කෝවිඩ් මර්දන එන්නත්කරණ වැඩසටහනේ පිට පිට දෙවැනි සතියටත් ශ්‍රී ලංකාව ලෝකයේම පළමුවැනි ස්ථානයට පත්ව තිබේ. එන්නත්කරණය අතින් ශ්‍රී ලංකාව පසුගිය සතියේදී ද ලෝකයෙන්ම පළමු ස්ථානය ගෙන තිබිණි. මෙරට ජනගහනයෙන් සියයට එකොළහයි දශම හයක ප්‍රතිශතයකට පසුගිය සතියේදී පමණක් එන්නත දී ඇති බවට ගෝලීය කොරෝනා තත්ත්වය සම්බන්ධයෙන් විශ්ලේෂණාත්මක වාර්තා ඉදිරිපත් කරන අවර් වර්ල්ඩ් ඉන් ඩේටා වෙබ් අඩවියේ දත්ත විශ්ලේෂණ අංශයේ ප්‍රධානි එඩ්වඩ් මැතිව් ටිව්ටර් පණිවිඩයක් නිකුත් කරමින් එහි සඳහන් කර තිබේ.

අවර් වර්ල්ඩ් ඉන් ඩේටා වෙබ් අඩවියේ වාර්තාවට අනුව නවසීලන්තය හා කියුබාව පිළිවෙළින් දෙවැනි සහ තුන්වැනි ස්ථානයේ පසුවන අතර, ඉක්වදෝරය සහ පැනමා රාජ්‍ය සිව් වැනි සහ පස් වැනි ස්ථානවල පසු වේ.

කොවිෂීල්ඩ් එන්නතේ පළමු මාත්‍රාව 1,416,691ක්, දෙවැනි මාත්‍රාව 888,441ක්, සයිනොෆාම් එන්නතේ පළමු මාත්‍රාව 10,384,291ක්ද දෙවැනි මාත්‍රාව 8,115,632ක්ද, ස්පුට්නික් එන්නතේ පළමු මාත්‍රාව 159,088ක්ද දෙවැනි මාත්‍රාව 43,450ක්ද, ෆයිසර් එන්නත් පළමු මාත්‍රාව 395,945ක්ද දෙවැනි මාත්‍රාව 236,556ක්ද මොඩර්නා එන්නතේ පළමු මාත්‍රාව 772,741ක්ද දෙවැනි මාත්‍රාව 710,410ක්ද ඊයේ (9) අලුයම 6.00 වන විට දී ඇත.

මෙරට කොවිඩ් මර්දන එන්නත්කරණ වැඩසටහන යටතේ එන්නත් මාත්‍රා දෙකම ලබාගෙන ඇති පුද්ගලයින් සංඛ්‍යාව මේ වනවිට කෝටිය ඉක්මවා ගොස් ඇතැයි සෞඛ්‍ය අමාත්‍යංශයේ වසංගත රෝග විද්‍යා අංශය සදහන් කරයි. 

තිරසර කෘෂිකර්මාන්තයක් සදහා වන අමාත්‍යාංශයීය කාර්ය සාධක බලකාය සදහා සාමාජිකයින් පත් කිරිම  ඊයේ (9) කෘෂිකර්ම අමාත්‍යාංශයේ දී සිදු විය. 

රට තුල මහා පරිමාණ සංවර්ධන ව්‍යාපෘති 280 ක් හා කුඩා පරිමාණ සංවර්ධන ව්‍යාපෘති 25 න් දහසක් මේ වනවිට ක්‍රියාත්මක බව ඇමති නාමල් රාජපක්ෂ මහතා කියයි.ජනාධිපති ගෝඨාභය රාජපක්ෂ මැතිතුමාගේ සෞභාග්‍යයේ දැක්ම ප්‍රතිපත්ති ප්‍රකාශනයෙන් ඉදිරිපත් කළ සංවර්ධන වැඩපිළිවෙල යටතේ එම ව්‍යාපෘති ක්‍රියාත්මක වෙයි.එම සංවර්ධන ව්‍යාපෘතිවල ප්‍රගතිය සොයා බැලීමට ඇමති නාමල් රාජපක්ෂ මහතා තීරණය කර ඇති අතර එම වැඩපිළිවෙල යාපනය දිස්ත්‍රික්කයෙන් ඊයේ ආරම්භ විය.දිස්ත්‍රික්කයේ සංවර්ධන ව්‍යාපෘති රැසක් එහිදී ඇමතිවරයාගේ නිරීක්ෂණයට ලක් විය.සංවර්ධන ව්‍යාපෘතිවල ඇති අඩුපාඩු හඳුනාගෙන ඒවා කඩිනමින් නිම කිරීමට අවශ්‍ය ක්‍රියාමාර්ග ගන්නා බව ඇමතිවරයා එහිදී පැවසීය.ජනතාවගේ සංවර්ධන අපේක්ෂා යථාර්තයක් බවට පත් කිරීම රජයේ ඒකායන අරමුණයි.

ජනමාධ්‍ය අමාත්‍ය ඩලස් අලහප්පෙරුම මහතා විසින් ජයවර්ධනපුර සරසවියේ මහාචාර්ය නීලිකා මලවිගේ මහත්මියගෙන් සමාව ඉල්ලා තිබේ.

තම සමාජ ජාල ගිණුමේ සටහනක් තබමින් අමාත්‍යවරයා පෙන්වා දෙන්නේ මලවිගේ මහත්මිය විසින් සිදුකරන ලද දේශනයක් විකෘති කර පළ කිරීම සම්බන්ධයෙන් ඇයට සිදුවු සිත් වේදනාව තමන් අවබෝධ කරගත් බවයි.

එනිසා සියලු ජනමාධ්‍ය මිත්‍රයන් වෙනුවෙන් තමන් පුද්ගලිකව ඇය අමතා සමාව ඉල්ලූ බවද ඔහු කියා සිටී.

අමාත්‍යවරයා තැබූ සටහන

'මහාචාර්ය නීලිකා මලවිගේ මහත්මිය, රට වසංගත තත්වයෙන් ගිලන් වී, ඔත්පල වී සිටින මොහොතක, සිය සහෝදර පූරවැසියන් එයින් මූදවාගැනීම සඳහා ඇයගේ දැනූම, හඬ, පෞරුෂය කැපකරන සමාජ නායිකාවක්. ඉහත අන්දෝලනයට පාදක වූ, ගේට්වේ ජාත්‍යන්තර පාසල සංවිධානය කල වෙබ් සම්මන්ත්‍රනයේදී ඇය විසින් කරන ලද මූළු කතාවම මා විසින් පෞද්ගලිකව ශ්‍රවණය කලා. එම නිසාම ඇය විසින් කල ප්‍රකාශයක් විකෘති කර පළ කිරීමෙන් ඇයට සිදූවූ හානිය මෙන්ම සිත්වේදනාව ද මා හොඳින් අවබෝධ කරගත්තා. එය අවබෝධ කර ගැනීමට අප සියළු දෙනාම සංවේදී විය යූතුයි.

එම නිසා මා සියළුම මාධ්‍ය මිත්‍රයන් වෙනූවෙන් ඇයට ඊයේ දිනයේ පූද්ගලිකව ආමන්ත්‍රණය කර ජනමාධ්‍ය අමාත්‍යවරයා ලෙසට ඇයගෙන් සමාව ඉල්ලූවා. එම නිසා මේ අත්වැරුද්ද වගකීම් සහගත ජනමාධ්‍ය කලාවක් වෙනූවෙන් හොඳ ආරම්භයක් ලෙසට පරිවර්තනය කරගන්නා ලෙස මා මගේ සියළුම සහෝදර වෘත්තීය සගයන්ගෙන් හෘදයාංගමව ඉල්ලා සිටිනවා.' 

කොවිඩ් 19 වසංගත තත්ත්වය හේතුවෙන් බලපත්‍රලාභී බැංකුවල ණය ගනුදෙනුකරුවන් මුහුණදී සිටින දුෂ්කරතා සැලකිල්ලට ගෙන මින් පෙර ලබාදී තිබූ ණය සහනය දෙසැම්බර් මස 31 වැනිදා දක්වා දීර්ඝ කිරීමට සලකා බලන ලෙස ශ්‍රී ලංකා මහ බැංකුව සියලුම බලපත්‍රලාභී වාණිජ බැංකු සහ විශේෂිත බැංකු වෙත දැනුම්දී තිබේ.

කොවිඩ්-19 වසංගත තත්ත්වය ඉහළ යාම හේතුවෙන් බලපත්‍රලාභී බැංකුවල ණය ගනුදෙනුකරුවන් මුහුණ දී තිබෙන දුෂ්කරතා සැලකිල්ලට ගනිමින්,එම බලපෑමට පත් ණය ගනුදෙනුකරුවන් සඳහා මින් පෙර (එනම්, 2021.08.31 දින දක්වා) ලබා දී තිබූ ණය සහන 2021.12.31 දක්වා තවදුරටත් දීර්ඝ කිරීමට සලකා බලන ලෙස ශ්‍රී ලංකා මහ බැංකුව විසින් සියලුම බලපත්‍රලාභී වාණිජ බැංකු සහ බලපත්‍රලාභී විශේෂිත බැංකු (බලපත්‍රලාභී බැංකු) වෙත දැනුම් දෙන ලදී. එසේම, ශ්‍රී ලංකා මහ බැංකුව විසින් නිශ්චිතව දක්වන ලද සමස්ත ප්‍රතිලාභයන්ට වඩා නොඅඩු වන සේ, බලපෑමට ලක් වූ ණය ගනුදෙනුකරුවන්ට ඔවුන් ඉල්ලා සිටින අතිරේක සහනයන් ලබා දීමට සලකා බලන මෙන් බලපත්‍රලාභී බැංකු වෙතින් ඉල්ලා සිටී.

කොවිඩ්-19 වසංගතයෙන් බලපෑමට පත් ණය ගනුදෙනුකරුවන් හට 2022 ජනවාරි මස සිට සිය ණය ගෙවීම් ක්‍රමානුකූලව සිදුකරගෙන යෑම සඳහා අවශ්‍ය කටයුතු සකස්කර ගැනීමට මෙම නව ණය සහන කාලය උපකාරී වනු ඇතැයි අපේක්ෂා කෙරේ. එමෙන්ම, පවත්නා තත්ත්වය යටතේ තම සාමාන්‍ය ව්‍යාපාර කටයුතු කරගෙන යාම සඳහා දිගින් දිගටම එල්ල වන බාධා හමුවේ අත්‍යාවශ්‍ය මෙහෙයුම් වියදම් දරමින් සිය තැන්පතුකරුවන්ගේ පොලී මුදල් හා තැන්පතු මුදල් නිසි කලට වේලාවට ගෙවීමේ වගකීම බලපත්‍රලාභී බැංකු විසින් නොපිරිහෙලා ඉටුකරන බව අවධාරණය කළ යුතු වේ. මෙම කරුණු සැලකිල්ලට ගනිමින්, ණය සහන ලබා ගැනීමට සුදුසුකම් සපුරා ඇති නමුත්, ණය ආපසු ගෙවීමට හැකියාව පවතින ණය ගනුදෙනුකරුවන්ට තම පහසුකම් කල් දැමීම හෝ ප්‍රතිව්‍යුහගත කිරීමක් ඉල්ලා සිටීම වෙනුවට ණය ආපසු ගෙවීමට කටයුතු කරන මෙන් ශ්‍රී ලංකා මහ බැංකුව ඉල්ලා සිටී. තවද, බලපෑමට ලක් වූ ණය ගනුදෙනුකරුවන්ගේ ආපසු ගෙවීමේ ධාරිතාව ගැන සැලකිලිමත් වෙමින් ඔවුන්ගේ එදිනෙදා කටයුතුවලට අනිසි පීඩනයක් ඇති නොවන ආකාරය‌ට එම ණය පහසුකම් ආපසුගෙවීම සදහා නව සැලසුම් සැකසීමට බලපත්‍රලාභී බැංකු හා සාධාරණ එකඟතාවයකට පැමිණෙනු ඇතැයි ද අපේක්ෂා කෙරේ.

ණය සහන සම්බන්ධයෙන් බලපත්‍රලාභී බැංකු වෙත 2021.09.01 දින නිකුත් කරන ලද 2021 අංක 08 දරන චක්‍රලේඛය ශ්‍රී ලංකා මහ බැංකු වෙබ් අඩවියේ (www.cbsl.gov.lk) දක්වා ඇති අතර, සුදුසුකම් ලත් ගනුදෙනුකරුවන් හට වැඩිදුර තොරතුරු අදාළ බලපත්‍රලාභී බැංකුව/බැංකු හෝ ශ්‍රී ලංකා මහ බැංකුවේ මූල්‍ය පාරිභෝගික සබඳතා දෙපාර්තමේන්තුවේ ක්ෂණික ඇමතුම් අංක 1935 හෝ දුරකථන අංක 0112 477966 හෝ 0112 477129 ඔස්සේ සම්බන්ධ වීමෙන් ලබා ගත හැකිය.

කොවිඩ් ප්‍රතිශක්තීකරණ තුන්වැනි එන්නතක් සදහා යොමු නොව ලෙස ලෝක සෞඛ්‍ය සංවිධානය ධනවත් රටවලින් ඉල්ලීමක් කර සිටියි.

ලබන වසර වනවිට ගෝලීය වශයෙන් කොරෝනා වසංගතය අවදානම අඩු කර ගත හැකි බව එම සංවිධානය පවසයි.

මේවන විට රටවල් රැසක් කොවිඩ් ප්‍රතිශක්තිකරණ තුන්වැනි මාත්‍රාවක් ලබා දීමට පියවර ගෙන තිබේ. එන්නත් හිඟව පවතින මේ මොහොතේ ලොව ධනවත් රටවල් රැසක් තුන්වැනි මාත්‍රාවක් සදහා යොමු වීමෙන් දිළිදු රටවල ජනතාව අසීරුතාවට පත්වන බව ලෝක සෞඛ්‍ය සංවිධානය පෙන්වා දෙයි.

වෛරසය ගෝලීය වශයෙන් තුරන් කිරීමට නම් සියලු දෙනාගේ සහය ලැබිය යුතු බව ලෝක සෞඛ්‍ය සංවිධානයේ ප්‍රධානී ටෙඩ්රොස් ආදනම් ගේබ්‍රියේසස් පවසයි.

ගැබිණි මව්වරුන් කොරෝනා ප්‍රතිශක්තිකරණ එන්නත්කරණයට ලක්වීම අත්‍යවශ්‍ය බව කොළඹ ද සොයිසා කාන්තා රෝහලේ කාන්තා සහ නාරිවේද විශේෂඥ වෛද්‍ය හර්ෂ අතපත්තු මහතා අවධාරණය කරයි.
ප්‍රජා වෛද්‍ය විශේෂඥ චිත්‍රමාලි ද සිල්වා මහත්මිය පවසන්නේ ගර්භණී භාවයට පත් වන කාන්තාවන් කොරෝනා වෛරසයෙන් ආරක්‍ෂාවිම සම්බන්ධයෙන් නිරතුරු අවධානය යොමු කළ යුතු බවයි. එම මව්වරුන් නිවසේ සිටියද සෙසු සාමාජිකයන් ආශ්‍රයේදී සැලකිලිමත් විය යුතුය. අත්‍යවශ්‍ය කරුණකට හැර නිවසින් බැහැර නොයන්නැයි ඇය සියලු ගර්භණී කාන්තාවන්ගෙන් ඉල්ලීමක් කරයි. යම් ආකාරයක කොරෝනා ආසාදිත ලක්ෂණයක් ඇති වුවහොත් වහාම වෛද්‍යවරයෙකු හමුවිය යුතුය. පසුගිය වසරේ සිට මේ දක්වා ගර්භණී කාන්තාවන් 5500 දෙනෙකුට කොරෝනා වෛරසය ආසාදනය වී ඇතැයි සෞඛ්‍ය අංශ පවසයි. ඉන් මියගොස් ඇත්තේ ඉතා සුඵ පිරිසකි.

වයස අවුරුදු 30ට වැඩි මෙරට ජනගහනයෙන් සියයට සියයක් ආවරණය වන පරිදි කොවිඩ් මර්දන පළමු එන්නත් මාත්‍රාව ද, සියයට 80ක් ආවරණය වන ලෙස දෙවැනි මාත්‍රාව ද මේ වන විට අවසන් බව සෞඛ්‍ය ප්‍රවර්ධන කාර්යාංශයේ අධ්‍යක්ෂ විශේෂඥ වෛද්‍ය රංජිත් බටුවන්තුඩාව මහතා ඊයේ (7) පැවසීය.

මෙරට සමස්ත ජනගහනයෙන් සියයට 60ක් ආවරණය වන ලෙස පළමු එන්නත් මාත්‍රාව ද, සියයට 40ක් ආවරණය වන ලෙස දෙවැනි මාත්‍රාව ද දී අවසන් බවත් කොවිඩ් මර්දන එන්නත්කරණ වැඩසටහන ඉතා සාර්ථකව රට පුරා ක්‍රියාත්මක වන බවත් ඒ මහතා ප්‍රකාශ කළේය.

කොවිඩ් මර්දන එන්නත ලබා ගැනීමට පෙළඹෙන ජනතාව ශීඝ්‍රයෙන් ඉහළ ගොස් ඇතැයි ද, එන්නත් දෙකම ගත් පුද්ගලයන් වූවද කොවිඩ් වයිරසයෙන් ආරක්ෂා වීමට කොවිඩ් මර්දන සෞඛ්‍ය උපදෙස් පිළිපැදීම කළ යුතු යැයි ද ඒ මහතා කීවේය. කොවිඩ් මර්දන පළමු මාත්‍රාව ගත් පුද්ගලයන්ගේ සංඛ්‍යාව 12,823,147ක් වන අතර දෙවැනි මාත්‍රාව ගත් පුද්ගලයන්ගේ සංඛ්‍යාව 9,414,851ක් දක්වා පෙරේදා (6) වන විට ඉහළ ගොස් ඇති බව වසංගත රෝග විද්‍යා අංශය පෙන්වා දෙයි.

වයස අවුරුදු 60ට වැඩි මෙරට ජනගහනයෙන් ප්‍රතිශතයක් ලෙස සියයට 70කට අධික සංඛ්‍යාවකට කොවිඩ් මර්දන එන්නත මේ වන විට දී අවසන් බව ස්වදේශ කටයුතු අමාත්‍යාාංශයේ ලේකම් එන්.එච්.එම්. චිත්‍රානන්ද මහතා ඊයේ (7) ප්‍රකාශ කළේය. 60වැඩි ජනගහනයෙන් ලක්ෂ එකහමාරක පමණ පිරිසක් තවමත් එන්නත්කරණයට ලක්ව නැතැයිද හෙතෙම කීවේය. පොළොන්නරුව සියයට 88ක් ද, කුරුණෑගල සියයට 80 ක් ද, අම්පාර සියයට 75ක් ද, පුත්තලම සියයට 88ක් ද, මාතලේ සියයට 85ක් ද, කොළඹ සියයට 80ක් ද ලෙස දිස්ත්‍රික් මට්ටමින් වයස අවුරුදු 60ට වැඩි ජනගහනය මේ වන විට එන්නත්කරණයට ලක් කර ඇතැයි ද ඒ මහතා කීවේය. එන්නත්කරණ මධ්‍යස්ථානයන්ට පැමිණීමට නොහැකි නොයෙක් ආබාධවලින් පෙළෙන වැඩිහිටි පුද්ගලයන්ගේ තොරුතුරු ග්‍රාමසේවා වසම් මට්ටමින් ගෙන අදාළ ස්ථානයන්ට සෞඛ්‍ය සහ ආරක්ෂක අංශ ගොස් එන්නත්කරණය සිදු කරන්නේ යැයි ද හෙතෙම පැවසීය. වැඩිහිටි නිවාස 349ක වෙසෙන පුද්ගලයන් 8806කින් 8000කට පමණ මේ වන විට කොවිඩ් මර්දන එන්නත් මාත්‍රා දෙකම ලබාදී පූර්ණ එන්නත්කරණයට ලක් කර ඇති බව ජාතික වැඩිහිටි මහ ලේකම් කාර්යාලයේ අධ්‍යක්ෂ කේ.ජී. ලැනරෝල් මහතා පැවසුවේය.

ඉදිරි සතියක පමණ කාලයක් තුළදී සමස්ත රට පුරා වෙසෙන සියලු වැඩිහිටියන්ට කොවිඩ් මර්දන එක් එන්නතක් හෝ දී අවසන් කිරීම සෞඛ්‍ය අමාත්‍යාංශයේ සැලසුම වේ. කොවිඩ් මර්දන එන්නත් වන ඇස්ට්‍රාසෙනිකා, ස්පුට්නික්, ෆයිසර්, මොඩර්නා, සයිනොෆාම් සමස්තයක් ලෙස මාත්‍රා මිලියන 20.46ක් මෙරටට ගෙනැවිත් තිබෙන අතර රුපියල් බිලියන 35ක මුදලක් වැය කරමින් එන්නත් මිලදී ගැනීමට රජය පියවර ගෙන තිබේ.