වර්තමානයේ දේශයේ ගම් නියම්ගම් සිසාරා දස දිග පැතිර යන මත්ද්‍රව්‍ය ව්‍යසනය ශ්‍රී ලාංකීය දරු දැරියන්ගේ අනාගත සුරක්ෂිතතාව ද අඳුරු කරමින්, සමස්ත ජන ජීවිතය ද පීඩනයට පත් කරමින් හිස ඔසවමින් සිටින බව ප්‍රත්‍යක්ෂ සත්‍යයකි.

මතින් නිදහස් රටක් අනාගත පරපුර වෙත උරුමකරදීම වෙනුවෙන් මත්ද්‍රව්‍ය නිවාරණ ජාතික වැඩසටහන සාර්ථක කරගැනීමෙහිලා කැපවන බවට රටම එක්ව දිවුරුම් දුන් “බක්මහ දිවුරුම” අද (03) පෙරවරුවේ සිදු කෙරිණි.
එහි සමාරම්භක අවස්ථාව සර්ව ආගමික ආශිර්වාද මධ්‍යයේ ජනාධිපති ගරු මෛත්‍රීපාල සිරිසේන මැතිතුමාගේ ප්‍රධානත්වයෙන් අග්‍රාමාත්‍ය රනිල් වික්‍රමසිංහ, කතානායක කරූ ජයසුරිය යන මහත්වරුන් ප්‍රමුඛ පාර්ලිමේන්තුව නියෝජනය කරන පක්ෂ විපක්ෂ මැති ඇමතිවරුන්ගේ සහභාගිත්වයෙන් අද (03) පෙ.ව 8.30 ට කොළඹ නිදහස් චතුරශ්‍රයේ දී පැවැත්විණි.
ආණ්ඩුකාරවරුවන්. පළාත් ප්‍රධාන අමාත්‍යවරුන් ද ජනාධිපති ලේකම් උදය ආර්. සෙනෙවිරත්න මහතා ඇතුළු අමාත්‍යාංශ ලේකම්වරුන් ප්‍රමුඛ රාජ්‍ය නිලධාරින් ද , ත්‍රිවිධ හමුදාපතිවරුන්, පොලිස්පති ඇතුළු අරක්ෂක අංශ ප්‍රධානිහු ඊට එක්ව සිටියහ. මේ අතර ජාති භේදයකින් තොරව ජනතාව ද එම අවස්ථාවට එක්ව සිටියහ.
මතින් නිදහස් රටක් අනාගත පරපුර වෙත උරුම කරදීම වෙනුවෙන් මත්ද්‍රව්‍ය නිවාරණ ජාතික වැඩසටහන සාර්ථක කරගැනීමෙහිලා, තමා මත්ද්‍රව්‍ය භාවිතයෙන් වැළකෙන බවටත්. මේ වන විට එයට ගොදුරුවී සිටින/නොසිටින තම ඥාති, හිතමිත්‍රාදීන් ද මත්ද්‍රව්‍ය භාවිතයෙන් මුදවා ගැනීමට පියවර ගන්නා බවටත්, සමස්ත ශ්‍රී ලාංකික සහෘද ප්‍රජාව මතින් නිදහස් කරගැනීම වෙනුවෙන් තමා වෙත පැවරෙන උත්කෘෂ්ට වූ සාමුහික කාර්යභාරය උපරිම කැපවීමෙන් හා අවංකභාවයෙන් යුතුව සපුරා ඉටුකර ගැනීමට අධිෂ්ඨාන පෙරදැරිව කැපවන බවටත් මෙහි දී සියලුදෙනා ප්‍රතිඥා දුන්හ.
මෙම අවස්ථාව විද්්‍යුත් මාධ්‍ය ඔස්සේ සජීවි ව විකාශය කෙරුණු අතර, ඒ හා සමගාමීව තම ආයතනවල සිට රාජ්‍ය සේවකයන් ද, පොදු මහජනතාව සහ පාසල් දරුවන් ද බක්මහ දිවුරුමට එක්වීම විශේෂත්වයකි.
මත්ද්‍රව්‍ය ව්‍යසනයෙන් රට නිදහස් කර ගනිමින් සෞභාග්‍යමත් ශ්‍රී ලංකාවක් ගොඩනැඟීමේ ජාතික කර්තව්‍යය තවදුරටත් සාර්ථක කර ගැනීමට පවුල් සංස්ථාවේ සිට සමාජ සංස්ථාව දක්වා වූ පුළුල් ආකල්පීය වෙනසකින් හා සක්‍රීය දායකත්වයකින් යුතුව මේ ව්‍යසනය පිටුදැකීමේ වැඩපිළිවෙළකට අවතීර්ණ විය යුතු බව ජනාධිපතිතුමාගේ විශ්වාසය යි.
එකී වැඩපිළිවෙලේ තවත් නව ප්‍රවිශ්ටයක් ලෙස ජනාධිපති ගරු මෛත්‍රීපාල සිරිසේන මැතිතුමාගේ මඟපෙන්වීමෙන් ,බක්මහ දිවුරුම, වැඩසටහන අද දින සංවිධානය කර තිබූ අතර මේ සමඟම මතට එරෙහි වැඩපිළිවෙළ සියලු අංශවල සහයෝගයෙන් ශක්තිමත් ව බලගැන්වීම ජනාධිපතිතුමාගේ අරමුණයි.

 මතින් නිදහස් රටක් වෙනුවෙන් රටම එක්ව දිවුරුම් දෙන ‘බක්මහ දිවුරුම’ අපේ‍්‍රල් 03වනදා සිදු කෙරේ.

එහි ප‍්‍රධාන උත්සවය අපේ‍්‍රල් 03 වනදා පෙ.ව 8.15 ට සර්ව ආගමික නායකයන්ගේ ආශිර්වාදයෙන් ජනාධිපති ගරු මෛතී‍්‍රපාල සිරිසේන මැතිතුමාගේ ප‍්‍රධානත්වයෙන් කොළඹ නිදහස් චතුරස්‍රයේ දී පැවැත්වෙන අතර පාර්ලිමේන්තුව නියෝජනය කරන සියලු පක්ෂ විපක්ෂ මන්තී‍්‍රවරු ඊට එක්කර ගැනීමට නියමිතය. එමෙන්ම පළාත් ආණ්ඩුකාරවරුන්, ප‍්‍රධාන අමාත්‍යවරුන් ඇතුළු නියෝජිතයන් ද ඒ සඳහා එක්වනු ඇති.
මෙම අවස්ථාව විද්‍යුත් මාධ්‍ය ඔස්සේ සජීවිව විකාශය කෙරෙන අතර, ඒ හා සමගාමීව තම ආයතනවල සිට රාජ්‍ය සේවයේ සියලුදෙනා ද පොදු මහජනතාව ද බක්මහ දිවුරුමට එක් කර ගැනීමට නියමිතය.
අපේ‍්‍රල් 03 වනදා පෙ.ව 8.30 සිට 8.34 දක්වා රාජ්‍ය සේවකයන් සහ පොදු මහජනතාව බක්මහ දිවුරුමට එක් කර ගැනීමට කටයුතු සලසා තිබෙන අතර, පෙ.ව 8.30 සිට 8.32 දක්වා සිංහල බසින් ද 8.32 සිට 8.34 දක්වා දමිළ බසින් ද එම දිවුරුම ලබාදීම සිදු කෙරේ.
දීප ව්‍යාප්තව පාසල් දරුවන් ද සිය පාසල්වල සිට බක්මහ දිවුරුම සමග එක්වීමට නියමිතය. ඒ අනුව පෙ.ව 8.34 සිට 8.36 දක්වා සිංහල බසින් ද, පෙ.ව 8.36 සිට 8.38 දක්වා දෙමළ බසින් ද පාසල් සිසුන් වෙනුවෙන් බක්මහ දිවුරුම ඉදිරිපත් කරයි.
මත්ද්‍රව්‍ය ව්‍යසනයෙන් රට නිදහස් කර ගනිමින් සෞභාග්‍යමත් ශ‍්‍රී ලංකාවක් ගොඩනැඟීමේ ජාතික කර්තව්‍ය තවදුරටත් සාර්ථක කර ගැනීමට ජනාධිපති ගරු මෛතී‍්‍රපාල සිරිසේන මැතිතුමාගේ මඟපෙන්වීමෙන් කි‍්‍රයාත්මක මෙම වැඩසටහනට බේදයකින් තොරව සියලු ශ‍්‍රී ලාංකික ජනතාවට ආරාධනා කෙරේ.

 ව්‍යවසායකයන් ලක්ෂයක් බිහි කිරීමේ අරමුණින් මුදල් අමාත්‍ය මංගල සමරවීර මහතාගේ සංකල්පයක් මත ක්‍රියාත්මක එන්ටප්‍රයිස් ශ්‍රී ලංකා රජයේ පොලී සහන ණය යෝජනා ක්‍රමය යටතේ මේ වන විට ලියාපදිංචි කර ඇති ණය සංඛ්‍යාව 46,673කි. මේ යටතේ රුපියල් මිලියන 78,621.6ක් වටිනා ණය ලබා දී තිබේ. 

වැඩිම ණය ප්‍රමාණයක් ලබා දී ඇත්තේ “සොඳුරු පියස” නිවාස ණය යෝජනා ක්‍රමය යටතේ ය. එම ණය සංඛ්‍යාව 20,286කි. “ගොවි ජනතාව” වෙනුවෙන් ක්‍රියාත්මක “රන් අස්වැන්න” සහ “ගොවි නවෝදා” ණය යෝජනා ක්‍රම වෙත ද ඉහළ ඉල්ලුමක් ලැබී තිබේ. ඒ අනුව “රන් අස්වැන්න” ණය යෝජනා ක්‍රමය යටතේ ලබා දී ඇති ණය සංඛ්‍යව 17,484කි. “ගොවි නවෝදා” ණය යෝජනා ක්‍රමය යටතේ ද ණය 3,337ක් ලබා දී ඇත.
නිවාස සිහිනය සැබෑ කිරීමේ අරමුණින් ක්‍රියාත්මක “ජය ඉසුර” ණය යෝජනා ක්‍රමය යටතේ ණය 2258ක් නිකුත් කර තිබේ. පරිසර හිතකාමී සූර්ය බලශක්ති පද්ධති ස්ථාපනය කිරීමේ අරමුණින් ක්‍රියාත්මක “රිවි බල සවි” ණය යෝජනා ක්‍රමය යටතේ ද ණය 1339ක් නිකුත් කර ඇත. නව මාධ්‍ය උපකරණ මිල දී ගැනීම සඳහා සහ උපකරණ අලුත්වැඩියා කර ගැනීම සඳහා මාධ්‍යවේදීන් 661 දෙනෙකුට මේ දක්වා “මාධ්‍ය අරුණ” ණය ලබා දී තිබේ.
එන්ටප්‍රයිස් ශ්‍රී ලංකා රජයේ පොලී සහන ණය යෝජනා ක්‍රමය ආරම්භ වූයේ 2018 වසරේ ජූනි මස 21 වැනි දා ය. උතුරු නැගෙනහිර ඇතුළුව දිවයිනේ සියලු ප්‍රදේශවල රාජ්‍ය සහ පෞද්ගලික බැංකුවල එන්ටප්‍රයිස් ශ්‍රී ලංකා කවුළු විවෘත කිරීමට පියවර ගත් අතර එම වසර අවසානය වන විට ලබා දී තිබූ ණය සංඛ්‍යාව 39,000ක් පමණ විය. මෙම ණයවල පොලිය සම්පූර්ණයෙන් හෝ අර්ධ වශයෙන් රජය මගින් අදාළ බැංකු වෙත ගෙවීම සඳහා රුපියල් මිලියන 5250ක මුදලක් වැය කර තිබේ.
එන්ටප්‍රයිස් ශ්‍රී ලංකා ණය යෝජනා ක්‍රමය වඩාත් පුළුල් කරමින් 2019 අයවැය මගින් නව ණය යෝජනා ක්‍රම රැසක් හඳුන්වා දී ඇත. මේ අතරින් විදේශ සේවයේ නියුක්තිකයන්ට නිවසක් සාදා ගැනීම සඳහා වන “සිහින මාලිගා” ණය යෝජනා ක්‍රමය, නව විවාහක යුවල වෙනුවෙන් ක්‍රියාත්මක “හෝම් ස්වීට්” හෝම් ණය යෝජනා ක්‍රමය සහ උසස් පෙළ විභාගය සමත් වූවන් වෙනුවෙන් උසස් අධ්‍යාපනය පාඨමාලා හැදෑරීම සඳහා වන “මගේ අනාගතය” ණය යෝජනා ක්‍රමය සුවිශේෂී වේ. මේ වසරේ ණයලාභීන්ගේ පොලී ගෙවීම සඳහා පමණක් අයවැය මගින් වෙන් කර ඇති මුදල රුපියල් මිලියන 6100කි.
එන්ටප්‍රයිස් ශ්‍රී ලංකා ණය යෝජනා ක්‍රමය තව දුරටත් ජනතාව අතරට රැගෙන යාමේ අරමුණෙන් ක්‍රියාත්මක “එන්ටප්‍රයිස් ශ්‍රී ලංකා ඔබේ ගමට” ජංගම සේවය පසුගිය දා වැලිගමින් ආරම්භ කෙරිණි. 7000කට අධික නව ව්‍යවාසායකත්ව අපේක්ෂා සහිත ජනතාවගේ සහභාගීත්වයෙන් පැවැති සමාරම්භක වැඩසටහනේ දී පමණක් ණය ගැනීම සඳහා එහි ස්ථාපිත රාජ්‍ය බැංකු ශාඛාවෙතින් පුද්ගලයන් 1327 ලියාපදිංචිය ලබා ගෙන ඇත. ජංගම සේවය දිවයන පුරා ක්‍රියාත්මක කිරීමට සැලසුම් කර තිබේ.

 උසස් මාධ්‍ය සංස්කෘතියක් රට තුළ ස්ථාපිත කිරීම උදෙසා මාධ්‍යවේදීන් විසින් සිදු කරනු ලබන මෙහෙවර සහ ඔවුන්ගේ නිර්මාණශීලි දායකත්වය ඇගයීම සඳහා ජනාධිපති මාධ්‍ය සම්මාන උළෙල 2019 අප්‍රේල් මස 10 වන දින ප.ව 4.00ට කොළඔ බණ්ඩාරනායක අනුස්මරණ ජාත්‍යාන්තර සම්මන්‍ත්‍රණ ශාලාවේදී ජනාධිපති මෛත්‍රිපාල සිරිසේන මහතාගේ ප්‍රධානත්වයෙන් පැවැත්වීමට සියළු කටයුතු සූදානම් කර ඇති බව ජනමාධ්‍ය අමාත්‍යාංශයේ ලේකම් සුනිල් සමරවීර මහතා පැවසීය.

ඒ මහතා මේ බව ප්‍රකාශ කර සිටියේ අද පෙරවරුවේ ජනමාධ්‍ය අමාත්‍යාංශයේදී මාධ්‍ය ආයතන ප්‍රධානීන් සමඟ පැවති රැස්වීමක් සහ මාධ්‍ය වේදීන් සමඟ පැවති මාධ්‍ය හමුවකට එක් වෙමිනි.එහිදී වැඩිදුරටත් අදහස් දක්වමින් ලේකම්වරයා ප්‍රකාශ කර සිටියේ සමාජ වගකීමෙන් යුත් මාධ්‍ය කලාවක් බිහි කිරීම සඳහා ජනමාධ්‍යවේදීන්ගේ කුසලතා, හැකියාවන් හා සුවිශේෂී නිපුණතා ඇගයීම මෙම සම්මාන උළෙලේ මුඛ්‍ය පරමාර්ථය වන බවයි.
එමෙන්ම ජනමාධ්‍යවේදීන්ගේ විවිධ දක්ෂතා, කුසලතා, හැකියාවන් හා සුවිශේෂී නිපුණතා හඳුනාගනිමින් ඒවා ඇගයීමට ලක්කිරීම,වෘත්තීය මට්ටමේ මාධ්‍යවේදීන් බිහිකිරීම සඳහා පසුබිම නිර්මාණය කරනු වස් නිසි මග පෙන්වීම් ලබාදීම හා අභිපේ‍්‍රරණය කිරීම,සමස්ත ජනමාධ්‍ය ක්ෂේත‍්‍රය, හොඳින් දැනුම්වත් වූ සිවිල් සමාජයක් ගොඩනැගීම සඳහා සවිබල ගැන්වීම,ජනමාධ්‍යවේදීන් විසින් සමස්ත සමාජය වෙනුවෙන් හිතකර වූද, නිදහස් වූද, සංවර්ධනාත්මක දෘෂ්ටි කෝණයකින් යුතු වූද මාධ්‍ය සංස්කෘතියක් ගොඩනැගීම සඳහා පෙළඹවීම් කිරීම සහ සමස්ත ජනමාධ්‍ය ක්ෂේත‍්‍රය ආවරණය වන පරිදි කරනු ලබන කාර්ය සාධන ඇගයීම තුළින් පූර්ණ රාජ්‍ය අනුග‍්‍රහය ජනමාධ්‍යවේදීන්ට ලබාදීම මෙම ජනාධිපති මාධ්‍ය සම්මාන උළෙලේ ප්‍රධාන අරමුණු වේ.
ශ්‍රි ලාංකේය ඉතිහාසයේ ප්‍රථම වරට පැවැත්වෙන මෙම ජනාධිපති මාධ්‍ය සම්මාන උළෙලේදී පුවත්පත්,රේඩියෝ ,ටෙලිවිෂන් සහ වෙබ් අඩවි යන ක්ෂේත්‍ර හතර සදහා 2017 වසරේ ප්‍රතිභාව දැක්වු මාධ්‍යවේදින් සඳහා සම්මාන 47ක් පිරිනැමෙන අතර ජූරියේ විශේෂ සම්මාන 04ක් ද පිරිනැමීමට නියමිතය.
2018 ජුලි මස 13 වන දින පළ කරන ලද පුවත්පත් දැන්විමකින් කැඳවු අයදුම්පත් 1674 ක් අතුරින් මෙම විශිෂ්ටයින් තොරාගෙන ඇති අතර මේ සඳහා විද්වත් විනිශ්චය මණ්ඩලයට කිසිදු බලපෑමකින් තොරව තම විනිශ්චය ස්වාධීනව ලබාදීමට ජනමාධ්‍ය අමාත්‍යංශයේ පූර්ණ සහය ලැබුණු බව මෙම මාධ්‍ය සාකච්ඡාවට සහභාගී වූ ජනාධිපති මාධ්‍ය සම්මාන උළෙලේ මෙහෙයුම් කමිටු සාමාජික මහාචාර්ය පැක්ට්‍රික් රත්නායක මහතා පැවසීය.
මෙම අවස්ථාව සඳහා ජනමාධ්‍ය අමාත්‍යාංශයේ අතිරේක ලේකම්(පාලන)රමණි ගුණවර්ධන මහත්මිය,ප්‍රවෘත්ති දෙපාර්තමේන්තුවේ ප්‍රවෘත්ති අධ්‍යක්ෂ ජනරාල් නාලක කළුවැව මහතා,සියළුම මාධ්‍ය ආයතන ප්‍රධානීන් ඇතුළුව අමාත්‍යාංශයේ උසස් නිලධාරීන් රැසක් සහභාගී විය.

දසවන යොවුන් පුර සමාප්ති උලෙළ ඊයේ (31) අති උත්කර්ෂවත් ලෙසින් වීරවිල පශු සම්පත් මණ්ඩල භූමි පරිශ්‍රයේදී පැවැත්විය.

එම අවස්ථාවට ප්‍රධාන ආරධිත අමුත්තා ලෙස අගමැති රනිල් වික්‍රමසිංහ මහතා සහභාගී වූයේය. එහිදී අදහස් දක්වමින් අගමැතිතුමා ප්‍රකශ කළේ, හම්බන්තොට වරාය මේවන විටත් වෙළද මධ්‍යස්ථානයක් බවට පත් වී ඇති බවයි. එය ඊයේ(31) දින පෙරවරුවේ සිදුකළ හම්බන්තොට වරාය නිරීක්ෂණ චාරිකාවේදී හොඳින් දැකගත හැකි වූ බව අග්‍රාමාත්‍ය රනිල් වික්‍රමසිංහ මහතා යොවුන් පුර සමාප්ති උළෙල අමතමින් ප්‍රකාශ කළේය.

කැබින්ට් පත්‍රිකාවක් ඉදිරිපත් කරමින් පාර්ලිමේන්තුවට ඉදිරිපත් කළ අවිවාහක තරුණ තරුණියන්ට ඉඩම් බෙදා දීමේ හා ගොවි ජනපද ඇති කිරීම වැඩසටහන ද ක්‍රියාත්මක කිරීමට කටයුතු දියත් කරන බවත් යොවුන් පුර වැසියන් අමතමින්
අගමැතිතුමා පැවසීය.
මීට අමතරව හම්බන්තොට දිස්ත්‍රික්කයේ එල්.එම්.ජී. විදුලි බලාගාරයක් හා අක්කර 5000ක විශාල වෙලෙඳ කලාපයක්ද ඉදි කිරීමට නියමිත බවත් අගමැතිතුමා පැවසීය.

තරුණ්‍යයට අපූරු අත්දැකීම් රාෂියක් ලබාදෙමින් තරුණ ජන ජීවිතයට ඉමහත් වටිනාකමක් එක් කිරීමට අගමැතිතුමා ඇති කළ යොවුන් පුර සංකල්පය හේතු වූ බව නිවාස ඉදිකිරීම් හා සංස්කෘතික කටයුතු අමාත්‍ය සජිත් ප්‍රේමදාස මහතා යොවුන් පුර සමාප්ති උළෙලේදී පැවසුවේය.
මෙවර යොවුන් පුර භූමිය වන වීරවිල පශු සම්පත් මණ්ඩල භූමියෙහි ලක්ෂ 3500ක පිරිවැයකින් ඉදි කිරීමට නියමිත නවීන පන්නයේ ක්‍රීඩා පිටියක්, මීටර් 400ක දිගින් යුත් පිහිනුම් තටාකයක් හා ගෘහස්ථ ක්‍රීඩාංගනයට මුල් ගල තැබීමට ක්‍රීඩා අමත්‍ය හරීන් ප්‍රනාදු මතාගේ ප්‍රධානත්වයෙන් සිදු විය. එය මෙවර වීරවිර යොවුන් පුර ප්‍රතිලාභයක් ලෙස අමාත්‍ය සජිත් ප්‍රේමදාස මහතා පැවසීය.
මීට අමතරව අග්‍රාමාත්‍ය තුමාගේ අමාත්‍යාංශ ප්‍රතිපාදන ලක්ෂ 7500 ක් වෙන් කරමින් මෙවර යොවුන් පුර භූමියෙහි නවීන පන්නයේ යොවුන් සංවර්ධන නිකේතනයක් ඉදි කිරීමට ද කටයුතු කරයි. ඒ සදහා ලක්ෂ 500ක මූලික ප්‍රතිපාදන මේ වනවිටත් වෙන් කර ඇති බවත් අමාත්‍යවරයා තව දුරටත් කීය.
මෙම අවස්ථවේදී වරාය හා දක්ෂිණ සංවර්ධන අමාත්‍ය සාගල රත්නායක මහතා ප්‍රකාශ කළේ හම්බන්තොට දිස්ත්‍රික්කයේ අනාගත සංවර්ධනය උදෙසා යොවුන් පුරය ශක්තියක් වූ බවයි.
දින පහක් පුරාවට ජාති භේදයකින් තොරව සහෝදරතවය වෙනුවෙන් සෑම දිස්තක්කයකින්ම පැමිණි තරුණ තරුණියන් කටයුතු කළ බවත් කිසිදු චෝදනාවක් නොමැතිව සමාප්තිය දක්වාම සියලු දෙනා එක්ව කටයුතු කළ බවද ජාතික තරුණ සේවා සභාවේ සභාපති නීතිඥ එරන්ද වැලිඅංගේ මහතා පැවසීය.
යොවුන් පුර පුරපති සසංක බදුගේ ප්‍රකාකළ පරිදි යොවුන් පුරය වීරවිල තාරුණ්‍යයට නව අරුතක් එක් කිරීමට විශාල දායකත්වයක් සපයා දුන් බවයි.
එමෙන්ම යොවුන් පුර 2019ට සමගාමීව සමරු මුද්දරයක් හා සමරු ලිපිකවරය තැපැල්පති රංජිත් ආරියරත්න මහතා විසින් අග්‍රාමාත්‍ය රනිල් වික්‍රමසිංහ මහතා වෙත පිළිගැන්වීමද මෙහි තවත් සුවිශේෂී අවස්ථාවක් විය.
මෙම අවස්ථාවට ධීවර රාජ්‍ය අමාත්‍ය දිලීප් වෙදආරච්චි, නගර සභා හා ප්‍රාදේශීය සභා මන්ත්‍රීවරුන් අතුලු සම්භාවනීය අමුත්තන් රැසක් සම්බන්ධ වූහ.

නිතීවිරෝධි මත්ද්‍රව්‍ය මුලිනුපුටා දැමීමේ ඉලක්කගත සැලැස්ම මේ වන විට සාර්ථකව ක්‍රියාත්මක බව ජනපති පවසයි.

මෙරට ආරක්ෂක අංශ මඟින් අත්අඩංගුවට ගැනුණු අධිකරණ ක්‍රියාවලිය අවසන් කළ කොකේන් කිලෝග්‍රෑම් 769ක් ප්‍රසිද්ධියේ විනාශ කිරීම ජනාධිපති ගරු මෛත්‍රීපාල සිරිසේන මැතිතුමාගේ නිරික්ෂණය යටතේ අද (01) පෙරවරුවේ කැලණිය මගුරුවෙල පිහිටි සුරවීර ගබඩා සංකීර්ණයේ දී සිදු කෙරිණි.
ජනාධිපති ගරු මෛත්‍රීපාල සිරිසේන මැතිතුමාගේ නියමයෙන් පොලිස් මත්ද්‍රව්‍ය නාශක කාර්යාංශයේ මූලිකත්වයෙන් අන්තර්ජාතික ප්‍රමිතීන්ට අනුව මෙම විනාශ කිරීම සිදු විය.
කොළඹ ප්‍රධාන මහේස්ත්‍රාත්වරියගේ සහ ගල්කිස්ස ප්‍රධාන මහේස්ත්‍රාත්වරයාගේ පූර්ණ අධීක්ෂණය යටතේ පොලිස් මත්ද්‍රව්‍ය නාශක කාර්යාංශයේ, අන්තරායකර ඖෂධ පාලක මණ්ඩලයේ සහ රස පරික්ෂක දෙපාර්තමේන්තුවේ නිලධාරින්ගේ සහභාගිත්වයෙන් මෙම ක්‍රියාවලිය සිදු කෙරුණු අතර, මෙම අවස්ථාව සජීවිව මහජනතාවට දැක බලා ගැනීමට ද අවස්ථාව උදාකර තිබුණි.
නිසි පරික්ෂාවන්ගෙන් අනතුරුව මත්කුඩු තොග රසායනික ද්‍රව්‍ය අඩංගු ටැංකිවල දමා දියකර විනාශ කිරීම සිදු වූ අතර, එසේ රසායනිකයේ දිය කළ මත්කුඩු ටැංකි පොලිස් ආරක්ෂාව සහිතව අද දිනයේ ම පුත්තලම පිහිටි සිමෙන්ති සංස්ථා පරිශ්‍රයට රැගෙන ගොස් අධිතාප උදුන්වල දමා වාෂ්ප කිරීම සිදු කෙරේ.
පොලිසිය මගින් අත්අඩංගුවට ගන්නා මත්ද්‍රව්‍ය සඳහා කුමක් සිදුවන්නේ ද යන්න ජනතාව තුළ ඇති ගැටලුවට විසඳුම් ලබාදෙමින් ජනාධිපතිතුමාගේ උපදෙස් පරිදි මෙම වැඩපිළිවෙළ ක්‍රියාත්මක ය.
අද දින ප්‍රසිද්ධියේ විනාශ කිරීම සිදු වූයේ මෙරට තුළ දී අත්අඩංගුවට ගත් මත්කුඩු වන අතර 2016 ජූනි 21 වන දින ඔරුගොඩවත්ත, බහලුම් අංගනයේ දී සොයාගත් කොකේන් කි.ග්‍රැ 301 යි ග්‍රෑම් 235ක්, 2016 නොවැම්බර් 09 වන දින කැලණිය පෙතියාගොඩ ප්‍රදේශයේ දී සොයාගත් කොකේන් කි.ග්‍රැම් 31 යි ග්‍රෑම් 844 ක් සහ 2016 නොවැම්බර් 24 වන දින ඔරුගොඩවත්ත, රේගු අංගනයේ දී අත්අඩංගුවට ගත් කොකේන් කි.ග්‍රැම් 219 යි ග්‍රෑම් 950ක් සහ 2018 ජූනි 19 වන දින රත්මලාන ආර්ථික මධ්‍යස්ථානයේ දී අත්අඩංගුවට ගත් කොකේන් කි.ග්‍රෑම් 216 යි ග්‍රෑම් 435 ක් මෙලෙස විනාශ කරන ලදී.
මෙම අවස්ථාව නිරික්ෂණය කිරිමෙන් අනතුරුව අදහස් දැක්වූ ජනාධිපති ගරු මෛත්‍රිපාල සිරිසේන මැතිතුමා ප්‍රකාශ කළේ නීතිවිරෝධි මත්ද්‍රව්‍ය ජාවාරම මුලිනුපුටා දැමීමේ ඉලක්කගත වැඩපිළිවෙළ මේ වන විට සාර්ථකව ක්‍රියාත්මක බවයි.
රටට පැමිණෙන නිතීවිරෝධි මත්ද්‍රව්‍ය හඳුනාගැනීමට ලොව දියුණු රටවල් විසින් භාවිත කරනු ලබන අධිතාක්ෂණික උපකරණ ද ඉදිරි මාසයේ දී ශ්‍රී ලංකාවට ගෙන්වා ගැනීමට තමා මේ වන විට පියවර ගෙන තිබෙන බව ජනාධිපතිතුමා සඳහන් කළේය.
එමෙන්ම මත්ද්‍රව්‍ය ජාවාරම්කරුවන්ට මරණීය දණ්ඩනය ලබාදීම ද ඉදිරියේ දී ක්‍රියාත්මක කෙරෙන බව ජනාධිපතිතුමා කියා සිටියේ ය.
අමාත්‍ය තලතා අතුකෝරළ, රාජ්‍ය අමාත්‍ය අජිත් මාන්නප්පෙරුම, රන්ජන් රාමනායක, පාර්ලිමේන්තු මන්ත්‍රී මහින්ද අමරවීර, ලසන්ත අලගියවන්න, චතුර සේනාරත්න, බස්නාහිර පළාත් ආණ්ඩුකාර අසාද් සාලි යන මහත්වරුන් ද, පොලිස්පති පූජිත ජයසුන්දර මහතා ඇතුළු ආරක්ෂක අංශ ප්‍රධානීහු මෙම අවස්ථාවට එක්ව සිටියහ.

 රට පුරා ග්‍රාමීය පාලම් 200 ක් ඉදිකිරීම සඳහා යුරෝ මිලියන 50.67 ක් ණය හා ප්‍රදාන වශයෙන් ලබාදීමට නෙදර්ලන්ත රජය එකඟතාවය පළකර ඇත.

මෙම ආධාර ලබාගැනීම සම්බන්ධයෙන් නෙදර්ලන්තයේ කෝපරේටිව් රබෝ බැංකුව යූ.ඒ. (The Cooperatieve Rabobank U.A. of the Netherlands) සමඟ සාකච්ඡා පැවැත්වීමට මුදල් අමාත්‍ය මංගල සමරවීර මහතා කළ නිර්දේශයට අමාත්‍ය මණ්ඩලයේ අනුමැතිය ලැබී ඇත.
මෙම ව්‍යාපෘතිය සඳහා වැයවන මුදලින් 75% ක් පමණ වන යුරෝ මිලියන 42 ක් සහනදායී මූල්‍ය ණය වශයෙන් රබෝ බැංකුවෙන් ලබාගැනීමට නියමිත අතර ඉතිරි යුරෝ මිලියන 14 නෙදර්ලන්ත රජයේ සංවර්ධනය හා බැඳුණු යටිතල පහසුකම් කාර්ය ඒකකය මගින් ප්‍රදානයක් ලෙස ලැබීමට නියමිතය.
රටේ ප්‍රධාන සංවර්ධන ක්‍රියාදාමයන්හි පූර්ණ ප්‍රතිලාභ, දුෂ්කර ගම්මාන සඳහාද ලබාදීමේ පියවරක් ලෙස ග්‍රාමීය පාලම් ඉදිකිරීමේ ව්‍යාපෘතියක් මීට වසර කිහිපයකට පෙර රජය විසින් ආරම්භ කරන ලදී. එමඟින්, අඩු පහසුකම් සහිත ගම්මාන බොහොමයකට නිසි ප්‍රවාහන පහසුකම් සැපයීමට හැකියාව ලැබී තිබේ.
මෙම ග්‍රාමීය පාලම් 200 ඉදිකිරීමේ ස්ථාන, අභ්‍යන්තර හා ස්වදේශ කටයුතු සහ පළාත්සභා හා පළාත් පාලන අමාත්‍යාංශය විසින් දැනටමත් හඳුනාගෙන ඇත.

 දහවැනි යොවුන් පුරය වීරවිල පශු සම්පත් සංවර්ධන මධ්‍යස්ථානයේදී ඊයේ (27) ආරම්භ විය. අගමැති රනිල් 1984 වසරේදී වික්‍රමසිංහ මහතා තරුණ කටයුතු ඇමැතිවරයාව සිටියදී ඒ මහතාගේ සංකල්පයකට ආරම්භ කෙරුණු යොවුන් පුරය ජාතික තරුණ සේවා සභාව, ජාතික ප්‍රතිපත්ති, ආර්ථික කටයුතු, නැවත පදිංචි කිරීම් හා පුනරුත්ථාපන උතුරු පළාත් සංවර්ධන සහ යෞවන කටයුතු අමාත්‍යාංශය සහ ශ්‍රී ලංකා යෞවන සමාජ සම්මේලනය එක්ව සංවිධාන කරනු ලබයි.

මාර්තු 27 අද සිට 31 දක්වා පැවැත්වෙන මෙම යොවුන් පුරයට ලංකාවේ දස දෙසින්ම තරුණ තරුණියන් සහභාගී වෙයි
මෙම යොවුන්පුරය සදහා යෞවන සමාජ සාමාජික සාමාජිකාවන් 6900ක්ද විදේශ තරුණ තරුණියන් 100ක්දයෞවන තිළිණලාභීන් සහ අපේක්ෂකයින් 100ක්,බාලදක්ෂයින් 250ක්,බාලදක්ෂිකාවන් 100ක්,ශිෂ්‍යභට බලකාය 100ක්ද කොතලාවල ආරක්ෂක විශ්ව විද්‍යාලයේ 100ක්,ශිෂ්‍ය පාර්ලිමේන්තු හා ශිෂ්‍යනායක 100ක්,වෘත්තීය පුහුණුලාභීන් 500ක්ද වශයෙන් 8300 ක පිරිසක් මෙම යොවුන්පුරට සහභාගිවීමට කටයුතු සැලසුම් කර ඇත.දකුණු ආසියාවේ විශාලතම තරුණ ජාලය පිහිටා ඇත්තේ තරුණසේවා සභාව සතුවයි එහි එක් අංශක් ලෙස මෙම යොවුන් පුර වැඩසටහන පෙන්වා දිය හැක.යොවුන් පුරය හරහා තරුණ තරුණියන්ට නායකත්වය පිළිබදව අත්දැකීම් ලබා ගනිමින් තම පෞරුෂ වර්ධනය ක්‍රීඩා සංස්කෘතික හා කලා අධ්‍යාපනික ව්‍යවසායකත්ව හා රැකියා අවස්ථා ලබාදීම සදහා වූවැඩසටහන් රාශියක් නිර්මාණය කොට ඇත.
මෙමවර යොවුන් පුරයේ අරමුණ වන්නේ ජාතික සංහිදියාව හා සම්මුතිවාදය පිළිබද අවබෝධයක් අත්දැකීම් හුවමාරු කර ගැනීමට අවස්ථාව ලබාදීම,අන්‍යෝන්‍ය අවබෝධය වර්ධනයට උපකාරී වන ලෙසින් අධ්‍යාපනික, ක්‍රීඩා,සංස්කෘතික ,හා විනෝද වැඩසටහන් සාමුහිකත්වයෙන් සහ සහජීවනයෙන් යෙදීමට අවස්ථාව ලබා දීම,තරුණ සංවර්ධනයේදි තොරතුරු තාක්ෂණය,මාධ්‍ය භාවිතය පුළුල් කිරිම,ජාතික ප්‍රතිපත්ති සහ සංවර්ධනය පිළිබද තරුණ තරුණියන් අතර සංවාද ඇතිකිරිම තුළින් තරුණ අදහස් හා යෝජනා ලබා ගැනීම.,මත්ද්‍රව්‍ය නිවාරණ ජාතික වැඩ සටහනෙහි නියමුවන් ලෙස කටයුතු කිරීමට මෙම කදවුරු වැසියන් සූදානම් කිරිම,ග්‍රාමීය සංවර්ධන කටයුතු වලදි තරුණ තරුණියන් සහභගි කරවා ගැනිම ද වේ.

 කොළඹ බණ්ඩාරනායක ජාත්‍යන්තර සම්මන්ත්‍රණ ශාලාවේ පැවැත්වෙන උසස් අධ්‍යාපනයේ තත්ත්ව ආරක්ෂණය සඳහා වන නියෝජිතායතනයේ ජාත්‍යන්තර ජාලය සඳහා වන 15 වැනි ද්විවාර්ෂික සම්මන්ත්‍රණයේ INQAAHE දෙවන දිනය වන ඊයේ (26) දින සමාරම්භක අවස්ථාව ජනාධිපති ගරු මෛත්‍රීපාල සිරිසේන මැතිතුමාගේ ප්‍රධානත්වයෙන් පැවැත්විණි.

“තත්ත්ව ආරක්ෂණය” යෝග්‍යතා හා පිළිගැනීම ගෝලීයකරණය වු ලෝකය තුළ විශ්වාසය නංවාලීම, යන තේමාව යටතේ මෙම සම්මන්ත්‍රණය ඊයේ ආරම්භ කෙරුණු අතර මාර්තු 28 වන දා දක්වා එය කොළඹ බණ්ඩාරනායක ජාත්‍යන්තර සම්මන්ත්‍රණ ශාලාවේ දී පැවැත්වේ. උසස් අධ්‍යාපන අමාත්‍යාංශය සහ විශ්වවිද්‍යාල ප්‍රතිපාදන කොමිෂන් සභාව එක්ව එය සංවිධානය කරයි.
INQAAHE යනු උසස් අධ්‍යාපන ක්ෂේත්‍රයේ තත්ත්ව ආරක්ෂණය පිළිබඳ මූලධර්ම හා භාවිතය පිළිබඳ ක්‍රියා කරන ආයතන 300කින් පමණ සැදුම්ලත් ජාත්‍යන්තර සංවිධානයකි. එහි ද්විවාර්ෂික සමුළුවේ මෙවර සත්කාරකත්වය ශ්‍රී ලංකා විශ්වවිද්‍යාල ප්‍රතිපාදන කොමිෂන් සභාව විසින් දරනු ලැබේ.
රටවල් රැසක විශ්වවිද්‍යාල නියෝජනය කරමින් මහාචාර්යවරුන්, ආචාර්යවරුන් සහ විශේෂ නියෝජිතයන් මෙම සමුළුවට එක්ව සිටී.
ඔවුන් වෙනුවෙන් සමරු තිළිණ ප්‍රදානයක් ද මෙහිදී ජනාධිපතිතුමා අතින් සිදු කෙරිණි.
විශ්වවිද්‍යාල ප්‍රතිපාදන කොමිෂන් සභාවේ සභාපති මහාචාර්ය මොහාන් ද සිල්වා මහතා විසින් පිළිගැනීමේ දේශනය සිදු කළ අතර උසස් අධ්‍යාපනයේ තත්ත්ව ආරක්ෂණය සඳහා වන නියෝජිතායතනයේ සභාපති ආචාර්ය Susanna Karakhanyan මහත්මිය ද අදහස් දැක්වූවාය.
අමාත්‍ය රවුෆ් හකීම් මහතා ඇතුළු ආරාධිත පිරිසක් සමාරම්භක අවස්ථාවට එක් විය.

 ආර්ථික සංවර්ධනය සඳහා සෘජු දායකත්වයන් සැපයීම මෙන්ම විවිධ ආර්ථික අංශයන්හි ඵලදායීතාවය හා කාර්යක්ෂමතාවය නැංවීම හරහා වක්‍රාකාර ප්‍රතිඵලයන් ද ඇති කරන බැවින් අන්තර් සම්බන්ධතාවයන් සහිත අධිවේගී මාර්ග ජාලය ද ඇතුළුව යටිතල පහසුකම් සංවර්ධනය කිරීම සඳහා ශ්‍රී ලංකා රජය විසින් ඉහළ වැදගත්කමක් ලබා දී තිබේ. දැනට පවතින අධිවේගී මාර්ග ජාලයට ඌන පූර්ණයක් වශයෙන් කොළඹ නගරය, කුරුණෑගල සහ මහනුවර නගරයන් සමග සම්බන්ධ කිරීමේ අරමුණ ඇතිව මධ්‍යම අධිවේගී මාර්ග ව්‍යාපෘතිය යෝජනා වී තිබේ.

කඩවත අන්තර් හුවමාරුව මගින් පිටත වටරවුම් අධිවේගී මාර්ගය අදියර 11 හා අදියර 111, කොළඹ - කටුනායක අධිවේගී මාර්ගය හා මධ්‍යම අධිවේගී මාර්ගය යන අධිවේගී මාර්ග හතර සම්බන්ධ වන කඩවත නගරයෙන් මධ්‍යම අධිවේගී මාර්ගයේ පළමු අදියර ආරම්භ වේ. ආර්ථික වශයෙන් වැදගත් වන වරාය, ගුවන්තොටුපළ හා වාණිජමය නගර සහ විවිධ පළාත් සම්බන්ධ කරමින් හම්බන්තොට සිට කටුනායක හෝ හම්බන්තොට සිට නුවර දක්වා වන නොබිඳුනු සම්බන්ධතාවයක් මෙමගින් නිර්මාණය කරනු ඇත. සමස්ථ අධිවේගී මාර්ග ජාලයෙහි අන්තර් පළාත් සම්බන්ධතාවය හා කාර්යක්ෂමතාවය මෙම යෝජිත අධිවේගී මාර්ගය මගින් වැඩිදියුණු කරනු ඇත.
ඒ අනුව, ශ්‍රී ලංකා රජය හා චීන රජය අතර ශ්‍රී ලංකාවේ යටිතල පහසුකම් සංවර්ධන ක්ෂේත්‍රයෙහි මූල්‍යමය සහයෝගීතාවය ශක්තිමත් කරමින්, කඩවත සිට මීරිගම දක්වා වන මධ්‍යම අධිවේගී මාර්ග ව්‍යාපෘතියෙහි පළමු අදියර සඳහා කොන්ත්‍රාත් මුදලින් 85%ක් ආවරණය වන පරිදි ඇ. එ. ජ. ඩො. මිලියන 989ක් වන සහනදායී ණය මුදලක් ලබා දීමට චීන අපනයන ආනයන බැංකුව එකඟ වී ඇත. ව්‍යාපෘතියේ ඇස්තමේන්තුගත මුළු වියදම (පිරිවැය) ඇ. එ. ජ. ඩො. මිලියන 1,164කි. තවදුරටත්, මෙම ණය මුදල චීන අපනයන ආනයන බැංකුව විසින් ශ්‍රී ලංකාව සඳහා අනුමත කරන ලද විශාලතම තනි ණය මුදල වේ.
දේශීය වාණිජ බැංකුවල මූල්‍යමය දායකත්වයෙන් මධ්‍යම අධිවේගී මාර්ග ව්‍යාපෘතියෙහි දෙවන අදියර ක්‍රියාත්මක කිරීම දැනටමත් ආරම්භ කර ඇති බැවින්, චීන අපනයන ආනයන බැංකුව මඟින් ලබා දෙනු ලබන මෙම ණය පහසුකම කුරුණෑගල දක්වා අධිවේගී මාර්ග ඡාලයෙහි සම්බන්ධතාවය තහවුරු කරමින් කඩවත සිට මීරිගම දක්වා වන කොටස වේගවත්ව ක්‍රියාත්මක කිරීමට පහසුකම් සලසනු ඇත.
ඒ අනුව, ශ්‍රී ලංකා රජය වෙනුවෙන් මුදල් අමාත්‍යාංශ ලේකම් ආචාර්ය ආර්. එච්. එස්. සමරතුංග මහතා සහ චීන අපනයන ආනයන බැංකුව වෙනුවෙන් ශ්‍රී ලංකාවේ පිහිටි චීන තානාපති කාර්යාලයේ, මහජන චීන සමූහාණ්ඩුවේ තානාපති, ගරු චෙනග් ෂුයුආන් (H E Cheng Xueyuan) මහතා විසින් 2019 මාර්තු මස 22 වන දින කොළඹ 01, මුදල් අමාත්‍යාංශයේදී ණය ගිවිසුම අත්සන් තබන ලදී.

ඩී. එස්. සේනානායක ප්‍රතිපත්ති ඉදිරියට ගෙන යන්න කැප වෙනවා - අගමැති

ශ්‍රී ලංකාවේ ස්වාධීනත්වය, ප්‍රජාතන්ත්‍රවාදය රකිමින් ජාත්‍යන්තරය සමඟ මිත්‍රත්වයෙන් කටයුතු කළ දිවංගත මහාමාන්‍ය ඩී. එස්. සේනානායක මහතාගේ ප්‍රතිපත්ති ඉදිරියට ගෙන යෑමට කැපවීමෙන් ක්‍රියාකරන බව අගමැති රනිල් වික්‍රමසිංහ මහතා පැවසීය.
යුද්දාධිකරණය ශ්‍රී ලංකාවට අවැසි නැති බවත් ජාත්‍යන්තරය පිළිගත් අධිකරණ ක්‍රමවේදයක් අප රට සතු බවත් අපේ විදේශ ඇමැති තිලක් මාරපන මහතා ජිනීවාහිදී කළ ප්‍රකාශය ජාත්‍යන්තරය පිළිගත් බව‍ පෙන්වා දුන් අගමැතිවරයා සෙසු රටවල් කීපයක් ඉදිරිපත් කළ යෝජනා නිතරඟයෙන් රැක ගනිමින් සම්මත කර ගැනීමට අපට හැකි වූ බවද සිහිපත් කළේය.
අගමැතිවරයා මේ බව ප්‍රකාශ ක‍ළේ ඉකුත් 22දා කොළඹ නිදහස් චතුරස්‍ර පරිශ්‍රයේ පිහිටි ඩී. එස්. සේනානායක පිළිරුව අභියසදී පැවැත්වූ ශ්‍රී ලංකාවේ ප්‍රථම අග්‍රාමාත්‍ය දිවංගත මහාමාන්‍ය ඩී. එස්. සේනානායක ශ්‍රීමතාණන්ගේ හැටහත් වැනි ගුණ සමරු උළෙලේ ප්‍රධාන ආරාධිත අමුත්තා ලෙස සහභාගී වෙමිනි.

 ව්‍යාපාරිකයින් ලක්ෂයක් බිහි කිරීමේ අරමුණින් අඩු පිරිවැයකින් ප්‍රාග්ධනය ලබාදීම සඳහා ආරම්භ කරන ලද එන්ටප්‍රයිස් ශ්‍රී ලංකා වැඩසටහන ජනතාව වෙතට ගෙන ගොස් ක්‍රියාත්මක කිරීම සඳහා අරඹන ලද ජංගම සේවාව සාර්ථක වී ඇත. 

මුදල් අමාත්‍ය මංගල සමරවීර මහතාගේ ප්‍රධානත්වයෙන් මාර්තු 23 සහ 24 දෙදින වැලිගමදී පවත්වන ලද ජංගම සේවාවට 7000කට අධික ජනතාවක් සහභාගී වූ අතර එයින් පුද්ගලයන් 1327 දෙනෙකු ණය ලබා ගැනීම සඳහා සුදුසුයැයි රාජ්‍ය බැංකු මගින් හඳුනා ගෙන ඇත. ලංකා බැංකුව මගින් 620 දෙනෙකු ණය ලබා ගැනීම සඳහා සුදුස්සන් බවට ලියාපදිංචි කරන ලද අතර ප්‍රාදේශීය සංවර්ධන බැංකුව මගින් 387දෙනෙකු මහජන බැංකුව මගින් 300 දෙනෙකුද ලියාපදිංචි කර ඇත.
රජය මගින් සහන පොළී යටතේ රුපියල් මිලියන 750 දක්වා විවිධ ණය යෝජනා ක්‍රම ඔස්සේ ව්‍යාපාර හා කර්මාන්තවලට අවශ්‍ය ණය ලබා දෙන නමුදු ණයලාභීන් මේ සඳහා තම ව්‍යාපාර යෝජනා (Business Proposal) බැංකු වෙත ඉදිරිපත් කිරීම අත්‍යවශ්‍ය කරුණකි. බොහෝ ණයලාභීන්ට ව්‍යාපාර යෝජනා සකස් කිරීමට අවශ්‍ය දැනුම හා අවබෝධය නොමැතිකමින් ණය ලබා ගැනීමේ දුෂ්කරතාවයන්ට මුහුණ දීමට සිදුවේ. මෙම එන්ටප්‍රයිස් ශ්‍රී ලංකා ජංගම සේවය මගින් මේ සඳහා වැඩ පිළිවෙළක් යොදා ඇති අතර විශ්ව විද්‍යාල විද්‍යාර්ථීන්ගේ සහයෝගයෙන් ණයලාභින් වෙනුවෙන් මෙම ජංගම සේවයේ දී ව්‍යාපාර යෝජනා 45ක් සකස්කර දීමට හැකිවීම විශේෂත්වයකි.
දකුණු පළාත සංචාරක ව්‍යාපාරයට ප්‍රචලිත හෙයින් රජය මගින් හඳුන්වා දී ඇති සංචාරක සත්කාර සේවා සඳහා ද 450ක පමණ පුද්ගලයින් ලියාපදිංචි වී ඇත. එයින් 50කට පමණ එම ස්ථානයේදීම අනුමැතිය ලැබිණි. සෙසු ණය ඉල්ලුම්කරුවන්ට සංචාරක සංවර්ධන අධිකාරියේ නිලධාරින් විසින් කරනු ලබන ක්ෂේත්‍ර පරික්ෂාවෙන් පසුව අනුමැතිය හිමිවනු ඇත.
විවිධ ව්‍යාපාර සඳහා අවශ්‍ය අනුමැතිය ලබා ගත යුතු සංචාරක සංවර්ධන මණ්ඩලය, අපනයන සංවර්ධන මණ්ඩලය, කාර්මික සංවර්ධන මණ්ඩලයේ කාර්යාල ද මෙම ජංගම සේවාව තුළ ක්‍රියාත්මක විය.
ණය අපේක්ෂා කරන්නන් හට බැංකු වෙත ඉදිරිපත් කළ යුතු සියලු ලිපි ලේඛණ මෙහිදී සකස් කර ගත හැකි වීම ද විශේෂත්වයක් විය.
එන්ටප්‍රයිස් ශ්‍රී ලංකා වැඩසටහන යටතේ ක්‍රියාත්මක මෙම ණය යෝජනා වැඩසටහන මගින් 2018 වසර තුළ රුපියල් මිලියන 60,000ක් වටිනා ප්‍රාග්ධන 39000ක් පමණ පුද්ගලයින් වෙත ණය වශයෙන් ලබාදී ඇත. 2019 වසරේ දී එම වැඩසටහන තව දුරටත් පුළුල් කරමින් ලබාදෙන ණය පොලිය ගෙවීමට පමණක් රුපියල් මිලියන 6100ක් වෙන්කර ඇත.
එන්ටප්‍රයිස් ශ්‍රී ලංකා ණය යෝජනා ක්‍රමය යටතේ සංවර්ධනය ඉලක්ක කර ගනිමින් ක්ෂේත්‍ර ගණනාවක් ආවරණය කරමින් ණය යෝජනා හඳුන්වා දී ඇති අතර ඉන් කෘෂිකර්මාන්තය,සුළු හා මධ්‍ය පරිමාණ කර්මාන්ත, නිවාස ඉදිකිරීම් හා රැකවරණ ණය යෝජනා ක්‍රම ප්‍රධාන වේ.
එන්ටප්‍රයිස් ශ්‍රී ලංකා වැඩසටහන මගින් ක්‍රියාත්මක මෙම ණය ‍යෝජනා ක්‍රමය මගින් බිහිවන නව ව්‍යාවසායක ප්‍රජාව හරහා රටෙහි සංවර්ධනය දියණු කිරීම බලාපොරොත්තු වන අතර ඉන් ව්‍යවසායකයන් ලක්ෂයක් බිහි කිරීමට මුදල් අමාත්‍යාංශය සැලසුම් කර තිබේ.