2021 වර්ෂයට අදාළ අධ්‍යාපන පොදු සහතික පත්‍ර උසස් පෙළ විභාගයට සහ පහ ශ්‍රේණිය ශිෂ්‍යත්ව විභාගයට අයදුම් කිරීමේ කාලසීමාව සැප්තැම්බර් 15 දක්වා දීර්ඝ කෙරේ.
2021 වර්ෂයට අදාළ අධ්‍යාපන පොදු සහතික පත්‍ර උසස් පෙළ විභාගයට සහ පහ ශ්‍රේණිය ශිෂ්‍යත්ව විභාගය සඳහා මෙතෙක් අයදුම් නොකළ ශිෂ්‍ය ශිෂ්‍යාවන් සඳහා, අයදුම් කිරීමේ කාලසීමාව සැප්තැම්බර් 15 දක්වා දීර්ඝ කර ඇති බව, විභාග කොමසාරිස් ජනරාල් සනත් පූජිත මහතා පවසයි
පවතින කෝවිඩ් වසංගත තත්ත්වය මත විදේශීය සංචාරකයින් මෙරටට නොපැමිණීමෙන් 90% කින් පමණ පහළ ගොස් හානි වූ ලක්සල අලෙවි ආදායම නව ව්‍යාපාරික සැලැස්මක් යටතේ පූර්ණය කර ගැනීම හා දේශීය නිෂ්පාදකයන්ට ශක්තිය සැපයීම මෙහි මූලික අරමුණයි.
ඒ අනුව බතික්,අත්යන්ත්‍ර,රෙදි හා දේශීය ඇඟලුම් නිෂ්පාදන රාජ්‍ය අමාත්‍යංශයෙහි පූර්ණ සම්බන්ධීකරණය හා දායකත්වය යටතේ ශ්‍රී ලංකා හස්ත කර්මාන්ත මණ්ඩලය "ලක්සල" ආයතනය හා "බූම් ලංකා බතික් ඇන්ඩ් ගිෆ්ට්ස් එල්.එල්.සී ආයතනය ( සිලෝන් ගැලරි) යන වරලත් නියෝජිත ආයතනය සමග ව්‍යාපාරික ගිවිසුම ඊයේ (26) තුම්මුල්ලෙහි පිහිටි "ලක්සල" සභාපති කාර්යාලයේදී අත්සන් තැබීය.
"ලක්සල" සන්නාමය යටතේ මෙරට පාරම්පරික හස්ත කර්මාන්ත නිර්මාණ ශිල්පීන්ගේ භාණ්ඩ ඇතුළුව බතික්,අත්යන්ත්‍ර,රෙදිපිළි හා ශ්‍රී ලාංකීය තේ, කෝපි, කුළුබඩු, ආයුර්වේද නිෂ්පාදන, කාබනික ආහාර වර්ග හා දේශීය රූපලාවන්‍ය භාණ්ඩ නිෂ්පාදන ඇමරිකා එක්සත් ජනපදයේ "ෆ්ලොරිඩා"හි ආරම්භ කරනු ලබන එම වරලත් අලෙවිසැල මගින් ප්‍රවර්ධනය කිරීමට නියමිතය.
තවද මෙවැනි "ලක්සල" අලෙවි ප්‍රදර්ශනාගාර 50ක් ඇමරිකාවේ අනෙකුත් ප්‍රාන්ත තුලද ස්ථාපිත කිරීමට සියළු කටයුතු සූදානම් කර අවසන්ය.එමෙන්ම "ලක්සල" නව කළමනාකාරීත්ව ව්‍යාපාරික සැලැස්ම යටතේ 2023 වසර අවසන් වීමට ප්‍රථම මෙවැනි වරලත් අලෙවි නියෝජිත ප්‍රදර්ශනාගාර ජපානය, ඕස්ට්‍රේලියාව, එක්සත් රාජධානිය,කැනඩාව හා මැදපෙරදිග රටවල් තුළද විවෘත කිරීමට කටයුතු සැලසුම් කරමින් සිටියි.
මෙම අවස්ථාව සඳහා බතික්,අත්යන්ත්‍ර,රෙදි හා දේශීය ඇඟලුම් නිෂ්පාදන රාජ්‍ය අමාත්‍යංශ ලේකම් ජානක ධර්මකීර්ති මහතා,ලක්සල ආයතන සභාපති නීතීඳ ලක්මල් වික්‍රමආරච්චි මහතා,සිලෝන් ගැලරි වරලත් නියෝජිත ආයතන සභාපති සුදර්මා වර්ණකුලසූරිය මෙනෙවිය,එම ආයතනයේ කළමනාකරතුමන් හා ලක්සල ආයතනයෙහි කළමනාකරතුමන් ඇතුළු අධ්‍යක්ෂ මණ්ඩලයද එක් විය.
“කොවැක්ස්” වැඩසටහන ඔස්සේ ජපන් ආධාර යටතේ මෙරටට සෞඛ්‍ය සේවාව සඳහා උපකරණ තොගයක් පරිත්‍යාග කිරීමක් පසුගියදා සිදු කෙරිණි. මෙම උපකරණ තොගය යුනිසෙෆ් සංවිධානය සහ ජපන් තානාපති කාර්යාලයේ සහයෝගයෙන් සෞඛ්‍ය අමාත්‍ය ආචාර්ය කෙහෙලිය රඹුක්වැල්ල මහතාට නිල වශයෙන් පරිත්‍යාග කර තිබේ.
එන්නත් ප්‍රවාහන මෙවලම් 750ක්, එන්නත් බහාලුම් ශීත පෙට්ටි 300ක්, ශීතදාම ආරක්ෂක ශීතකරණ 100ක්, සාර්ථක එන්නත් කළමනාකරණ ආවේක්ෂණය සඳහා භාවිතා කිරීමට ඇන්ඩ්‍රොයිඩ් ටැබ්ස් තොගයක් මෙම පරිත්‍යාගයට ඇතුලත් වේ. ජපන් රජය මෙරට සෞඛ්‍ය ක්ෂේත්‍රයට පසුගිය වසරේදී පමණක් ඩොලර් මිලියන 16.2 ක පමණ මුදලක් වැය කර තිබෙන අතර ඉදිරියේදීද මෙරට සෞඛ්‍ය සේවාව සඳහා ලබාදිය හැකි උපරිම දායකත්වය ලබා දෙන බව ද ශ්‍රී ලංකාවේ ජපන් තානාපති සුගියාමා අකිරා මහතා මෙහිදි ප්‍රකාශ කළේය.
මෙරට සෞඛ්‍ය සේවාව නගාසිටුවීම සඳහා දිගු කලක සිට ජපානය සහයෝගය ලබාදෙන බවද පවතින කොවිඩ් මර්දනයේදී එම සහයෝගය වඩාත් ඉහළ මට්ටමින් වර්තමානයේ ලබා දෙන බවද සුගියාමා අකිරා මහතා පැවසු අතර කොවිඩ් මර්දනයේදී ජපානය ගෙන යන වැඩපිළිවෙළ හා සම්බන්ධ දැනුම හා තොරතුරු මෙන්ම මෙරට කොවිඩ් මර්දන ක්‍රියාවලිය හා සම්බන්ධ දැනුම හා තොරතුරු හුවමාරු කර ගැනීම දෙරටටම ප්‍රායෝගිකව වැදගත් වනු ඇතැයිද ජපන් තානාපතිවරයා මෙහිදී වැඩිදුරටත් ප්‍රකාශ කර තිබේ.
මෙහි දී අදහස් දක්වමින්සෞඛ්‍ය අමාත්‍ය ආචාර්ය කෙහෙලිය රඹුක්වැල්ල මහතා පවසා සිටියේ ජනාධිපති ගෝඨාභය රාජපක්ෂ මහතාගේ පෞද්ගලික ඉල්ලීමක් මත ඇස්ට්‍රාසෙනිකා දෙවන මාත්‍රාව මෙරටට පරිත්‍යාග කිරීම පිළිබඳව ප්‍රසාදය පළ කරන බවත් ඉදිරියටත් එවැනි සහයක් ජපානයෙන් මෙරටට ලැබෙනු ඇතැයි බලාපොරොත්තු වන බවත්ය.
මෙම අවස්ථාවට සෞඛ්‍ය ලේකම් මේජර් ජනරාල් විශේෂඥ වෛද්‍ය සංජීව මුණසිංහ,සෞඛ්‍ය සේවා අධ්‍යක්ෂ ජනරාල් වෛද්‍ය අසේල ගුණවර්ධන ,අතිරේක ලේකම් (මහජන සෞඛ්‍ය සේවා) වෛද්‍ය ලක්ෂ්මි සෝමතුංග, යුනිසෙෆ් ශ්‍රී ලංකා නියෝජිත ක්‍රිස්ටියන් ස්කෝග් යන මහත්ම මහත්මීන් ඇතුළු සෞඛ්‍ය අමාත්‍යාංශයේ නිලධාරීන් , ජපන් තානාපති කාර්යාල නිලධාරීන් සහ යුනිසෙෆ් සංවිධානයේ මෙරට නිලධාරීන් පිරිසක්ද මෙම අවස්ථාවට එක්ව සිටියහ.
බොරැල්ල හි පිහිටි රජයේ මුද්‍රණ දෙපාර්තමේන්තුවේ ප්‍රගතිය සකච්ඡා කිරීමේ රැස්වීමක් ජනමාධ්‍ය අමාත්‍ය ඩලස් අලහප්පෙරුම මහතාගේ ප්‍රධානත්වයෙන් පැවැත්විණි.
ජනමාධ්‍ය අමාත්‍යාංශයේ, පැවැති මෙම සාකච්ඡාව සඳහා ජනමාධ්‍ය අමාත්‍යාංශයේ ලේකම් ජගත් පී. විජේවීර මහතා, අතිරේක ලේකම් (පාලන) එස්.ආර්.ඩබ්.එම්.ආර්.පී. සත්කුමාර මහතා ,රජයේ මුද්‍රණාලාධිපති ගංගා කල්පනි ලියනගේ මහත්මිය ඇතුළු නිලධාරිහූ සහභාගී වූහ.
පරිසර අමාත්යාංශය 2021- 2030 දක්වා ප්ලාස්ටික් අපද්‍රව්‍ය කළමණාකරණය සඳහා දස අවුරුදු ජාතික ක්‍රියාකාරි සැලැස්මක් හඳුන්වා දී ඇත. ශ්‍රී ලංකාවේ ප්ලාස්ටික් අපද්‍රව්‍ය බැහැර කිරීම සීග්‍රයෙන් ඉහළ ගොස් තිබෙන බැවින් එම ප්ලාස්ටික් අපද්‍රව්‍ය කළමනාකරණය සඳහා පරිසර අමාත්යාංශය විසින් ඊයේ (25) දින 2021- 2030 දක්වා දස අවුරුදු ජාතික ක්‍රියාකාරි සැලැස්මක් (National Action Plan on Plastic Waste Management – 2021- 2030) හඳුන්වා දෙනු ලැබීය.
පරිසර අමාත්‍යාංශයේ ලේකම් විශේෂඥ වෛද්‍ය අනිල් ජාසිංහ මහතා විසින් මෙම ජාතික ක්‍රියාකාරි සැලැස්ම පරිසර අමාත්‍ය මහින්ද අමරවීර මහතා වෙත බාර දෙනු ලැබීය. ප්ලාස්ටික් අපද්‍රව්‍ය කළමනාකරණ ජාතික ක්‍රියාකාරි සැලැස්ම සකස් කිරීම සඳහා ජපාන රජය මගින් එක්සත් ජාතින්ගේ පාරිසරික වැඩසටහන, IETC- Technology for Environment, Environment Stratagies සහ පරිසර අමාත්යාංශය යන ආයතන විසින් අනුග්‍රහය දක්වන ලදී.
මෑත කාලය තුළ ශ්‍රී ලංකාවේ ප්ලාස්ටික් අපද්‍රව්‍ය බැහැර කිරීමේ දී පවතින අවිදිමත් බව සැළකිල්ලට ගනිමින් ඉදිරි දස වසර තුළ ප්ලාස්ටික් භාවිතය අවම කිරීමට ක්‍රියාත්මක කළ යුතු වැඩ පිළිවෙළ මෙමගින් යෝජනා කර තිබේ. විශේෂයෙන් 3R සංකල්පය අනුගමනය කරමින් ප්ලාස්ටික් භාවිතය අවම කිරීම (Reduce) , නැවත භාවිතා කිරීම ( Re- Use) හා ප්‍රතිචක්‍රියකරණය ( Recycling) යන ක්‍රියා පිළිවෙත තුළින් පරිසරයට එක් කෙරෙන ප්ලාස්ටික් අපද්‍රව්‍ය කළමනාකරණය කිරීම මෙහි අරමුණ වේ.
අපේ රටට වාර්ෂිකව ආනයනය කරනු ලබන ප්ලාස්ටික් අමුද්‍රව්‍ය ප්‍රමාණය මෙට්‍රික් ටොන් ලක්ෂ 03කි. එමෙන්ම අපේ රටේ නාගරික ඝන අපද්‍රව්‍ය ප්‍රමාණය දිනකට මෙට්‍රික් ටොන් 10,768කි. එමෙන්ම පළාත්පාලන ආයතනවලින් දිනකට එකතු කරනු ලබන ඝන අපද්‍රව්‍ය ප්‍රමාණය දිනකට මෙ. ටො. 3458කි. ඒ අනුව දිනපතා අප රටේ බැහැර කරන ඝන අපද්‍රව්‍යවලින් සියයට 50ක් එකතු නොකර පරිසරයට බැහැර කරනු ලබන බව පෙනී යයි.
මෙම බරපතල පාරිසරික ගැටළුව විසඳීම සඳහා දැනටමත් පියවර රැසක් ගෙන ඇතැයි මෙම ක්‍රියාකාරි සැළැස්ම අමාත්‍යවරයාට බාර දෙමින් පරිසර අමාත්‍යාංශයේ ලේකම් විශේෂඥ වෛද්‍ය අනිල් ජාසිංහ මහතා පැවසීය.
විදෙස් ගත වීමට අපේක්‍ෂා කරණ සාමාන්‍ය ජනතාව සඳහා කොවිඩ් -19 එන්නත් ලබාගත්බවට සහතිකයක් මාර්ගගතව online ලබාගැනීමට අගෝස්තු 25 දින සිට පහසුකම් සැලසෙනබව තොරතුරු හා සන්නිවේදන තාක්ෂණ නියෝජිතායතනය ප්‍රකාශකරයි. සෞඛ්‍ය අමාත්යාංශය සහ ලෝක සෞඛ්‍ය සංවිධානය සමඟ සහයෝගයෙන් මෙය ක්‍රියාත්මක කෙරේ.
මෙමඑන්නත් සහතිකයේ විද්‍යුත් පිටපතක් ලබා ගැනීම සඳහා https://covid-19.health.gov.lk/certificate/ අන්තර්ජාල ද්වාරය වෙත පිවිසිය යුතුවේ. මාර්ගගත ද්වාරය වෙත ප්‍රවේශ වීමෙන් පසු ජාතික හැඳුනුම්පත් අංකය හෝ , විදේශ ගමන් බලපත්‍ර අංකය, එන්නත් කාඩ්පත් විස්තර,විදේශගමන් විස්තර සාක්ෂි සහ අදාළ පුද්ගලික දත්ත විස්තර ඇතුළත් කළ යුතුය. අදාළ විස්තර සාර්ථකව ඇතුළත් කිරීමෙන් පසු, එන්නත් සහතිකයේ මෘදු පිටපතක් (පීඩීඑෆ් පිටපතක් ) ලබාගැනීමට ඉල්ලුම්කරුට හැකිවේ.
එය අවශ්‍ය වූ විට සහතිකයේ මුද්‍රණ පිටපතක් ලෙසද අදාළ අංශවෙත ඉදිරිපත් කළ හැකිය. මෙම මාර්ගගත ක්‍රමය මඟින් එන්නත් සහතිකයේ මුද්‍රණ පිටපත් එකතු කිරීම සඳහා ඇති සෞඛ්‍ය කාර්යාල වෙත ශාරීරිකව යෑමෙන් ඇති වන අපහසුතා මඟහරවා ගැනීමට හැකිවේ. දැන් ඔබට ඔබේම නිවසේ සිට පහසුවෙන්ම එන්නත් සහතිකය ලබා ගත හැකිය.
තොරතුරු හා සන්නිවේදන තාක්ෂණ නියෝජිතායතනය, සෞඛ්‍ය අමාත්යාංශය සහ ලෝක සෞඛ්‍ය සංවිධානය සමඟ එක්ව හදුන්වා දුන් මෙම කොව්ඩ් 19 එන්නත් සහතිකය කාලෝචිත පියවරක් බව තාක්ෂණ අමාත්‍යාංශයේ ලේකම් ජයන්ත ද සිල්වා මහතා සඳහන් කරයි.මෙවැනි වටිනා එන්නත් සහතිකයක් මහජනතාවට කරදරයකින් තොරව ලබාදීම සදහා තිරය පිටුපසසිට සක්‍රීය ලෙස දායකවූ සියල්ලනට ලේකම් වරයා සිය ස්තුතිය පළකරනබවද සදහන් කළේය.
මෙම හදුන්වාදීම පිළිබඳව අදහස් දක්වමින් තොරතුරු හා සන්නිවේදන තාක්ෂණ නියෝජිතායතනයේ (ICTA ) සභාපති ඕෂද සේනානායක මහතා සඳහන් කළේ, පුරවැසියන් මුලිකකරගත් සේවාවන් සැපයීම සඳහා තාක්‍ෂණය උපරිම ලෙස භාවිතා කිරීමට තම ආයතනය කැපවී සිටින බවයි. කොවිඩ් - 19 වසංගත තත්වයන්ට මුහුණදීම සදහා තාක්ෂණ භාවිතය කෙතරම් වැදගත් ද යන්න මෙම හදුන්වාදීම තුලින්ද හෙළිවේ. ජාතිය ඩිජිටල් පරිවර්‍තනයකට ගෙන යන ගමනේදී තාක්‍ෂණය පදනම් කරගත් විසඳුම් සක්‍රීය කිරීම සහ තාක්‍ෂණයෙන් පුරවැසි සේවාවන් සවිබල ගැන්වීම අඛණ්ඩව සිදු කරන බව ඔහු වැඩිදුරටත් සදහන්කරන ලදී .
වයස අවුරුදු 30 ට වැඩි සෑම පුද්ගලයෙකුම කඩිනමින් කොරෝනා මර්දන එන්නත් ලබාගැනීමට ඉදිරිපත් විය යුතු බව කෝවිඩ් 19 පැතිරීම වැලැක්වීමේ ජාතික ක්‍රියාන්විත මධ්‍යස්ථානයේ ප්‍රධානී යුද හමුදාපති ජෙනරාල් ශවේන්ද්‍ර සිල්වා මහතා පවසයි
ලාංකීය දේශපාලන ගමන්මඟෙහි විශාල පරිවර්තනයන් මෙන් ම අරගලයන් දියත් කරමින් ලාංකීය ජනතාවට අමිල මෙහෙවරක් ඉටුකිරීමට සක්‍රීයව දායක වූ කෘතහස්ත දේශපාලනඥයකු වන එක්සත් ජාතික පක්ෂ හිටපු අමාත්‍ය සහ හිටපු පාර්ලිමේන්තු මන්ත්‍රී මංගල සමරවීර මැතිතුමාගේ හදිසි වියෝව සැල වීමෙන් මම ඉතා සංවේගයට පත් වීමි.
රාජ්‍ය හෝ පෞද්ගලික සේවකයන්ගේ වැටුප් කප්පාදුවක් සිදු කිරීමට රජය කිසිඳු තීරණයක් ගෙන නැති බව ජනමාධ්‍ය අමාත්‍ය ඩලස් අලහප්පෙරුම මහතා අවධාරණය කරයි.
