යුද්ධයකදී නැති වන ජීවිත නැවත ගෙන දිය නොහැකි වුවත් ආර්ථික යුද්ධයකදී නැති වන ආදායම නැවත උපයා දිය හැකි බව ජනාධිපති රනිල් වික්රමසිංහ මහතා අවධාරණය කළේය.
රටක දේශපාලන හා භෞමික අඛණ්ඩතාව ස්ථාවරව පැවතීම, ආර්ථික යුද්ධය ජය ගැනීමට හොඳම සාධකය බව ද රනිල් වික්රමසිංහ මහතා පෙන්වා දුන්නේය.
ජනාධිපතිවරයා මේ බව සඳහන් කළේ ත්රිවිධ හමුදාවේ ජ්යෙෂ්ඨ නිලධාරීන් 77 දෙනකුට ‘විශිෂ්ට සේවා විභූෂණ‘ සම්මාන ප්රදානය වෙනුවෙන් මහනුවර ජනාධිපති මන්දිරයේදී ඊයේ (01) පැවති උත්සවය අමතමිනි. 75 වන නිදහස් දින සැමරුමට සමගාමිව මේ සම්මාන ප්රදානය සංවිධානය කර තිබිණි.
විශිෂ්ට සේවා විභූෂණ පදක්කම සුවිශේෂි ප්රදානයක් වන අතර, එය යුද්ධ හමුදාවේ ලුතිනන් කර්නල් සහ ඊට ඉහළ නිලවල නිලධාරීන්ට හා නාවික, ගුවන් හමුදාවල ඊට සමාන නිල දරන අවම වශයෙන් වසර 25ක අඛණ්ඩ සේවා කාලයක් හා යහපත් සේවා ඉතිහාසයක් හිමි නිලධාරීන්ට පමණක් ප්රදානය කෙරේ.
2019, 2020, 2021 වර්ෂවලට අදාළව යුද්ධ හමුදා නිලධාරීන් 53ක්, නාවික හමුදා නිලධාරීන් 17ක් හා ගුවන් හමුදා නිලධාරීන් 7ක් වෙනුවෙන් මෙහිදී පදක්කම් පිරිනැමිණි.
ත්රිවිධ හමුදා නිලධාරීන් 20 දෙනකු සඳහා ‘75 වන නිදහස් සංවත්සර අනුස්මරණ‘ පදක්කම් පිළිගැන්වීමද ජනාධිපතිවරයා අතින් මෙහිදී සිදු විය.
මේ අවස්ථාවේදී වැඩිදුරටත් අදහස් දැක්වූ ජනාධිපති රනිල් වික්රමසිංහ මහතා මෙසේද කීය:
“අද විශිෂ්ට සේවා විභූෂණ පදක්කම් ලැබූ සියලු දෙනාට මා සුබ පතනවා. ඒ වගේම ඔබ කළ සේවය අප අගය කරනවා. ශ්රී ලංකාව නිදහස ලබා 75 වසරක් සපිරීම වෙනුවෙන් පවත්වනු ලබන පළමු උත්සවය මෙයයි. ත්රිවිධ හමුදාව වෙනුවෙන් මේ උත්සවය පැවැත්වීමට හේතුවක් තිබෙනවා.
“අපේ රටට නිදහස ගෙන දුන්නේ මහාමාත්ය ඩී.එස්. සේනානායක මැතිතුමා ප්රමුඛ ජාතික නායකයන්. මේ නිදහස නිකම් ලැබුණේ නැහැ. දෙවැනි ලෝක යුද්ධයේදී ආසියාවේ මිත්ර රටවලට සහයෝගය දුන් රටවල් 2ක් තිබුණා. ඉන් එකක් චීනය. අනෙක ශ්රී ලංකාව. එයින් සර්වජන ඡන්දයෙන් තේරුණු ව්යවස්ථාදායක් පැවතියේ ලංකාවට පමණයි.
“දෙවැනි ලෝක යුද්ධය වෙනුවෙන් දුන් සහාය අගය කර, එක් කොන්දේසියක් මත යුද්ධයෙන් පසු ලංකාවට නිදහස පිරිනමන බව බ්රිතාන්ය අගමැති වින්ස්ටන් චර්චිල් මැතිතුමා යුද්ධය ඇති වූ අවස්ථාවේ මන්ත්රණ සභාවේ සභානායක ලෙස සිටි ඩී.බී. ජයතිලක මහතාටත්, ඉන් පසු මහාමාන්ය ඩී.එස්. සේනානායක මැතිතුමාටත් පැවසුවා. එනම්: පළමුව ඉන්දියාවට නිදහස දීමයි. ඒ අනුව අපට මේ නිදහස ලැබුණා.
“දෙවැනි ලෝක යුද්ධයේදී මිත්ර රටවලට සහාය දුන් තීරණය ගත්තේ රාජ්ය මන්ත්රණ සභාවයි. ඒ වගේම ශ්රී ලංකාවේ නිලධාරීන් ස්වේච්ඡාවෙන් දෙවැනි ලෝක යුද්ධයට සහයෝගය දැක්වූවා. අප නිදහස් ලැබුවායින් පසු ඩී.එස්. සේනානායක මැතිතුමා ඒ සේනාවන්ගෙන් අපේ ත්රිවිධ හමුදාව ආරම්භ කළා. අප දෙවැනි ලෝක යුද්ධයට සහාය දී නිදහස ගත්තා නම්, එය සමරන අවස්ථාවේ අපේ ත්රිවිධ හමුදාව කළ සේවයත් අගය කළ යුතුයි. අපගේ ආරක්ෂක හමුදාව රටේ ආරක්ෂාව සඳහා දිවි හිමියෙන් සටන් කළා. අප හමුදාව ආරම්භ කළේ ලෝක යුද්ධයකින්. එය ලෝකයේ ප්රජාතන්ත්රවාදය ආරක්ෂා කළා. දෙවැනි යුද්ධය තිබුණේ මේ රටේ ඒකීයභාවයත් භෞමික අඛණ්ඩතාවත් ආරක්ෂා කරගැනීමට. ජනරජයක් ලෙස රටේ නිදහස සමරන අවස්ථාවේ අපේ ආරක්ෂක හමුදාව ඉටු කළ මේ උදාර සේවය සිහිපත් කළ යුතුයි. ඒ නිසා මා තීරණය කළා 75 වැනි නිදහස් සැමරුමේ පළමු උත්සවය ත්රිවිධ හමුදාව වෙනුවෙන් පැවැත්වීමට.
“අපගේ ත්රිවිධ හමුදාව දැන් ලංකාවේ පමණක් නොවෙයි. එක්සත් ජාතීන්ගේ සාම සාධක හමුදාව ලෙසත් කටයුතු කරනවා. මේ සාම සාධක හමුදාවට බඳවාගන්නා පිරිස අනාගතයේදී වැඩි කිරීමට අප බලාපොරොත්තු වනවා.
“අප 50 වන නිදහස සැමරුවේ රටේ යුද්ධයක් තිබියදී. දැන් තවත් යුද්ධයක් පවතින අවස්ථාවක අප 75 වන නිදහස් උත්සවය සමරනවා. ඒ තුවක්කු අරගෙන, එකිනෙකා සමග ගැටුම් ඇති කරගෙන කරන යුද්ධයක් නෙවෙයි. විශාල ආර්ථික යුද්ධයකට අද අප මුහුණ දී තිබෙනවා. අද සම්පූර්ණයෙන්ම රටේ ආර්ථිකය කඩාවැටී තිබෙනවා. අප ඒ ආර්ථිකය යළි ගොඩනඟන්නේ නැත් නම්, මේ ණය උගුලෙන් නිදහස් වන්නේ නැත් නම් අපේ රටේ ආර්ථික නිදහස නැති වෙනවා. රටේ ආර්ථික නිදහස නැති වුණොත් දේශපාලන නිදහසින් කිසිම ප්රයෝජනයක් නැහැ. අද ලෝකයේ සිටින ආර්ථික බලවතුන්ට අපට යටත් වන්න බැහැ. එසේ නම් අපේ පළමු කටයුත්ත විය යුත්තේ මේ ආර්ථිකය ගොඩනඟා ජනතාව ජීවත් කරවීමයි. ඒ වගේම ඔවුන්ගේ අහිමි වූ ආදායම් මාර්ග නැවත උදා කර දිය යුතුයි.
“අද බොහෝ දෙනෙක් දුෂ්කරතාවලට මුහුණ දී සිටිනවා. ඒ පිළිබඳ අවබෝධයක් මට තිබෙනවා. ඇතැම් රාජ්ය සේවකයන්ට ණයත් ගෙන, බදුත් ගෙවීමට සිදු වීම නිසා ආදායමක් නැති තත්ත්වයකට මුහුණ දී සිටිනවා. අප සියලු දෙනා මේ පීඩනය දරාගන්නවා. අපට මේ පීඩනය නැති කරගන්න පුළුවන්. රටවල් ගණනාවක සහාය අපට හිමි වී තිබෙනවා. එළැඹෙන මාස දෙක-තුන තුළ මේ ණය ප්රතිව්යූහගත කිරීමේ කටයුතු අවසන් කරන්න පුළුවන් වෙයි කියලා මා විශ්වාස කරනවා. ඒ වගේම ඉන්දියාව සහ චීනය සමග පැවැත්වෙන සාකච්ඡා අවසන් අදියරේ පවතිනවා. ණය ප්රතිව්යූහගත කිරීම සඳහා වූ එකඟත්වය අපට ජාත්යන්තර මූල්ය අරමුදලින් ලැබීමත් සමඟ එය ලෝකය පිළිගන්නවා.
“මේ වසර අවසන් වන විට අපට මෙයට වඩා හොඳ ආර්ථික තත්ත්වයක් ලැබෙයි කියා මා විශ්වාස කරනවා. ඒ සමඟම රාජ්ය සේවකයන් සියලු දෙනාට යම් සහනයක් දීමට අපට අවස්ථාව ලැබෙනවා. අප මේ වැඩපිළිවෙළ ඉදිරියට ගෙන යා යුතුයි. එයින් ඉවත් වීමට අපට හැකියාවක් නැහැ. අප නිවැරදි මාවතක ගමන් කරනවා නම් උපක්රමශීලිව කටයුතු කළ යුතුයි. ජයග්රහණය උදා කරගත හැකි වන්නේ එවිටයි.
“ත්රස්තවාදි යුද්ධය සහ ආර්ථික යුද්ධය අතර ඇත්තේ එක් වෙනසක් පමණයි. එදා ජීවිත නැති වුණා. අද ආදායම් නැති වෙලා. ඒ වෙනස පමණයි තිබෙන්නේ. නැති වූ ජීවිත අපට නැවත ගෙන දිය නොහැකියි. එහෙත් අඩු වූ අදායම නැවත උපයාගත හැකියි. ආණ්ඩුවක් ලෙස අපි සියලු දෙනා කැප වී සිටින්නේ ඒ වැඩපිළිවෙළ සඳහායි. අප එදා දිනාගත් දේශපාලන නිදහස සහ එදා ආරක්ෂා කළ භෞමික අඛණ්ඩතාව සමඟ ආර්ථික නිදහසත් උදා කරගනිමින් අපට ඉදිරියට යා හැකි බව මා විශ්වාස කරනවා.“
ආරක්ෂක රාජ්ය ඇමැති ප්රමිත බණ්ඩාර තෙන්නකෝන්, ජාතික ආරක්ෂාව පිළිබඳ ජනාධිපති ජ්යෙෂ්ඨ උපදේශක සහ ජනාධිපති කාර්ය මණ්ඩල ප්රධානී සාගල රත්නායක, ජනාධිපති ලේකම් සමන් ඒකනායක, ආරක්ෂක අමාත්යාංශයේ ලේකම් ජෙනරාල් (විශ්රාමික) කමල් ගුණරත්න, ත්රිවිධ හමුදා මාණ්ඩලික ප්රධානී ජෙනරාල් ශවේන්ද්ර සිල්වා, යුද හමුදාපති ලුතිනන් ජෙනරාල් විකුම් ලියනගේ, ගුවන් හමුදාපති වයිස් එයාර් මාර්ෂල් සුදර්ශන පතිරණ, නාවික හමුදාපති වයිස් අද්මිරාල් ප්රියන්ත පෙරේරා මහත්වරුන් ඇතුළු ත්රිවිධ හමුදා නිලධාරීහු පිරිසක් මේ අවස්ථාවට එක්ව සිටියහ.
75 වැනි නිදහස් දිනයට සමගාමිව සියලු ලක්වාසීන්ට සෙත් පතා ජනමාධ්ය අමාත්යාංශයේ සේවක සුබසාධක සංගමය මඟින් සංවිධානය කරන ලද 21 වැනි ‘ඇසිදිසි දහම් සර’ ධර්ම දේශනාව ඊයේ (01) ජනමාධ්ය අමාත්යාංශයේදී පැවැත්විණි. කදුරුදූව ශ්රී දීපාරාමාධිපති රත්මලාන පරමධම්ම චේතිය මහා පරිවේණාධිපති, ශාස්ත්රපති, ලේල්වල තපස්සි ස්වාමීන් වහන්සේ විසින් එහිදී ධර්ම දේශනය පවත්වන ලද අතර, ජනමාධ්ය අමාත්යාංශයේ ලේකම්, ලේක්හවුස් සභාපති අනූෂ පැල්පිට, අතිරේක ලේකම් (පාලන) එස්.ආර්.ඩබ්.එම්.ආර්.පී. සත්කුමාර, අතිරේක ලේකම් (සංවර්ධන හා සැලසුම්) ඊ.එම්.එස්.බී. ජයසුන්දර යන මහත්වරු හා ජනමාධ්ය අමාත්යාංශයේ කාර්ය මණ්ඩලය මේ අවස්ථාවට එක් වී සිටියහ.
රජයේ ආයතන වියදම් කළමනාකරණය කරගනිමින්, පාඩු නොලබන ආයතන ලෙස ක්රියාත්මක වීම සඳහා අවශ්ය ක්රියාමාර්ග අනුගමනය කළ යුතුයැයි ප්රවාහන, මහාමාර්ග හා ජනමාධ්ය ඇමැති, ආචාර්ය බන්දුල ගුණවර්ධන මහතා හික්කඩුවේදී ඊයේ (01) පැවසීය.
ඇමැතිවරයාගේ සංකල්පයකට අනුව ක්රියාත්මක කෙරෙන ශ්රී ලංකා දුම්රිය දෙපාර්තමේන්තුව සතු ඉඩම් අනවසරයෙන් භුක්ති විඳින පිරිස් නියමානුකූල කිරීම සහ ඔවුන්ගෙන් හිමි විය යුතු බදු මුදල් අය කරගැනීම සඳහා වන ජංගම සේවා වැඩසටහනේ තවත් අදියරක් හික්කඩුව ප්රාදේශීය ලේකම් කාර්යාල පරිශ්රයේදී පැවැත්විණි.
මෙම වැඩසටහන යටතේ හික්කඩුව, රත්ගම මාදම්පාගම යන ප්රාදේශීය ලේකම් කොට්ඨාසවල දුම්රිය ඉඩම් භුක්ති විඳින විශාල පිරිසකගේ දුම්රිය ඉඩම් සම්බන්ධ ගැටලු සඳහා විසඳුම් දීම සිදු විය. එහිදී දුම්රිය සතු ඉඩම් නියමානුකූල කිරීමේ ක්රමවේද හඳුන්වා දීම, ඒ පිළිබඳ නෛතික පසුබිම පිළිබඳ ජනතාව දැනුම්වත් කිරීම, සුදුසුකම් සම්පූර්ණ කරන ලද පිරිස් වෙනුවෙන් තාවකාලික බලපත්ර නිකුත් කිරීම ඇතුළු සේවා රැසක් ජංගම සේවය යටතේ ක්රියාත්මක විය.
මෙහිදී වැඩිදුරටත් අදහස් දැක්වූ අමාත්යවරයා:
“නිදහස ලැබීමෙන් පසු මුහුණ දී සිටින දැවැන්තම ආර්ථික අර්බුදය හමුවේ විශාල අපහසුතා රැසකට අප මුහුණ පා සිටිනවා. මතුව තිබෙන ආර්ථික අර්බුදය විසඳීම සඳහා ඊට ආර්ථිකමය විසඳුමක් සෙවිය යුතුයි. ඒ සඳහා දේශපාලන මතිමතාන්තරවලින් තොරව මේ තත්ත්වය තේරුම් ගැනීම අවශ්යයි. විශේෂයෙන්ම රජයේ ආයතන වියදම් කළමනාකරණය කරගනිමින් හැකිතාක් පාඩු නොලබන ආයතන ලෙස ක්රියාත්මක වීම සඳහා අවශ්ය ක්රියාමාර්ග අනුගමනය කළ යුතුයි. ඒ අනුව දීර්ඝ කාලයක් තිස්සේ පාඩු ලබන දුම්රිය දෙපාර්තමේන්තුව තවදුරටත් පාඩු නොලබන ආයතනයක් බවට පත් කිරීම සඳහා මූලික ක්රියාමාර්ග රැසක් පසුගිය කාලයේදී ගනු ලැබුවා. නව සංචාරක දුම්රිය සේවාවන් හඳුන්වා දීමෙන්, ගාස්තු සංශෝධනය කිරීමෙන් මෙන්ම විශාල කාලයක් නියමිත බදු නොගෙවා දුම්රියේ ඉඩම් භුක්ති විඳි අනවසර පදිංචිකරුවන් නියමානුකූල කිරීමෙන් දුම්රිය වෙත ලැබිය යුතුව තිබූ විශාල මුදලක් නැවත ලබාගැනීමට අපට හැකියාව ලැබුණා.
“කිසිදු බදු මුදලක් ගෙවීමකින් තොරව දුම්රියේ ඉඩම් භුක්ති විඳින ජනතාවට, පවතින ආර්ථික අපහසුතාද සැලකිල්ලට ගනිමින් රජයට හා දුම්රිය දෙපාර්තමේන්තුව වෙත අය විය යුතු බදු නියමිත පරිදි ගෙවීම සඳහා සහනදායි අවස්ථාවක් මෙම ජංගම සේවය යටතේ සලසා දෙනවා. වසර දහයකට වැඩි කාලයක් අනවසර පදිංචිකරුවන් ලෙස සිටින ජනතාවට අදාළ බදු මුදල් ගෙවා තාවකාලික බදු ගිවිසුම්වලට එළඹීමේ අවස්ථාවත්, බදු ඔප්පු සහිතව වුවත් බදු නොගෙවා සිටින පිරිසට නියමිත බදු මුදල් ගෙවීම් සඳහා සහනදායි වැඩපිළිවෙළක් සහ මාස තුනක සහන කාලයක් දීමටත් මේ යටතේ අප පියවර ගන්නවා.
“දැනට ප්රයෝජනයට නොගන්නා දුම්රිය සතු ඉඩම් වඩාත් ඵලදායි ආයෝජන සඳහා යෙදවීමට එහි වත්කම් කළමනාකරණ වැඩපිළිවෙළ යටතේ අප පියවර ගනු ලබනවා. ඒ සඳහා ඉදිරිපත් වීමට කැමැති ඕනෑම අයකුට රජයේ කොන්දේසිවලට යටත්ව එම ආයෝජන සඳහා අවස්ථාව සලසා දීමට ඕනෑම අවස්ථාවක සූදානම්.
“ඉදිරි කාලයේදී දුම්රිය සේවා තවදුරටත් කාර්යක්ෂම කිරීම සඳහා බහුකාර්ය බළකායෙන් තුන් දහසක පිරිසක් දුම්රිය සේවයේ ස්ථිර පත්වීම් සඳහා ඇතුළත් කරගැනීමට අප පියවර ගන්නවා. එසේම වේයන්ගොඩ සිට පාණදුර දක්වා විදුලි දුම්රිය ව්යාපෘතියක් මේ වසර තුළ ආරම්භ කිරීමට සැලසුම් කරනවා.”
මෙහිදී පැමිණ සිටි ජනතාව ඉදිරිපත් කළ ගැටලුවලට ක්ෂණික විසඳුම් දීම සඳහා අවශ්ය නිලධාරීන්ගේ අවධානය යොමු කළ අමාත්යවරයා හික්කඩුව නාගරික ප්රදේශය ආශ්රිතව දුම්රිය සංඥා පද්ධතියේ පවතින ගැටලු සඳහා මාස දෙකක් තුළ විසඳුම් දීමට පියවර ගන්නා බවද ප්රකාශ කළේය. එම ප්රදේශයේ සංචාරක ව්යාපාරය තවදුරටත් වර්ධනය කළ හැකි ආකාරයේ ආයෝජන ව්යාපෘති සඳහා ප්රදේශයේ ආයෝජකයන් සහ පළාත් පාලන ආයතන මගින් ඉදිරිපත් කරන යෝජනා සඳහා විශේෂ ප්රමුඛතාවක් දීමට කටයුතු කරන බවත් ඇමැතිවරයා මෙහිදී අවධාරණය කළේය.
ජංගම සේවා වැඩසටහනෙන් අනතුරුව හික්කඩුව දුම්රියපොළ ආශ්රිතව නිරීක්ෂණ චාරිකාවකද නිරත වූ අමාත්යවරයා එහි තත්ත්වය පිළිබඳ ද සොයා බැලීය.
කෘෂිකර්ම රාජ්ය ඇමැති නීතිඥ මොහාන් ද සිල්වා, දුම්රිය සාමාන්යාධිකාරිවරයා ඇතුළු දුම්රිය දෙපාර්තමේන්තුවේ සියලු අංශ නියෝජනය කරන නිලධාරීන්, ප්රදේශයේ පළාත් පාලන ආයතන නියෝජිතයන් සහ ප්රදේශවාසීන් ඇතුළු පිරිසක් මේ වැඩසටහනට සහභාගි වූහ.
75 වන ජාතික නිදහස් දිනය වෙනුවෙන් ශ්රී ලංකා තැපැල් දෙපාර්තමේන්තුව විසින් නිකුත් කළ සමරු මුද්දරය සහ ශ්රී ලංකා මහ බැංකුව විසින් නිකුත් කළ විශේෂ සමරු කාසිය ජනාධිපති රනිල් වික්රමසිංහ මහතා වෙත පිළිගැන්වීම අද (02) පෙරවරුවේ මහනුවර ජනාධිපති මන්දිරයේ දී සිදු විය.
සමරු මුද්දරය ජනමාධ්ය ප්රවාහන හා මහා මහාමාර්ග අමාත්ය බන්දුල ගුණවර්ධන මහතා විසින් ද, සමරු කාසිය මහ බැංකු අධිපති ආචාර්ය නන්දලාල් වීරසිංහ මහතා විසින් ද ජනාධිපති රනිල් වික්රමසිංහ මහතාට පිළිගන්වනු ලැබීය.
රුපියල් දහසක වටිනාකමකින් යුතු 75 වන නිදහස් දින සමරු කාසිය සංසරණය සඳහා නොවන අතර ශ්රී ලංකා මහ බැංකුව විසින් නිකුත් කරන ලද 71 වන සමරු කාසිය මෙය වෙයි.
මේ අතර 75 වන ජාතික නිදහස් දිනයට සමගාමීව ශ්රී ලංකා තැපැල් දෙපාර්තමේන්තුව විසින් සංවිධානය කළ නිදහස් මුද්දර දැක්ම සහ කෞතුකාගාර ප්රදර්ශනය පෙබරවාරි 06 වනදා සිට 12 වනදා දක්වා පෙ.ව 9.00 සිට ප.ව 7.00 දක්වා කොළඹ 10 ඩී.ආර්. විජේවර්ධන මාවතේ පිහිටි තැපැල් මූලස්ථාන පරිශ්රයේ දී පැවැත්වෙයි.
“75” අංකය විශාලව සහ ශ්රී ලංකා ජාතික ධජය ඔසවාගෙන සිටින ආකාරය කාසිය මධ්යයේ දැක්වෙයි.
කාසිය ඉහළ දාරයේ පරිධියේ ඉංග්රීසි, සිංහල සහ දෙමළ භාෂාවලින් “නිදහස් සැමරුම” ලෙස දැක් වේ. “1948 – 2023” වර්ෂ කාසියේ පහළ දාරයේ පරිධියේ දැක් වේ. මුහුණත වටිනාකම “1000” විශාල ඉලක්කමින් කාසිය මධ්යයේ දැක්වේ. සිංහල, දෙමළ සහ ඉංග්රීසි භාෂාවලින් “රුපියල්” යන වචන මුහුණත වටිනාකමට පහළින් දැක්වෙන අතර ශ්රී ලංකාවේ රාජ්ය ලාංඡනය මුහුණත අගයට ඉහළින් දැක්වේ. ඉංග්රීසි, සිංහල සහ දෙමළ භාෂාවලින් “ශ්රී ලංකා” යන වචන කාසියේ ඉහළ දාරයේ පරිධියේ දැක්වේ.
ශ්රී ලංකා ගුවන්විදුලි සංස්ථාවට අයත් ත්රිකුණාමලය කුච්චවේලි හි පවතින, දැනට කිසිදු ප්රයෝජනයකට නොගන්නා අක්කර 270 ඉඩම මෙගාවොට් 100 ක සූර්ය බලශක්තිය උත්පාදනය කෙරෙන ව්යාපෘතියක් වෙත බදු පදනම යටතේ භාර දීම සිදුවිය.
කැනේඩියානු සමාගමක් 3W බලශක්ති කළමනාකරණ පුද්ගලික ආයතනය මේ වෙනුවෙන් සිදුකරන ලබන ආයෝජනය ඇමෙරිකානු ඩොලර් මිලියන 150 කි.
ශ්රී ලංකා ගුවන් විදුලි සංස්ථා පරිශ්රයේදී පැවැති වැඩසටහනකදී මෙම ව්යාපෘතියට අදාළ ඉඩම භාරදීම ප්රවාහන මහා මාර්ග හා ජනමාධ්ය අමාත්ය ආචාර්ය බන්දුල ගුණවර්ධන මහතාගේ ප්රධානත්වයෙන් සිදුවිය.
මෙම අවස්ථාවේ දී අදහස් දැක්වූ අමාත්යවරයා:
අප රට මුහුණ දී ඇති වත්මන් ආර්ථික අර්බුදය හමුවේ රට ගොඩ නැගීම වේදිකාවල සිදු කරන කතා වලින් සිදු කළ හැකි වන්නේ නැහැ. මෙම ආර්ථික අර්බුදයට ඇත්තේ ආර්ථිකමය විසඳුමක් පමණයි. එබැවින් මේ මොහොතේ රටක් ලෙස ගත හැකි වැදගත්ම ක්රියාමාර්ගය වන්නේ විදේශ විනිමය හා ආයෝජන මෙරටට වැඩිපුර ලබා ගැනීමට හැකි පියවර ගැනීමයි. එහිදී සෘජු විදේශ ආයෝජන පිළිබඳව අවධානය යොමු කිරීම ඉතාමත් වැදගත්.
මෑත කාලීනව වේගයෙන් සංවර්ධනය වූ ඉන්දියාව, චීනය, සිංගප්පූරුව, වියට්නාමය වැනි රටවල් එම ඉලක්කයට ළඟා වූයේ විදේශ ආයෝජන දිරි ගැන්වීම තුළින්. නමුත් අපේ රටට වසරකට බිලියනයක හෝ විදේශ ආයෝජන ලබා ගැනීමට නොහැකි වීම අවාසනාවන්ත තත්ත්වයක්. විදේශ ආයෝජකයින් දිරිගන්වන, ඒ සඳහා ආකර්ෂණීය, නිර්ලෝභී වැඩපිළිවෙළක් අපේ රට අනුගමනය කර නැහැ. සෑම දෙයක් දෙසම අප බලන්නට පුරුදු වී තිබෙන්නේ සැකයෙක්. නමුත් ලෝකයේ බොහෝ රටවල් මෙම ආයෝජන දිරි ගැන්වීමේ උපක්රමය ඉතාමත් සාර්ථකව ප්රයෝජනයට ගනු ලබනවා.
වත්කම් වඩාත් කාර්යක්ෂම ලෙස කළමනාකරණය කිරීම තුළින් පාඩු ලබන ආයතන පවා දියුණු කළ හැකි බව මා විශ්වාස කරනවා. වත්මන් රජය විදේශ ආයෝජන සඳහා වඩාත් හිතකාමී පරිසරයක් ගොඩ නගමින් සිටිනවා. ඒ අනුව මෙරට දේශීය ආයතන සහ සංවිධාන ද මෙරටට විදෙස් ආයෝජන ලබාගත හැකි ආකාරයෙන් කටයුතු කිරීමට වඩ වඩාත් උනන්දු විය යුතුයි. මෙවැනි පසුබිමක් යටතේ ශ්රී ලංකා ගුවන්විදුලි සංස්ථාව සිදුකරන මෙම ආයෝජනය රටට වඩාත් ආදර්ශමත් ව්යාපෘතියක් ලෙස කඩිනමින් ක්රියාත්මක වනු ඇති බව මා විශ්වාස කරනවා.
මෙම අවස්ථාව සඳහා ජනමාධ්ය අමාත්යාංශයේ ලේකම් අනුෂ පැල්පිට,ශ්රී ලංකා ගුවන් විදුලි සංස්ථාවේ සභාපති හඩ්සන් සමරසිංහ මහතා ඇතුළු , ව්යාපෘතියට ආයෝජනය කරන සමාගමේ නිලධාරීන් ඇතුළු පිරිසක් එක්ව සිටියහ.
අනුරාධපුර අභිනව අටමස්ථානාධිපති ශ්යාමෝපාලි මහා නිකායේ මල්වතු පාර්ශ්වයේ නුවර කලාවියේ ප්රධාන සංඝනායක අතිපූජ්ය පල්ලේගම හේමරතන නාහිමිපාණන් වෙත ශ්රී සන්නස් පත්රය පිළිගැන්වීමේ පුණ්යෝත්සවය පෙරේදා (28) පස්වරුවේ ඓතිහාසික ජය ශ්රී මහා බෝධි මහ මළුවේදී පැවැති අවස්ථාවේදී ජනාධිපති රනිල් වික්රමසිංහ මහතා අභිනව අටමස්ථානාධිපති නාහිමිපාණන් වහන්සේ වෙත ශ්රී සන්නස් පත්රය සහ අග්රාමාත්ය දිනේෂ් ගුණවර්ධන මහතා විසින් විජිනිපත පිළිගන්වනු ලැබූ අයුරු.