ආදායම් තත්ත්වය ඉහළ නංවා ගනිමින් භාණ්ඩාගාරයට වැය බරක් නොවී අමතර ආදායමක් එක් කරන තැනක් බවට තැපෑල පත් කර ගැනීමට කටයුතු කරන බව සෞඛ්ය හා ජනමාධ්ය ඇමැති, වෛද්ය නලින්ද ජයතිස්ස මහතා පැවසීය.
ශ්රී ලංකා තැපැල් දෙපාර්තමේන්තුවේ තැපැල් සහායකයන් ලෙස තෝරාගත් 731 දෙනෙකු සඳහා ස්ථීර පත්වීම් ලිපි ප්රදානය කිරීම අරලියගහ මන්දිර පරිශ්රයේ දී ඊයේ (06) සිදු කෙරුණු අතර එම අවස්ථාවට එක්වෙමින් ඇමැතිවරයා මේ බව ප්රකාශ කළේය.
විෂය භාර ඇමැතිවරයා ලෙස තමා සිය යුතුකම් කොටස ඉටු කරන බවත් එමෙන් ම තැපැල්පතිවරයා ඇතුළු කළමනාකාරීත්වය ඔවුන්ගේ වගකීම් නිසි ලෙස භාරගන්නා අතර සේවකයන් ලෙස නව පත්වීම්ලාභී ඔබ ද ඔබට පැවරී ඇති වගකීම, අභියෝගය භාර ගැනීමට දායකවිය යුතු බවත් ඇමැතිවරයා කියා සිටියේය.
මේ සියල්ල ලබාදීමෙන් අනතුරුවත් තැපෑල ලාභ ලබන තැනක් බවට පත්කර ගත නොහැකි වන්නේ නම් භාණ්ඩාගාරයේ මුදල් තවදුරටත් යොදමින් තැපෑල මේ ආකාරයෙන්ම පවත්වාගෙන යා යුතු ද නැද්ද පිළිබඳව සිතා බැලීමට සිදු වන බව ද ඇමැතිවරයා පැවසීය.
2021න් පසු ශ්රී ලංකා තැපැල් දෙපාර්තමේන්තුවට ස්ථිර තැපැල් සහායක බඳවාගැනීම් සිදුකර නැති අතර ඒ හේතුවෙන් පසුගිය වර්ෂය අවසානය වන විට තැපැල් දෙපාර්තමේන්තුවේ තැපැල් සහායක පුරප්පාඩු 1982ක් පැවතිණි.
එවන් පුරප්පාඩු සංඛ්යාවක් සමඟ දෙපාර්තමේන්තුවේ කටයුතු පවත්වාගෙනයාම දැඩි අර්බුදකාරී තත්ත්වයක් මතු වූ අතර, එයට විසඳුමක් ලෙස අදාළ පුරප්පාඩු සංඛ්යාවෙන් 1000ක් බඳවා ගැනීමට සෞඛ්ය හා ජනමාධ්ය ඇමැති වෛද්ය නලින්ද ජයතිස්ස මහතාගේ ඉල්ලීම පරිදි 2025 අගෝස්තු 19 වැනි දින ඇමැති මණ්ඩල අනුමැතිය ලබා දී ඇත.
ඒ අනුව මේ දක්වා තැපැල් දෙපාර්තමේන්තුවේ ආදේශක සේවකයන් ලෙස ලියාපදිංචි වී සිටි නිසි සුදුසුකම් සම්පූර්ණ කළ පිරිස අතරින් ඉහත 731 දෙනකු මෙලෙස බඳවා ගැනීම සඳහා තෝරාගනු ලැබීය.
තවත් තැපැල් සහායකයන් 269ක් ඉදිරියේ දී බඳවා ගැනීමට සෞඛ්ය හා ජනමාධ්ය අමාත්යංශය මේ වනවිටත් කටයුතු කරමින් සිටියි. තැපැල් සහායකයන් ප්රාථමික ශිල්පීය නොවන සේවා ගණයේ III ශ්රේණියට ඇතුළත් වේ.
එහිදී ඇමැතිවරයා වැඩිදුරටත් මෙසේ ද පැවසීය.
“තැපැල් සේවාවේ අනාගත නව්යකරණයට මේ වර්ෂයේ රුපියල් මිලියන 2085ක මුදලක් වෙන්කර තිබෙනවා.ඒ යටතේ තැපැල් දෙපාර්තමේන්තුවට අවශ්ය වන ලොරි රථ මිල දී ගැනීමට රුපියල් මිලියන 250ක මුදලක් ද, කැබ් රථ මිල දී ගැනීමට රුපියල් මිලියන 320ක මුදලක් ද, උප තැපැල් කාර්යාලවලට නවීන තාක්ෂණය එක් කිරීමට අවශ්ය වන ටැබ් පරිගණක යන්ත්ර 1500ක් ද මිල දී ගැනීම සඳහා රුපියල් මිලියන 180ක මුදලක් ද, පරිගණක යන්ත්ර 225ක් මිලදී ගැනීමට රුපියල් මිලියන 75ක මුදලක් ද වෙන් කර තිබෙනවා. තැපැල් කාර්යාල යම් ප්රමාණයකට පුනර්ජනනීය සූර්යබල ශක්තිය ලබාදීමට රුපියල් මිලියන 40ක මුදලක් ද වෙන් කර තිබෙනවා.
රුපියල් මිලියන 600ක මුදලක් නව තැපැල් කාර්යාල ඉදිකිරීමට වෙන් කර තිබෙනවා. ඒ යටතේ නව තැපැල් කාර්යාල විස්සක් ඉදිකිරීමට දැනටමත් කටයුතු ආරම්භ කර තිබෙනවා.මේ ඉදිකිරීම් දෙසැම්බර් මාසය අවසන් වීමට පෙර නිම කරනවා.
තවත් රුපියල් මිලියන 600ක මුදලක් තැපැල් කාර්යාල නවීකරණය කිරීමට වෙන් කර තිබෙනවා. තැපැල් කාර්යාල 209ක් නවීකරණය කිරීමට අවශ්ය කටයුතු කරනවා. මේ සියල්ලෙන් ශ්රී ලංකා තැපැල් සේවාව නව මානයකට රැගෙන යාවි. එයින් මෙරට ජනතාවට විශිෂ්ට, කාර්යක්ෂම තැපැල් සේවාවක් ලැබෙයි. මේ සියලු දේවල් සපයනුයේ තැපෑල භාණ්ඩාගාරයට අමතර වැය බරක් වූ අවස්ථාවකයි. එබැවින් මේ බඳවා ගැනීම් සියල්ල සිදු කරනුයේ සියලු සේවාවන් කඩිනමින් සපයා ජනතාවගේ විශ්වාසය දිනාගෙන, ආදායම් තත්ත්වය ඉහළ නංවා ගනිමින් භාණ්ඩාගාරයට වැය බරක් නොවී අමතර ආදායමක් එක් කරන තැනක් බවට තැපෑල පත්කර ගැනීමටයි.
අප කටයුතු කරගෙන යාමේ දී අමතර වියදම් තිබේ නම් අප ඒ පිළිබඳව සමාලෝචනයක නිරත වෙනවා.තැපැල් කාර්යාලයක, උප තැපැල් කාර්යාලයක සේවය කරන සේවකයාට ගෙවන වැටුපවත් එම කාර්යාලයෙන් ආදායම ලෙස නොලැබෙන්නේ නම් එම කාර්යාල තවදුරටත් පවත්වාගෙන යා යුතුද යන්න පිළිබඳව කරුණු සලකා බැලිය යුතුයි. විසි දහසකට ආසන්න තැපැල් සේවකයන්ගේ ක්රියාකලාප මෙරට ජීවත්වන ජනතාවට විවිධ ආකාරයෙන් විවිධ පැතිකඩවලින් බලපානවා.”
සෞඛ්ය හා ජනමාධ්ය අමාත්යංශයේ ලේකම් විශේෂඥ වෛද්ය අනිල් ජාසිංහ, අතිරේක ලේකම් කැලුම් විජේනායක, තැපැල්පති රුවන් සත්කුමාර, නියෝජ්ය තැපැල්පති (මෙහෙයුම්) එච්.එම්.පී. හේරත්, නියෝජ්ය තැපැල්පති (පාලන) චමේෂා ද සිල්වා, පාලක (මෙහෙයුම්) ඉන්දිකා පෙරේරා, පාලන ලේකම් (කාර්ය මණ්ඩල) සමන්තිකා ප්රේමරත්න, ජ්යෙෂ්ඨ පාලන ලේකම් චමිල් වික්රමආරච්චි යන මහත්ම මහත්මීන් ඇතුළු පළාත් නියෝජනය කරමින් නියෝජ්ය තැපැල්පතිවරුන්, වෘත්තීය සමිති නියෝජිතයන්, තැපැල් දෙපාර්තමේන්තු නිලධාරීහු පිරිසක් මේ අවස්ථාවට එක්ව සිටියහ.
