ බව පැවසූහ.

මත්ද්‍රව්‍ය ජාවාරම්කරුවන් රට තුළට මත්ද්‍රව්‍ය ගෙන ඒමට බොහෝ විට භාවිත කරන්නේ මුහුදු මාර්ගය බවත් මේ නිසා එම මාර්ග අවහිර කිරීම අතිශයින් වැදගත් බවත් උන්වහන්සේලා ප්‍රකාශ කරති.

මෙහි දී අදහස් දැක්වූ එයාර් මාර්ෂල් උදේනි රාජපක්ෂ මහතා ගුවන් හමුදාව නිරන්තරව ගුවනේ සිට අවේක්ෂණ කටයුතු සිදු කරමින් නාවික හමුදාවට වැටලීම් සඳහා අවශ්‍යය තොරතුරු ලබා දෙන්නේ යැයි පැවසුවේය.

රජවරුන් මහා සංඝරත්නයට පූජා කළ ඉඩම්, ශාසනය, රටවැසියා හා උතුම් ශිෂ්ටාචාරය පෝෂණය කිරීමට දායක වූ බව අගමැති දිනේෂ් ගුණවර්ධන මහතා පැවැසීය.

මීරිගම මල්ලැහැවදී පැවති කල්එළිය, වෑබඩමුල්ල ශ්‍රී සුධර්මාරාමාධිපති, සද්ධම්ම කීර්ති, ජිනශාසන සෝභන සද්ධානන්ද, ශාසන සිරි වංශාලංකාර, විචිත්ත භාණක, ශාසන කීර්ති, ශ්‍රී සද්ධර්ම වාගීශ්වර, ශාස්ත්‍රපති, රාජකීය පණ්ඩිත, ත්‍රිපිටකාචාර්ය, රූපහා සෝරතාභිධාන නාහිමියන් වහන්සේ වෙත උඩරට අමරපුර මහා නිකායේ බස්නාහිර පළාතේ අනුනායක ධුරය පදවිය පිරිනැමීම පිළිබඳ ශ්‍රී සන්නස් පත්‍රය ප්‍රදානය කිරීමේ මහෝත්සවයට පෙරේදා (22) එක් වෙමින් අගමැතිවරයා මේ බව සඳහන් කළේය.
අගමැතිවරයා එහිදී වැඩිදුරටත් මෙසේ ද කියා සිටියේය.

සම්බුද්ධ ශාසනයේ පැවැත්ම සහ ආරක්ෂාව පිණිස උඩරට අමරපුර මහා නිකාය දායාද කොට ඇති අඛණ්ඩ ගංගාවක් මෙන් නොනවතින ශාසනික දායාදය මේ අවස්ථාවේදී සිහිපත් කරනවා. විදුරවි පරම්පරාව ලක් ඉතිහාසයේ සම්බුද්ධ ශාසනය පමණක් නොව සාහිත්‍යයට, භාෂාවට අමරණීය දායාදයක් ඉටුකළ පරම්පරාවක් බව සිහිපත් කළ යුතුයි. දුෂ්කර කාල පරිච්ඡේදයක් අධිෂ්ඨානයෙන් ගමන් කළ එම පරම්පරාවේ මහා සංඝ පීතෘවරුන් අප ඉතා ගෞරවයෙන් යළි සිහිපත් කරනවා.

උඩරට කියන්නේ අපේ රට පිටරැටියන් විසින් අල්ලාගෙන පොළොවට සමතලා කළ භූමියයි. අවුරුදු 200කට මෙහා අපට ඔප්පු තිබුණෙ නැහැ. ඔප්පු හැදුවේ සුදු පාලකයන් ඇවිල්ලා අපේ ගම් නියම් ගම් අල්ලගෙන. රජවරුන් මහා සංඝරත්නයට පූජා කළ පෙනෙන තෙක් මානයේ භූමි භාගයන් ශාසනය පෝෂණය කරන්නටත්, රටවැසියා පෝෂණය කරන්නටත් ඒ වගේම උතුම් ශිෂ්ටාචාරයක් බිහිකරන්නටත් දායාද වුණා.

අද දින අනුනායක ධුරය ලබා මේ ප්‍රධාන වගකීම භාර ගන්නා අපේ සෝරත හාමුදුරුවො ශාසනයේ පැවැත්මට සහ ආරක්ෂාවට විශාල සේවයක් ඉටු කර ඇත. මේ ගමන සුවිශේෂ බාධාවන් මැද නමුත් බොහොම කැපවීමෙන්, ගැඹුරු අවබෝධයකින් ජනතාව සමඟ කටයුතු කරන්නට පුළුවන් වීම මේ අවස්ථාවේ ගෞරවයෙන් සිහිපත් කරනවා.

ශ්‍රී ලංකා අමරපුර මහා නිකායේ වැඩබලන උත්තරීතර මහා නායක, මහෝපාධ්‍යාය, කරගොඩ උයන්ගොඩ මෛත්‍රී මූර්ති අභිධාන මහානායක මාහිමියන් වහන්සේ ඇතුළු මහා සංඝරත්නය, පාර්ලිමේන්තු මන්ත්‍රීවරුන් වන ගයන්ත කරුණාතිලක, හර්ෂණ රාජකරුණා, හිටපු කථානායක කරු ජයසූරිය, ගම්පහ දිස්ත්‍රික් ලේකම් සමන් දර්ශන පාඬිකෝරාළ මහත්වරුන් ඇතුළු ආරාධිතයන් සහ දායක දායිකාවන් රැසක් මේ අවස්ථාවට එක්ව සිටියහ.

• කැබිනට් නොවන රාජ්‍ය වැවිලි ව්‍යවසාය ප්‍රතිසංස්කරණ අමාත්‍ය ධුරයක්.

කැබිනට් අමාත්‍ය ධුර 03ක් සඳහා පත් කෙරුණු අමාත්‍යවරු අද (23) පෙරවරුවේ ජනාධිපති කාර්යාලයේ දී ජනාධිපති රනිල් වික්‍රමසිංහ මහතා ඉදිරියේ දිවුරුම් දුන්හ.

ඒ අනුව පරිසර අමාත්‍යවරයා ලෙස කෙහෙළිය රඹුක්වැල්ල මහතා ද, වැවිලි කර්මාන්ත අමාත්‍යවරයා ලෙස මහින්ද අමරවීර මහතා ද, සෞඛ්‍ය අමාත්‍යවරයා ලෙස වෛද්‍ය රමේෂ් පතිරණ මහතා ද පත් කර තිබේ.

මහින්ද අමරවීර මහතා වැවිලි කර්මාන්ත අමාත්‍ය ධුරයට පත් කර ඇත්තේ ඔහු හොඹවන කෘෂිකර්ම අමාත්‍ය ධුරයට අමතරවය.

එසේම වෛද්‍ය රමේෂ් පතිරණ මහතා හොඹවන කර්මාන්ත අමාත්‍ය ධුරයට අමතරව ඔහු සෞඛ්‍ය අමාත්‍ය ධුරයට පත් කර තිබේ.

දැනට මුදල් රාජ්‍ය අමාත්‍ය ධුරයේ කටයුතු කරන රංජිත් සියඹලාපිටිය මහතා රාජ්‍ය වැවිලි ව්‍යවසාය ප්‍රතිසංස්කරණ කැබිනට් නොවන අමාත්‍යවරයා ලෙස පත් කර ඇත.

චීනයේ මුල්ම බෞද්ධ සිද්ධස්ථානය ලෙස සැලකෙන හිනන් පළාතේ “සුදු තුරඟ” විහාරස්ථාන පරිශ්‍රයේ ශ්‍රී ලාංකේය පාරම්පරික ගෘහ නිර්මාණ ලක්ෂණ පිළිඹිඹු කෙරෙන විහාර මන්දිරයක් සහ ස්ථූපයක් ඉදිකිරීමේ කාර්ය කඩිනමින් ආරම්භ කරන බව ජනාධිපති රනිල් වික්‍රමසිංහ මහතා පැවසීය.
“සුදු තුරඟ” විහාරස්ථානයේ විහාරාධිපති යින් ලී හිමිපාණන් සහ ජනාධිපති රනිල් වික්‍රමසිංහ මහතා අතර බීජිං නුවරදී  (19) පැවති සාකච්ඡාවේදී මේ තීරණයට එළැඹිණ.
“සුදු තුරඟ” විහාර සංකීර්ණයේ ලාංකේය විහාර මන්දිරයේ ඉදිකිරීම් සංකල්පය රනිල් වික්‍රමසිංහ මහතා අගමැති ධුරය දරන සමයේ ක්‍රියාවට නැංවීම උදෙසා එවකට කථානායක කරු ජයසූරිය මහතා විසින් මුල්ගල් තැබීය.
නමුත් පසුකාලීනව එහි වැඩකටයුතු ක්‍රියාත්මක නොවූ අතර, එම කටයුතු යළි ආරම්භ කරන ලෙසත්, විහාර මන්දිර සැලසුම් අලුතින් සකස් කරන ලෙසත් ජනාධිපතිවරයා මෙහිදී උපදෙස් දුන්නේය. ෆාහියන් භික්ෂුව ලංකාවේ සිට චීනයට රැගෙන ආ බෞද්ධාගමික පාලි ග්‍රන්ථයන්හි පිටපත් මේ විහාර මන්දිරයේ තැන්පත් කිරීමට ශ්‍රී ලංකාවෙන් ලබාදීමට ක්‍රියා කරන බවද ජනාධිපතිවරයා වැඩිදුරටත් සඳහන් කළේය.

ශ්‍රී ලංකා රාමඤ්ඤ මහා නිකායේ 2024 වර්ෂයට නිකුත් කරන වාර්ෂික දින දර්ශනය නියෝජ්‍ය මහා ලේඛකාධිකාරී අකරැල්ලේ ඥානවංස නාහිමියන් විසින් මකුලෑවේ විමල ශ්‍රී ලංකා රාමඤ්ඤ මහා නිකායේ මහා නාහිමියන් වෙත භාර දීම පසුගියදා මීරිගම හල්පේ මුනින්දාරාමයේ දී සිදුකෙරිණි.
ශ්‍රී ලංකා රාමඤ්ඤ මහා නිකායේ විශේෂාධිකාරි මණ්ඩල රැස්වීමේදී මෙම නව දින දර්ශනය එළි දැක්වුණු අතර මේ අවස්ථාවට මහා ලේඛකාධිකාරී අත්තංගනේ සාසනරතන, නියෝජ්‍ය පරියත්ති සංවර්ධන ලේඛකාධිකාරී මාඋස්සාවේ අග්ගධම්ම යන නාහිමිවරු ඇතුළු පිරිසක් එක්ව සිටියහ .

චීනයේ පැවැත්වෙන ජාත්‍යන්තර සහයෝගීතාව සඳහා වන 03 වන “එක් තීරයක් – එක් මාවතක්” සමුළුව සඳහා සහභාගි වීමට ජනාධිපති රනිල් වික්‍රමසිංහ මහතා  (15) රාත්‍රියේ දිවයිනෙන් පිටත්ව යාමට නියමිතය.

මේ අනුව ජනාධිපතිවරයා ඔක්තෝබර් 16 වනදා සිට 20 වනදා දක්වා චීනයේ සිව් දින නිල සංචාරයකට එක් වනු ඇත.

ජනාධිපතිවරයා දිවයිනෙන් බැහැර එම කාලසීමාව තුළ එතුමා යටතේ පවතින අමාත්‍යාංශවල රාජ්‍ය අමාත්‍යවරුන්ට වැඩබලන අමාත්‍ය ධූරයන්හි වගකීම් පවරා තිබේ.

ඒ අනුව හෙට (16) සිට ක්‍රියාත්මක වන පරිදි රාජ්‍ය අමාත්‍ය ප්‍රමිත බණ්ඩාර තෙන්නකෝන් මහතා වැඩබලන ආරක්ෂක අමාත්‍යවරයා ලෙසත්, රාජ්‍ය අමාත්‍ය රංජිත් සියඹලාපිටිය මහතා වැඩබලන මුදල් අමාත්‍යවරයා ලෙසත්, රාජ්‍ය අමාත්‍ය කනක හේරත් මහතා වැඩබලන තාක්ෂණ හා ආයෝජන ප්‍රවර්ධන අමාත්‍යවරයා ලෙසත්, රාජ්‍ය අමාත්‍ය අනුප පස්කුවල් මහතා වැඩබලන කාන්තා, ළමා කටයුතු හා සමාජ සවිබල ගැන්වීම් අමාත්‍යවරයා ලෙසත්, වනජීවි හා වන සම්පත් සංරක්ෂණ අමාත්‍ය පවිත්‍රා වන්නිආරච්චි මහත්මිය වැඩබලන පරිසර අමාත්‍යවරිය ලෙසත් පත් කර ඇත.

කලා ක්ෂේත්‍රයේ උන්නතිය වෙනුවෙන් විශිෂ්ට සේවාවක් ඉටු කළ කලා ශිල්පීන් ඇගයීමට ලක් කෙරෙන කලාභූෂණ රාජ්‍ය සම්මාන උලෙළ 2022, ජනාධිපති රනිල් වික්‍රමසිංහ මහතාගේ ප්‍රධානත්වයෙන් ඊයේ (11) පෙරවරුවේ මහරගම තරුණ සේවා සභාවේ දී පැවැත්විණි.

බුද්ධශාසන, ආගමික හා සංස්කෘතික කටයුතු අමාත්‍යාංශය සහ සංස්කෘතික කටයුතු දෙපාර්තමේන්තුව සංවිධානය කරනු ලබන මෙම සම්මාන උලෙළ මෙවර පවත්වනු ලැබුවේ 38 වැනි වරටය.

කලාභූෂණ සම්මානය මෙරට කලාකරුවකු ලබන ඉහළම සම්මානය වන අතර දිවයින පුරා විසිරී සිටින පරිණත කලාකරුවන් 200 දෙනෙක් මෙවර කලාභූෂණ සම්මානයෙන් පිදුම් ලැබූහ.

ජනාධිපති රනිල් වික්‍රමසිංහ මහතා සංකේතාත්මකව සම්මාන පිළිගැන්වීමට එක් වූ අතර සම්මානලාභී කලාකරුවන් සඳහා කලාභූෂණ ගෞරව නාමය, උපහාර සම්මානය, සහතික පත්‍රය සමඟ රුපියල් පනස් දහසක මුදල් ත්‍යාගයක් ද පිරිනැමිණ. සංගීතය, නර්තන, චිත්‍ර, සාහිත්‍ය, නාට්‍ය, චිත්‍ර හා මූර්ති, අධ්‍යක්ෂණය හා රංගනය ආදී වෙනත් ක්ෂේත්‍ර ගණනාවක් සඳහා කලාභූෂණ සම්මාන මෙහිදී පිරිනැමිණ.

සංස්කෘතික කටයුතු අධ්‍යක්ෂ යසින්තා ගුණවර්ධන මහත්මිය මෙහිදී ජනාධිපති රනිල් වික්‍රමසිංහ මහතා වෙත සමරු තිළිණයක් ද පිළිගැන්වූවාය. කලාකරුවන් පිළිබඳ සමරු කලාපය ද මෙහිදී ජනාධිපතිවරයාට පිළිගන්වන ලදී.

සම්මාන උලෙළ ආරම්භ කිරීමට පෙර, අභාවප්‍රාප්ත කලා ශිල්පී ජැක්සන් ඇන්තනි මහතා ඇතුළු කලාකරුවන් වෙනුවෙන් විනාඩියක නිශ්ශබ්දතාවයක් පවත්වා උපහාර පුද කිරීම ද සිදු විය.

රඹුකන සිද්ධාර්ථ හිමි ප්‍රමුඛ සර්ව ආගමික පූජකවරුන් ද, බුද්ධශාසන, ආගමික හා සංස්කෘතික කටයුතු ඇමැති විදුර වික්‍රමනායක, රාජ්‍ය ඇමැති ශාන්ත බණඩාර, පාර්ලිමේන්තු මන්ත්‍රීවරුන් වන වජිර අබේවර්ධන, සී. බී. රත්නායක, මහාචාර්ය තිස්ස විතාරණ මහත්වරු ඇතුළු මැති ඇමැතිවරුන් ද, බුද්ධශාසන, ආගමික හා සංස්කෘතික කටයුතු අමාත්‍යාංශයේ ලේකම් සෝමරත්න විදානපතිරණ, මහාචාර්ය ජේ. බී. දිසානායක, මහ භාරකාර ගිහාන් පිලපිටිය යන මහත්ම මහත්මීන් සහ විද්වතුන්, කලාකරුවන් ඇතුළු සම්භාවනීය ආරාධිත පිරිසක් මෙම අවස්ථාවට එක්ව සිටියහ.

ටී. එන්. ඩී. එස්. වීරමුණි (නාමෙල් වීරමුණි), ආනන්ද වික්‍රමගේ, ටී. එම්. ජයරත්න, ඉන්ද්‍රානි පෙරේරා, පර්සි ජයමාන්න, මානෙල් වානගුරු, නිරංජලා සරෝජනී, රූපා ගෝමස්, සෝමසිරි ඉලේසිංහ, ඒ. එස්. වික්‍රමසිංහ, සුනිල් සරත් පෙරේරා, වී. සුබ්‍රමනියම්, වී. රාමචන්ද්‍රන්, හිනටිගල ප්‍රේමදාස, ශ්‍රියානි මහවත්ත කලාකරුවන් මෙහිදී ජනාධිපති රනිල් වික්‍රමසිංහ මහතා අතින් කලාභූෂණ රාජ්‍ය සම්මාන ලබා ගත්හ.

මෙහිදී අදහස් දක්වමින් සංස්කෘතික අධ්‍යක්ෂ යසින්නා ගුණවර්ධන මහත්මිය ප්‍රකාශ කළේ, 1984 වර්ෂයේ මෙම කටයුත්ත ආරම්භ කළ බවයි. කොවිඩ් වසංගතය හේතුවෙන් මෙම කලා භූෂණ සම්මාන උලෙළ පසුගිය කාලයේ පැවැත්වීමට නොහැකි වූ බව පැවසූ අධ්‍යක්ෂකවරිය 2022 වසරට අදාළව මෙවර මෙම සම්මාන උලෙළ පැවැත්වෙන බව ද සඳහන් කළාය.

කලාකරුවකුගේ සේවය මැනිය නොහැකි බව ද සඳහන් කළ සංස්කෘතික අධ්‍යක්ෂකවරිය ඔවුන් සතු දැනුම නව පරපුරට පැවරීම වැදගත් බව ද පැවසුවාය. සම්මානයට පාත්‍රවන කලාකරුවන් දශක ගණනාවක් පුරා ක්ෂේත්‍රයේ රැඳී සිටින්නේ දක්ෂයින් නිසා යයි ද ඇය සඳහන් කළාය. වයස අවුරුදු 60 ඉක්මවූ කලාකරුවන් සඳහා කලා භූෂණ සම්මානය ලබාදෙන බවද කී අධ්‍යක්ෂවරිය, මෙම සම්මාන උලෙළ යථාර්ථයක් බවට පත්කර ගැනීම සඳහා විදුර වික්‍රමනායක ඇමැතිවරයා, බුද්ධ ශාසන, ආගමික කටයුතු හා සංස්කෘතික අමාත්‍යාංශයේ ලේකම් සෝමරත්න විදානපතිරණ මහතා සහ හින්දු, මුස්ලිම්, ක්‍රිස්තියානි ආගමික කටයුතු දෙපාර්තමේන්තු ලබාදුන් සහාය අගය කරන බව ද සඳහන් කළාය.

ලොවින් එකෙක් එක් දෙයකට වෙයි සමත යන කියමන අභියෝගයට ලක් කළ අසහාය රංගධර ජැක්සන් ඇන්තනි මහතාගේ දේහය පිළිබඳ අවසන් කටයුතු රාගම ශුද්ධ වූ පේදුරු පාවුළු දේවස්ථානයේදී අද (12) සවස 3ට සිදු කෙරේ.

බොරැල්ල පෞද්ගලික මල් ශාලාවක තැන්පත් කර තිබූ දේහය කඩවත රාගම පාරේ අංක 90/A,58 නිවෙසට ඊයේ (11) පෙරවරුවේ රැගෙන ආ අතර අද දිනයේ අවසන් ගෞරවය සඳහා එහි තැන්පත් කර තිබේ.

ඔහුගේ දේහයට අවසන් ගෞරව දැක්වීම සඳහා ලක්ෂ සංඛ්‍යාත ජනකායක් පෙරේදා සහ ඊයේ දිනවල පැමිණි අතර කලාකරුවන්, දේශපාලනඥයන්, ආගමික නායකයන් ඇතුළු රසික රසිකාවියෝ ඒ අතර වෙති. මිය යන විට 65 වැනි වියෙහි පසු වූ ඒ මහතා අනුරාධපුර තලාව පාරේ මොරගොඩදී අනතුරකට ලක්ව අවුරුද්දකුත් මාස දෙකක කාලයක් (මාස 14ක්) කොළඹ ජාතික රෝහලේ ප්‍රතිකාර ලබමින් සිටියදී මෙසේ මිය ගියේය.

අනුරාධපුර තලාවේ මොරගොඩ ප්‍රදේශයේදී ඔහු සහ තවත් දෙදෙනකු ගමන් ගත් කැබ් රථය වන අලියකුගේ ගැටී 2022 වසරේ ජුලි 22 වැනිදා අනතුරට ලක්ව ප්‍රතිකාර සඳහා අනුරාධපුර රෝහලට ඇතුළත් කෙරිණි. වැඩිදුර ප්‍රතිකාර සඳහා ජැක්සන් ඇන්තනි මහතා ගුවනින් කොළඹ ජාතික රෝහලට ගෙන එනු ලැබූ අතර ඉන් අනතුරුව මාස 14ක කාලයක් එහි දැඩි සත්කාර ඒකකයේ ඒ මහතා ප්‍රතිකාර ලැබීය.

ජැක්සන් ඇන්තනී මහතා භාෂාව, සාහිත්‍යය, ඉතිහාසය, කලාව ආදි විෂයන් පිළිබඳ ගැඹුරු පරිචයක් මෙන්ම ශ්‍රී ලංකාවේ සිනමාව, වේදිකාව සහ රූපවාහිනිය දිග්විජය කළ රංගධරයෙකි. ඔහු රංගනයට අමතරව අධ්‍යක්ෂණය, නිෂ්පාදනය, තිර රචනය, ගායනය, නවකතා රචනය, තීරු ලිපි රචනය, ගීත රචනයට ද දක්ෂතා දැක්වීය. විචාරකයෙක්, ගවේෂකයෙක්, ඉතිහාසඥයෙක්, නිවේදකයෙක් ලෙස ඔහු ඉමහත් ප්‍රසිද්ධියට පත්ව සිටියේය. ශ්‍රී ලංකාවේ හොඳම නළුවාට හිමි සම්මානයට 16 වතාවක් උරුමකම් කියමින් ජැක්සන් කලා ලොව වාර්තාවක් පිහිටුවන්නට සමත් විය.

කුඩා කාලයේදී මල්සි යනුවෙන් මවුපියන් ඔහු හැඳින්වූ අතර හපුගොඩ කනිෂ්ඨ විද්‍යාලයෙන් සහ බණ්ඩාරවෙල ශාන්ත මරියා විද්‍යාලයෙන් මූලික අධ්‍යාපනය ලැබීය. ගණේමුල්ල ගලහිටියාව මධ්‍ය මහා විදුහලට ඇතුළත්ව උසස් අධ්‍යාපනය ලබා කොළඹ විශ්වවිද්‍යාලයට තේරී පත් විය. එහිදී ප්‍රථමයෙන් සිංහල භාෂාව සහ සාහිත්‍ය පිළිබඳ ගෞරව උපාධියක් ලබා ගත් ජැක්සන් ශ්‍රී ජයවර්ධනපුර විශ්වවිද්‍යාලයෙන් ජනමාධ්‍ය පිළිබඳ ශාස්ත්‍රපති උපාධිය ලබා ගත්තේය.

ජැක්සන් අන්තනී මහතා වාරුවෙන් යන මිනිසුන්, මානවයෝ, මෙතනින් මාරුවෙනු, මරාසාද්, මධුර ජවනිකා, ලෝම හංස, ධවල භීෂණ, ඇත්, මෝරා, තාරාවෝ ඉගිලෙති වැනි ජනප්‍රිය වේදිකා නාට්‍ය රැසකට රංගනයෙන් දායක වූවේය.

ගුරු ගෙදර, අයෝමා, ලොකු දුව, භවදුක, භව කර්ම, ගිනි අවි සහ ගිනි කෙළි, අස්වැසුම, අග්නිදාහය, සූරිය අරණ, මිල්ලෙ සොයා, රන්දිය දහර වැනි චිත්‍රපට ඔස්සේ තම භාවප්‍රතිභාව විදහා දැක්වූ ජැක්සන් පළිඟු මැණිකේ, ඇල්ල ළඟ වලව්ව, සුසීමා, වෙද හාමිනේ, කඩුල්ල, අකාල සන්ධ්‍යා, පිටගම්කාරයෝ වැනි රූපවාහිනි නිර්මාණ රැසකට ද දායක විය. නර්තන විෂයද ප්‍රගුණ කළ ජැක්සන් ඇන්තනී මහතා පසුකාලීනව ඇසළ කළුවර නාට්‍ය අධ්‍යක්ෂණය කරමින් අධ්‍යක්ෂණයට ද පිවිසි අතර ජුලියට්ගේ භූමිකාව, පාරාදීසය, අබා ඇඩ්‍රස් නෑ වැනි චිත්‍රපට ද අධ්‍යක්ෂණය කළේය. ඔහුගේ නිර්මාණ බොහොමයක් දේශීය මෙන්ම විදේශීය වශයෙන් සම්මානයට පාත්‍ර විය.

ඉන්දියානු සාගර කලාපීය වටද්දර රටවල සංගමයේ (IORA) අමාත්‍ය මණ්ඩල රැස්වීමට සහභාගී වීම සඳහා දිවයිනට පැමිණ සිටින ඉන්දීය විදේශ කටයුතු අමාත්‍ය ආචාර්ය එස්. ජයශංකර් මහතා සහ ජනාධිපති රනිල් වික්‍රමසිංහ මහතා අතර හමුව අද (11) පස්වරුවේ ජනාධිපති කාර්යාලයේදී සිදු විය.

ඉන්දු – ශ්‍රී ලංකා සබඳතා තවදුරටත් ශක්තිමත් කර ගැනීම පිළිබඳ මෙහිදි දීර්ඝ ලෙස සාකච්ඡා පැවැත්වුණු අතර දෙරට අතර සහයෝගීතාව ඉහළ නැංවෙන නව ද්විපාර්ශවික ගිවිසුම් තුනකට එළැඹීම ද සිදු කෙරිණි.

එසේම ඉන්දීය ණය ආධාර ක්‍රමය යටතේ මෙරට ක්‍රියාත්මක කරන ලද නිවාස ව්‍යාපෘතියේ තුන්වන අදියර මාර්ගගත ක්‍රමය ඔස්සේ විවෘත කිරීම ද මෙහිදී සිදු විය.

නිවාස දස දහසකින් යුත් මෙහි හතරවන අදියරේ එක් නිවාස ඒකකයක් සඳහා රුපියල් මිලියන 1.026ක මුදලක් වෙන් කර තිබුණද නිවාස ඒකකයක් සඳහා වන පිරිවැය ඉහළ යාම හේතුවෙන් එය රුපියල් මිලියන 2.8ක් දක්වා සංශෝධනය කිරීමට අදාළ ගිවිසුමට එළැඹීම සිදු විය.

ශ්‍රී ලංකාවේ ජන ජීවිත යළි නගා සිටුවීම වෙනුවෙන් ඉන්දීය රජයේ සහාය ඇතිව මෙරට ක්‍රියාත්මක කරනු ලබන විශේෂ ව්‍යාපෘති නවයක් කඩිනමින් අවසන් කිරීම සඳහා අතිරේක ප්‍රතිපාදන සැපයීමට ඉන්දීය රජය කටයුතු කර තිබෙන අතර ඊට අදාළ ගිවිසුමට ද මෙහිදී එළැඹිණි.

මේ යටතේ උතුරු පලාතේ පාසල් 27ක් නවීකරණය කිරීම, මන්නාරම සහ අනුරාධපුර නිවාස ව්‍යාපෘති, හැටන් තොණ්ඩමන් වෘත්තීය පුහුණු මධ්‍යස්ථානය සහ පුස්සැල්ලාව සරස්වතී මධ්‍ය විද්‍යලය වැඩිදියුණු කිරීම, පොළොන්නරුවේ බහු – වාර්ගික ත්‍රෛයි භාෂා පාසලක් ඉදිකිරීම, යාපනය ප්‍රදේශයේ වර්ෂා ජලය රැස් කිරීමේ ව්‍යාපෘති 2889 ක් ඉදිකිරීම, දඹුල්ල ප්‍රදේශයේ එලවලූ සහ පළතුරු කල් තබා ගැනීම සදහා මෙට්‍රේක් ටොන් 5000 ක ධාරිතාවයෙන් යුත් ශිතාගාර පහසුකම් ඉදිකිරීම, මඩකලපුව ශික්ෂණ රෝහල සඳහා නව ශල්‍ය වෛද්‍ය ඒකකයක් ඉදිකිරීම යන ව්‍යාපෘති කඩිනමින් නිම කිරීමට නියමිතය.

ශ්‍රී ලංකාවේ දේශීය කිරි කර්මාන්තය නඟා සිටුවීම සඳහා ඉන්දියාවේ ගුජරාට් සමුපකාර කිරි අලෙවි සම්මේලනය (අමුල් ව්‍යාපාරය) සහ ශ්‍රී ලංකාවේ කාගිල්ස් සමූහ ව්‍යාපාරය, ඉන්දීය ජාතික කිරි සංවර්ධන මණ්ඩලය සමග එක්ව ක්‍රියාත්මක කිරීමට නියමිත ඒකාබද්ධ ව්‍යාපෘතියට අදාළ ගිවිසුමට ද මෙහිදී එළැඹිණි.

ජනාධිපති රනිල් වික්‍රමසිංහ මහතාගේ ඉන්දීය නිල සංචාරයේ ප්‍රතිඵලයක් ලෙස ඇතිකරගත් මෙම ගිවිසුම මගින් මෙරට පශු සම්පත් ක්ෂේත්‍රය නවීකරණය සඳහා අරමුදල් සැපයේ. ඒ අනුව, පළමු වසර 5 තුළ කිරි නිෂ්පාදනය 53% කින් ඉහළ නංවමින් වසර 15ක් තුළ ශ්‍රි ලංකාව කිරිවලින් ස්වයංපෝෂිත කිරීම මෙම නව ව්‍යාපෘතියේ ප්‍රමුඛ අරමුණයි.

ඒ යටතේ සතුන් සඳහා අවශ්‍ය උසස් තත්ත්වයේ ඖෂධ, ආහාර සහ තාක්ෂණික සහයෝගය ඇතුලු පහසුකම් සපයමින් දේශිය කිරි ගොවීන් ලක්ෂ 2ක් සවිබල ගැන්වීම අපේක්ෂා කෙරේ.

ඊට අමතරව පශු සම්පත් ක්ෂේත්‍රය ඩිජිටල්කරණය , කිරි ආශ්‍රිත අතුරු නිෂ්පාදනවල ගුණාත්මක භාවය වැඩි කිරීම වෙනුවෙන් නව තාක්ෂණය සඳහා ආයෝජනය සහ කිරි ආශ්‍රිත නිෂ්පාදන පහසු මිලට ලබා ගැනීමට අවස්ථාව හිමිවීම ඇතුළු ප්‍රතිලාභ රැසක් උදා වේ.

එසේම ඉන්දු – ශ්‍රී ලංකා සබඳතාවලට වසර 75ක් සැපිරීම නිමිත්තෙන් විශේෂ සමරු ලාංඡනයක් එළිදැක්වීමද අද සිදු විය.

ශ්‍රී ලංකාවේ ඉන්දීය මහකොමසාරිස් ගෝපාල් බග්ලේ, ඉන්දීය විදේශ කටයුතු අමාත්‍යාංශයේ සන්ධාන ලේකම්වරුන් වන පුනීත් අග්‍රවාල්, ජේ. පී. සිං, ශ්‍රී ලංකාවේ ඉන්දීය නියෝජ්‍ය මහකොමසාරිස් ආචාර්ය සත්‍යන්ජල් පාන්ඩේ, ඉන්දීය විදේශ කටයුතු අමාත්‍යාංශයේ නියෝජ්‍ය ලේකම් රඝූ පුරි යන මහත්ම මහත්මීන් ඇතුළු පිරිසක් මෙම අවස්ථාවට එක්ව සිටී අතර ශ්‍රී ලංකාව නියෝජනය කරමින් විදේශ කටයුතු අමාත්‍ය ජනාධිපති නීතිඥ අලි සබ්‍රි, අමාත්‍ය ජීවන් තොණ්ඩමන්, රාජ්‍ය අමාත්‍ය තේනුක විදානගමගේ, පාර්ලිමේන්තු මන්ත්‍රී එම්. රාමේෂ්වරන්, ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක සහ ජනාධිපති කාර්ය මණ්ඩල ප්‍රධානි සාගල රත්නායක, ජනාධිපති ලේකම් සමන් ඒකනායක, ආර්ථික කටයුතු පිළිබඳ ජනාධිපති ජ්‍යෙෂ්ඨ උපදේශක ආචාර්ය ආර්.එච්.එස්. සමරතුංග, විදේශ කටයුතු අමාත්‍යාංශයේ ලේකම් අරුණි විජේවර්ධන, ජනාධිපති ජාත්‍යන්තර කටයුතු පිළිබඳ අධ්‍යක්ෂ දිනුක් කොළඹගේ යන මහත්ම මහත්මීන් ඇතුළු පිරිසක් මීට එක්ව සිටියහ.

සමාජ මාධ්‍ය වාරණය කිරීමක් බලාපොරොත්තු නොවන බවද මේ තුළින් අසත්‍ය අපහාසාත්මක, උපහාසාත්මක ආගමික, වාර්ගික වෛරයන් ඇතිවන, ළමා අපයෝජන සිදුවන ඒවාට අනුබල දෙන අසත්‍ය පතුරවා හැර ඒ තුළින් සමාජයේ යහපැවැත්මට අවහිර වන දේ නියාමනය කිරීම වැළැක්වීම සඳහා අධිකාරියක් ඇති කිරීම මෙම පනතේ අරමුණ බව කැබිනට් ප්‍රකාශක ජනමාධ්‍ය අමාත්‍ය ආචාර්ය බන්දුල ගුණවර්ධන මහතා පවසයි.

අමාත්‍යවරයා මේ බව පැවසුවේ රජයේ ප්‍රවෘත්ති දෙපාර්තමේන්තුවේ පැවති කැබිනට් තීරණ දැනුම්දීමේ මාධ්‍ය හමුවේදී අදහස් දක්වමිනි.

සමාජ මාධ්‍ය මගින් නිරායුධ අවිහිංසක විශාල පිරිසකට විවිධ ආකාරයේ අඩන්තේට්ටම් අවහිරයන් අපහාස උපහාස හා වෛරය ක්‍රෝධය පැතිරවීම් තුළ මනුෂ්‍ය ජීවිත විශාල ප්‍රමාණයක් විනාශය කරා ඇදගෙන යන කටයුතු සිදුවන බව පැවසූ කැබිනට් ප්‍රකාශකවරයා හොඳ මෙන්ම යහපත් දේද සිදුවන බව සඳහන් කළේය.

ලෝකයේ ඇතැම් දියුණු රටවල කිසිදු සමාජ මාධ්‍යයක් භාවිත නොවන බවද එවැනි රටවල සමාජ මාධ්‍ය භාවිත කිරීම තහනම් බවද කියාසිටි ජනමාධ්‍ය අමාත්‍යවරයා එවැනි කිසිදු වාරණයක් පැනවීමට රජය අපේක්ෂා නොකරන බවද ඉතාම හොද සංවාද ප්‍රබුද්ධ විචාර ඒ තුළ ඇතිවිය හැකි බවද නමුත් සම්පූර්ණ අසත්‍ය, වෛරය පැතිරවෙන, ආගමික හා වාර්ගික ගැටුම් ඇතිකරන, ජාතික ආරක්ෂාවට තර්ජනය වන දේ සදහා කිසියම් නියාමනයක් ඇතිකිරීම මෙම පනතේ අරමුණ බව මෙය ඉදිරිපත් කළ යුත්තේ කවර ඇමතිතුමාද යන්න ආණ්ඩුක්‍රම ව්‍යවස්ථාවේ කිසිවක් සදහන් නැතැයිද කැබිනට් ඇමතිවරයෙකුට යෝජනා ඉදිරිපත් කළ හැකි යැයිද අවධාරණය කළේය.