සෞඛ්ය හා ජනමාධ්ය නියෝජ්ය අමාත්ය වෛද්ය හංසක විජේමුණි මහතා සහ බෙංගාල බොක්ක ආශ්රිත රටවල බහුආංශික තාක්ෂණික ආර්ථික සහයෝගිතාව සඳහා වන එකමුතුවේ (Bengal Initiative for Multi-Sectorial Technical and Economic Cooperation) (BIMSTEC) මහලේකම් තානාපති අම්බ් ඉන්ද්රා මනි පාණ්ඩේ මහතා (H.E. Ambassador Indra Mani Pandey) අතර හමුවක් ඊයේ (19) සෞඛ්ය අමාත්යාංශයේදී පැවැත්විණි.
මෙම හමුවේදී විවිධ බිම්ස්ටෙක් මුලපිරීම් යටතේ කලාපීය සහයෝගිතාව මෙන්ම සෞඛ්ය, තාක්ෂණික සහ ඩිජිටල්කරණය ඇතුළු සහයෝගිතාවයේ ප්රධාන ක්ෂේත්ර කෙරෙහි අවධානය යොමු කෙරිණි.
මෙරට නිදහස් සෞඛ්ය සේවාවේ, විද්යා, තාක්ෂණ සහ නවෝත්පාදන අංශයන් හි ප්රගමනය උදෙසා රජය ගෙනයන වැඩපිළිවෙළ පිළිබඳ මහලේකම්වරයා සිය ප්රශංසාව පළ කළ අතර, බටහිර සහ දේශීය වෛද්ය අංශ දෙකම ඉහළ නැංවීමට BIMSTEC සහ ශ්රී ලංකාව අතර අනාගත සහයෝගිතාවයේ ශක්තිමත්භාවය මෙන්ම ඊට අදාළ විභව ක්ෂේත්රයන් පිළිබඳව ද ඒ මහතා මෙහිදී කරුණු දක්වන ලදි.
කලාපීය සහයෝගිතාව ශක්තිමත් කිරීම සඳහා කැපවූ උත්සාහයන් මෙන්ම බිම්ස්ටෙක් සාමාජික රටවල් අතර ආර්ථික හා සාමාජයීය සංවර්ධනය ඉදිරියට ගෙන යෑම සඳහා ගන්නා තීන්දු තීරණ පිළිබඳ සෞඛ්ය හා ජනමාධ්ය නියෝජ්ය අමාත්ය වෛද්ය හංසක විජේමුණි මහතා, BIMSTEC මහලේකම් තානාපති අම්බ් ඉන්ද්රා මනි පාණ්ඩේ මහතා ඇතුළු කාර්ය මණ්ඩලයට සිය කෘතඥතාව මෙහිදී පළ කරන ලදි. බෙංගාල බොක්ක ආශ්රිත රටවල බහුආංශික තාක්ෂණික ආර්ථික සහයෝගිතාව සඳහා වන එකමුතුව තුළ කලාපීය සහයෝගිතාව සඳහා ශ්රී ලංකාවේ අඛණ්ඩ කැපවීම ද අවධාරණය කරන ලදි.
බෙංගාල බොක්ක ආශ්රිත රටවල බහුආංශික තාක්ෂණික ආර්ථික සහයෝගිතාව සඳහා වන එකමුතුවට බංග්ලාදේශය, ඉන්දියාව, මියන්මාරය, ශ්රී ලංකාව, තායිලන්තය, භූතානය සහ නේපාලය යන රටවල් 07 ඇතුළත් වේ.
