ආයතනික සම්පත්වලින් ප්‍රතිලාභ ලබමින් කරන ජනතා සේවය අගයනවා
- විතාරන්දෙණියේ මේධානන්ද හිමි

කණ්ඩායමක් ලෙස එකට වැඩ කළොත් ඉදිරි ගමන පහසුයි
- ලේක්හවුස් සභාපති අනූෂ පැල්පිට

ජාතියේ හෙට දවස වෙනුවෙන් සුවිශේෂී මෙහෙවරක නිරතව සිටින ලංකාවේ සීමාසහිත එක්සත් ප්‍රවෘත්ති පත්‍ර සමාගම ජනතාවට වඩා විශ්වසනීය සේවාවක් ලබා දීමේ අරමුණින් 'ලේක්හවුස් මූවර්ස්' භාණ්ඩ ප්‍රවාහන සේවාව සහ 'දිනමිණ' කොළඹ - කතරගම ශීඝ්‍රගාමී බස් සේවාව ඊයේ (08) සිට යළි ඇරඹීය.

ලංකාවේ සීමාසහිත එක්සත් ප්‍රවෘත්ති පත්‍ර සමාගමේ සභාපති හා කළමනාකාර අධ්‍යක්ෂ අනූෂ පැල්පිට මහතාගේ ප්‍රධානත්වයෙන් මෙම සේවාව ඊයේ (08) පෙරවරුවේ යෙදුණු සුබ මොහොතින් කොළඹ කොටුව, සම්බුද්ධාලෝක විහාරාධිකාරී විතාරන්දෙණියේ මේධානන්ද හිමියන් ඇතුළු මහා සංඝරත්නයේ සෙත් පිරිත් මැද ආරම්භ කෙරිණි. එම සේවාවේ මුල්ම බිල්පත නිකුත් කිරීම සහ මුදල් භාර ගැනීම සභාපතිවරයා අතින් සිදු විය.

කොළඹ - කතරගම බස් සේවාව සෑම දිනකම කොටුව ප්‍රධාන බස් නැවතුම්පොළෙන් රාත්‍රී 7.00ට ගාලු පාර ඔස්සේ කතරගම බලා පිටත්ව යන අතර, යළි එය පසුදා පෙරවරු 9.15ට කොළඹ බලා පිටත් වීමට නියමිතය. ඊට අමතරව සහන මිල ගණන් යටතේ ක්‍රියාත්මක භාණ්ඩ ප්‍රවාහන සේවාව කොළඹ සීමාව තුළ හා ඉන් පිටත සිදු කරන අතර, රියැදුරු සමඟ රථ, රියැදුරු සහ රිය සහායක සමඟ රථ සහ මාසික කුලී පදනම මත බස් රථ ලබා දීම ද සිදු කරයි.’

මෙම අවස්ථාවට එක් වෙමින් අනුශාසනාවක් කළ සම්බුද්ධාලෝක විහාරාධිකාරී හිමියෝ මෙසේ පැවසූහ.

‘‘අප හැම කෙනෙක්ම දන්නවා අපේ රට ආර්ථික වශයෙනුත්, විවිධ ක්ෂේත්‍රවලිනුත් මේ දිනවල යම් අපහසුතාවයන්ට පත්ව තිබෙනවා. එවන් අවස්ථාවක ලේක්හවුස් ආයතනය රටේ වගකීමක් ඇති මාධ්‍ය ආයතනයක් හැටියට තමන්ගේ ආයතනයේ තිබෙන සම්පත් ජනතා සේවයට යොදවමින් අද සිට නැවත වතාවක් කොළඹ සිට කතරගම දක්වා අසරණ මගීන්ට ප්‍රවාහන පහසුකම් සපයමින් කරන මේ සේවාවන් යළි ආරම්භ කිරීම ඉතාම වැදගත් කාර්යයක් හැටියට සලකන්න පුළුවන්. රජයේ සම්පත් හෝ මේ ආයතනයේ සම්පත් රටේ ජනතාවගේ සුබසිද්ධිය වෙනුවෙන් කැප කිරීම ඉතාමත්ම වටිනවා. නමුත් අද අප රට තුළ දකින්න ලැබෙන්නේ අප කවුරුත් නොහිතන, අප කවුරුත් නොපතන රට වෙනුවෙන් යැයි කියා ගන්නා පිරිස් ඉදිරියට පැමිණ මේ රට විනාශ කිරීමේ කුමන්ත්‍රණකාරී වැඩපිළිවෙළක් ක්‍රියාත්මක කරන බවයි. ඒක සමාජයේ අලුත් ගමනක් වෙනුවෙන් සමාජයේ නැඟිටීමක් විදියටත්, අරගලයක් විදියට පෙනී සිටින්නටත් පුළුවන්. මේ සෑම දෙනාම සිද්ධ කරන්නේ මේ සමාජය කඩා වැටීමට පත් කිරීමයි. එවැනි සමාජය කඩා වැටීමට ලක් කරන ඇතැම් පිරිස් කුමන්ත්‍රණකාරීව කටයුතු කරන සමයක ලේක්හවුස් ආයතනයේ සභාපති අනූෂ පැල්පිට මහතා ප්‍රමුඛ අධ්‍යක්ෂ මණ්ඩලයේ මේ සියලු දෙනාම එකතු වෙලා ජනතාවට සුබසිද්ධිය ගෙන දෙන වැඩසටහනක් මේ කාල පරිච්ඡේදය තුළ ක්‍රියාත්මක කිරීම ඉතාමත් වැදගත්. මේ ආයතනයට පමණක් නෙවෙයි, මෙවැනි තවත් ආයතනත් තමන්ගේ ආයතනයේ තිබෙන සම්පත්වලින් ජනතාව වෙනුවෙන් සේවය කර තමන්ගේ ආයතනයටත් කිසියම් ප්‍රතිලාභයක් දෙමින් කටයුතු කරනව‍ා නම් ඒක සුවිශේෂී වෙනව‍ා. එවන් සේවාවක් සිදු කිරීමට ප්‍රමුඛස්ථානය ගෙන කටයුතු කිරීම පිළිබඳවත් අනෙකුත් ආයතනවලටත් පූර්වාදර්ශයක් ලබා දීම පිළිබඳවත් මේ වෙලාවේ කෘතවේදීව සිහිපත් කරන්නට කැමැතියි.

‘‘ඒ විතරක් නෙවෙයි ජනතාවට තමන්ගේ භාණ්ඩ හා සේවාවන් එහා මෙහා හුවමාරු කර ගැනීම සඳහා රජයේ විශ්වාසය ඇති ආයතනයක් තුළින් ඒ භාණ්ඩ ප්‍රවාහන කටයුතු සිදු කර දීමට අවශ්‍ය මූලික කාර්යයන් සිදු කිරීම අද මේ අවස්ථාවේ ආරම්භ කළා. එයත් ජනතාවගේ පැත්තෙන් මේ කාලවකවානුවේ ඉතාමත්ම වටිනා ක්‍රියාවක්. ලේක්හවුස් ආයතනය කාලයෙන් කාලයට තමන්ට කළ හැකි උපරිම සේවාවන්, මාධ්‍ය ආයතනයක් හැටියටත්, රජයේ වගකීමක් ඇති ආයතනයක් හැටියටත් ඉටු කරමින් ජනතාවට විශ්වාසදායී තොරතුරු සපයනවා සේම ජනතාව වෙනුවෙන් මෙවැනි සේවාවන් තවදුරටත් ඉටු කිරීමට තව තවත් මේ ආයතනයටත් ඔබ සැමටත් තුණුරුවන්ගේ ආශිර්වාදය, නිදුක් නිරෝගී සම්පත්තියෙන් යුතුව කටයුතු කිරීමට අවශ්‍ය කරන කායික ශක්තිය, මානසික සුවපත් භාවය ලැබේවායි ප්‍රාර්ථනා කරනවා.’’

මෙහිදී අදහස් දැක්වූ ජනමාධ්‍ය අමාත්‍යාංශයේ ලේකම් හා ලංකාවේ සීමාසහිත එක්සත් ප්‍රවෘත්ති පත්‍ර සමාගමේ සභාපති හා කළමනාකාර අධ්‍යක්ෂ අනූෂ පැල්පිට මහතා මෙසේ පැවසීය.

‘‘ලේක්හවුස් ආයතනය විවිධ ව්‍යාපාර මාවත් සොයාගෙන ඉදිරියට යනවා. පත්තර මහගෙදර වසර 110ක් පමණ පත්තර නිකුත් කර තිබෙනවා. රට සහ රටේ ආර්ථික තත්ත්වය මත දැන් පත්තරවලින් පමණක් ඉදිරියට යන්න නොහැකි තත්ත්වයට පත්ව තිබෙනවා. රුපියල් 50,000ට 60,000ට ලබා ගත් කඩදාසි ටොන් එකක් අද වන විට රුපියල් ලක්ෂ 5කට වැඩි වෙනවා. පසුගිය කාලය තුළ අප ටෙන්ඩර් 5ක් කැඳවා තිබෙනවා. ඒ මිල ගණන්වලට කොළ අරගෙන අපට මේ ව්‍යාපාරය කර ගත නොහැකි තත්ත්වයක් මතුව තිබෙනවා. මේ තිබෙන මිල ගණන් යටතේ කොළ ලබා ගන්නේ නම් මාසයකට දැන් තිබෙන වියදම අමතරව තවත් රුපියල් මිලියන 35කින් 40කින් පමණ ඉහළ යනවා. අප උත්සාහ කරන්නේ වාණිජ මුද්‍රණ අංශය දියුණු කරන්නයි.

‘‘මීට පෙර දිනකට පුවත්පත් මුද්‍රණය කරන ප්‍රමාණයේ සහ අද වන විට මුද්‍රණය කරන ප්‍රමාණයේ විශාල වෙනසක් තිබෙනවා. ඒ වෙනසත් සමඟ අප අපේ වාහන යොදාගෙන ලංකාව පුරා පුවත්පත් බෙදා හරින්නේ නම් විශාල පිරිවැයක් දරන්න සිදු වෙනවා. ඒ පිරිවැයෙන් හතරෙන් එකක් හෝ තුනෙන් එකක් සියලුම පත්තර බෙදන ආයතන වැය කරනවා. ඒ අය සමඟ එක්ව පත්තර බෙදන්නේ නම් මේ වියදම විශාල වශයෙන් අවම කර ගන්න පුළුවන්. නමුත් මේ පවතින තත්ත්වය තුළ එවැන්නක් කරන්නේ නම් ආයතනයේ තිබෙන වාහන සහ සේවකයන්ට සිදු කරන්නේ කුමක් ද යන්න පිළිබඳව සොයා බැලුවා. ඒ අවස්ථාවේ මංජුල මාකුඹුර සහ චන්දන බණ්ඩාර මහත්වරු යෝජනා කළා අපේ ආයතනයෙන් මූවර්ස් එකක් ආරම්භ කරමු කියලා. එය හොඳ යෝජනාවක්. එය ඵලදායීව ක්‍රියාත්මක කරන්න පුළුවන් නම් අපට මේ වාහනවලින් හොඳ ප්‍රයෝජනයක් ගන්න පුළුවන්. හැම ව්‍යාපාරයක්ම සාර්ථකව අවසන් වන්නේ නැහැ. නමුත් උත්සාහ නොකර සිටීමෙන් කිසිදු ඵලක් වෙන්නෙත් නැහැ. ඒ නිසා අප බස් දෙකත් කොළඹ - කතරගම ධාවනය අරඹා ලාභදායී තත්ත්වයට ගේන්න උත්සාහ කරනවා. ලාභදායී කරන්න නොහැකි නම් වෙනත් තීරණයක් ගන්නවා. අප උත්සාහ කර බලමු මෙය ලාභදායීව ඉදිරියට යන්න. මේ ලේක්හවුස් ආයතනයට තවත් ව්‍යාපාර වර්ග 100ක් පමණ කරන්න පුළුවන් බවට සාංගමික සංස්ථා ව්‍යවස්ථාවලියේ තිබෙනවා. පත්තර නිකුත් කිරීම පමණක් නොවෙයි, මේ ආයතනය පටන් ගන්න අවස්ථාවේ සිට ව්‍යාපාර වර්ග රැසක් තිබෙනවා. ඕනෑම ව්‍යාපාරයක් කරන්න පුළුවන්. ඒ නිසා අපට අලුතින් සිතන්න වෙනවා.

‘‘ප්‍රාග්ධන හිඟකම පමණයි අපට තිබෙන්නේ. දක්ෂ අය අප ළඟ ඉන්නවා. ස්වේච්ඡාවෙන් සේවකයන් විශ්‍රාම ගැන්වීමේ වැඩසටහනක් හඳුන්වා දීලා දක්ෂ අය යවන්න අවශ්‍ය නැහැ. නමුත් අපට එක් එක් දෙපාර්තමේන්තුවල පවතින පිරිස ගත් විට අවම ශ්‍රමයක් ඇතිව කටයුතු කරන්න පුළුවන්. අද වන විට 1,125ක් පමණ සේවකයන් ඉන්නවා. මගේ අදහස 850කින් මේ ආයතනයේ කටයුතු සිදු කරන්නයි. එවිට මේ තිබෙන තත්ත්වය යටතේ වුවද මේ ආයතනය කළමනාකරණය කරමින් ඉදිරියට යන්න පුළුවන්. එයින් එහාට යන්නේ නම් ආයතනය ගෙන යන්න බැහැ. මම ඉලක්කම් සමඟ කටයුතු කරනවා. මේක කරන්න පුළුවන් ද බැරි ද කියන එක මම දන්නවා. 850කින් වගේ අපට යන්න පුළුවන් නම් ඇතැම් විට වැඩ කොටස යම් තරමකින් වැඩි වෙන්න පුළුවන්. නමුත් ආයතනයක් ලෙස වසා දැමීමකින් තොරව කාර්යක්ෂම ලෙස ඉදිරියට ගෙන යන්න පුළුවන්. මේ වෙනුවෙන් සියලු දෙනාගේම සහාය හිමි වෙයි කියා විශ්වාස කරනවා. පසුගිය මාස හයක කාලයේදී බොහොම දුෂ්කර කාලයක් ගත කළා. මේ කාලයේදී බොහෝදෙනා උදව් කළා. කැපවීමෙන් වැඩ කළා. ඒ නිසාම අප පසුගිය මාස තුනක හතරක කාලයේ ලාභදායී තත්ත්වයට පැමිණියා. ඒ වගේම දෙසැම්බර්, ජනවාරි සහ පෙබරවාරි කියන්නේ ඉතාම අමාරු මාස කිහිපයක්. අප පසුගිය නොවැම්බර් මාසයේදී රුපියල් මිලියන 165ක පමණ දැන්වීම් ආදායමක් ලබා ගත්තා. නමුත් එය දෙසැම්බර් මාසයේදී රුපියල් මිලියන 130 පමණ දක්වා පහත වැටෙනවා. මේ තත්ත්වය තුළ යම්කිසි සුබදායී තත්ත්වයක් එන්නේ මාර්තු මාසයේදියි. මෙය සෑම වසරකම තිබෙන තත්ත්වයක්. ඒ මාස තුන ඉතාම අමාරු කාලයක්. මේ මාස කිහිපයේදී ලාභ නොලැබුවත් අලාභය අවම කරගෙන කටයුතු කිරීම අපේ අරමුණ වෙනවා. ඒ වෙනුවෙන් මෙවැනි සේවාවන් අපට උපකාරී වෙනවා. ඉදිරියේදී ටෙන්ඩර් කැඳවීම්වලදී වරලත් ගණකාධිකාරිවරයකුගේ සේවය ලබාගෙන විධිමත් ආකාරයෙන් සිදු කරන්න අප බලාපොරොත්තු වෙනවා. කඩදාසි ආනයනය කිරීමේදී සෘජු ඒජන්සි කිහිපයක් හරහා කටයුතු කරන්න හැකි නම් අපට විශාල මුදලක් ඉතිරි කර ගන්න අවස්ථාව සැලසෙනවා. අපේ අදහස් පමණක් නොව, සේවකයන්ගේ ද අදහස් ඇතිව අප ඉදිරියට යන්න බලාපොරොත්තු වෙනවා. අප කණ්ඩායමක් ලෙස එකට වැඩ කළ යුතුයි. එමඟින් ඉදිරියට යා හැකි වෙනවා. මේ දක්වා මා වෙත ලබා දුන් සහයෝගය අගය කරනවා. ලේක්හවුස් ආයතනයට තවදුරටත් ඉදිරියට ගමන් කිරීමට හැකි ක්‍රමවේදයක් සකස් කරන්න අවශ්‍ය පියවර ගන්නවා.’’

සෝලා සමූහ ව්‍යාපාරයේ සභාපති චාමින්ද අබේගුණසේකර, ලංකාවේ සීමාසහිත එක්සත් ප්‍රවෘත්ති පත්‍ර සමාගමේ මෙහෙයුම් අධ්‍යක්ෂ නීතිඥ ප්‍රභාත් මංජුල මාකුඹුර, කර්තෘ මණ්ඩල අධ්‍යක්ෂ සිසිර පරණතන්ත්‍රී, සාමාන්‍යාධිකාරි සුමිත් කොතලාවල, අතිරේක සාමාන්‍යාධිකාරි වී.එස්. බොයිස්, නියෝජ්‍ය සාමාන්‍යාධිකාරි (ආයතනික කටයුතු) චන්දන බණ්ඩාර, දිනමිණ ප්‍රධාන කර්තෘ ගාමිණී ජයලත්, සන්ඩේ ඔබ්සර්වර් ප්‍රධාන කර්තෘ දිනේෂ් වීරවංශ, ඩේලිනිව්ස් ප්‍රධාන කර්තෘ ජයන්ත ශ්‍රී නිශ්ශංක, තිනකරන් ප්‍රධාන කර්තෘ ටී. සෙන්තිල්වෙලවර්, ජ්‍යේෂ්ඨ ප්‍රවාහන කළමනාකාර තිස්ස ධම්මික මහත්වරුන් ඇතුළු පිරිසක් මේ අවස්ථාවට එක්ව සිටියහ.

අයවැය තෙවන වර කියවීම වැඩි ඡන්ද 43 කින් පාර්ලිමේන්තුවේදී සම්මත විය. අයවැයට පක්ෂව ඡන්ද 123 ක් ලැබුණු අතර විරුද්ධව ලැබුණේ ඡන්ද 80 ක් පමණි. මන්ත්‍රීවරු දෙදෙනෙක් ඡන්දය දීමෙන් වැළකී සිටියහ.

ලංකා කම්කරු කොංග්‍රසයේ පාර්ලිමේන්තු මන්ත්‍රීවරුන් වන ජීවන් තොණ්ඩමාන්, එම් රාමේෂ්වරන් යන මහත්වරුන් සහ ශ්‍රිී ලංකා නිදහස් පක්ෂය නියෝජනය කරන පාර්ලිමේන්තු මන්ත්‍රි දුමින්ද දිසානායක මහතා මෙන්ම ආණ්ඩුවේ සිට ස්වාධීනව විපක්ෂයේ අසුන් ගත් පාර්ලිමේන්තු මන්ත්‍රීවරුන් වන ඩබ්ලිව් ඩී ජේ සෙනෙවිරත්න, ප්‍රියංකර ජයරත්න, සුදර්ශනී ප්‍රනාන්දුපුල්ලේ හා ජාතික කොංග්‍රසයේ මන්ත්‍රි ඒ එල් එම් අතාවුල්ල යන මහත්ම මහත්මීහු අයවැයට පක්ෂව ඡන්දය ප්‍රකාශ කළහ.

අයවැයට විරුද්ධව ඡන්දය ප්‍රකාශ කළේ සමගි ජන බලවේගය ජාතික ජන බලවේගය ශ්‍රිී ලංකා නිදහස් පක්ෂය උත්තර සභාගය නිදහසේ ජාතික සභාව සහ ආණ්ඩුවේ සිට ස්වාධීන වු මන්ත්‍රීවරුන් පිරිසක් පමණි.

අයවැය සඳහා ඡන්දය විමසන අවස්ථාවේදී දෙමළ ජාතික සන්ධානයේ මන්ත්‍රිවරුන් සභා ගැබේ නොසිටි අතර දෙමළ ජනතා ජාතික පෙරමුණේ පාර්ලිමේන්තු මන්ත්‍රී සී වී විග්නේෂ්වරන් සහ සමගි ජන බලවේගයේ පාර්ලිමේන්තු මන්ත්‍රී වේඵකුමාර් යන මහත්වරු ඡන්දය ප්‍රකාශ කිරීමෙන් වැලකී සිටියහ.

ඡන්දය විමසන අවස්ථාවේ සභා ගැබේ නොසිටි මන්ත්‍රීවරුන් ගණන 19 කි. පාර්ලිමේන්තු මන්ත්‍රී කුමාර වෙල්ගම මහතා අසනීප තත්ත්වය හේතුවෙන් ඡන්ද විමසීමට සහභාගි වී නොමැත.

මේ දිනවල මාලදිවයින තුළ අමෙරිකානු ඩොලර් බිලියනයකට වඩා වැඩි වටිනාකමකින් යුත් ඉදිකිරීම් රාශියක් සිදු කරමින් පවතින නිසා එහි වැඩි අවස්ථා ප්‍රමාණයක් ශ්‍රී ලංකාවට ලබාදීමට කඩිනමින් දෙරට අතර පුළුල් සාකච්ඡා වටයක් ඇරඹිය යුතු බව මාලදිවයිනේ උපජනාධිපති ෆයිසාල් නසීම් මහතා ප්‍රවාහන, මහාමාර්ග හා ජනමාධ්‍ය ඇමැති, ආචාර්ය බන්දුල ගුණවර්ධන මහතා හමුවේ පවසා ඇත.

දැනටමත් එම ඉදිකිරීම් ව්‍යාපෘති තුළ ශ්‍රී ලංකාවේ පෞද්ගලික අංශයේ ඉදිකිරීම් ක්ෂේත්‍රයේ සමාගම් කිහිපයක් එම කටයුතුවල නියැළෙමින් සිටින බවද උපජනාධිපතිවරයා සඳහන් කර තිබේ.

එමෙන්ම උසස් අධ්‍යාපන හා තාක්ෂණික අධ්‍යාපනය සඳහා ජාත්‍යන්තර මට්ටමේ පිළිගැනීමක් ඇති උසස් අධ්‍යාපන ආයතන තවදුරටත් බිහි වන්නේ නම් එරටින් වැඩි ශිෂ්‍ය සංඛ්‍යාවක් මෙරටට පැමිණ අධ්‍යාපනය ලැබීමට වැඩි කැමැත්තක් දක්වන බවත් උපජනාධිපතිවරයා මෙහිදී අවධාරණය කර ඇත.

මාලදිවයිනේ උප ජනාධිපතිවරයා මේ අදහස් දක්වා ඇත්තේ ප්‍රවාහන, මහාමාර්ග හා ජනමාධ්‍ය ඇමැති, ආචාර්ය බන්දුල ගුණවර්ධන මහතා සමඟ පෙරේදා (03) පැවැති හමුවේදීය.

ශ්‍රී ලංකාවේ සංචාරක ව්‍යාපාරය ප්‍රවර්ධනය සඳහා මාලදිවයින හරහා සංචාරකයක් වැඩි පිරිසක් මෙරටට ගෙන්වා ගෙන ඩොලර් අාදායම ඉහළ නංවා ගැනීමට ඉඩකඩ තිබෙන බවද මෙහිදී පෙන්වා දී ඇති උපජනාධිපතිවරයා, කලින් පවත්වාගෙන ගිය දෙරට අතර සෘජු ගුවන්වාර අවම වී තිබීම ඊට බාධවක් බවද සඳහන් කර තිබේ.

එසේම මාලදිවයින හා කොළඹ අතර අනෙකුත් ගුවන් සමාගම් අයකරන වැඩි වීමද ඊට බාධාවක්ව ඇති බවත්, පෞද්ගලික අංශයේ ගුවන් සමාගම් මෙරටට පැමිණීමට අවසර ඉල්ලා තිබුණත් එසේ අවසර නොලැබීමේ තත්ත්වය තුළ ඊට බාධාවන් මතුව තිබෙන බවද පෙන්වා දී තිබේ. 

උපජනාධිපතිවරයා මේ බව පවසා ඇත්තේ, වර්තමානයේ ශ්‍රී ලංකාවේ ඉදිකිරීම්, අධ්‍යාපන හා සංචාරක ක්ෂේත්‍රයන්හි පවත්නා ගැටලු පිළිබඳව ඇමැති, ආචාර්ය බන්දුල ගුණවර්ධන මහතා කළ කරුණු පැහැදිලි කිරීමකට පිළිතුරු වශයෙනි.

මාර්ග සංවර්ධන අධිකාරිය හා මඟ නැඟුම වැනි ආයතන යටතේ ඉංජිනේරුවන් 700ක් සහ රජයේ ලියාපදිංචි කොන්ත්‍රාත්කරුවන් 7000ක් සිටින බවත් ඔවුන්ට ඉදිකිරීම් ක්ෂේත්‍රය තුළ අධිවේගී මාර්ග, මහාමාර්ග, පාලම්, විදුලි කණු සවිකිරීම්, සිල්පර කොටන් ඇතිරීම, ෆයිලින් වැනි ඕනෑම ක්ෂේත්‍රයක ඉදිකිරීම් සඳහා දායක විය හැකි බව ඇමැති, අාචාර්ය බන්දුල ගුණවර්ධන මහතා මෙහිදී අවධාරණය කර ඇත.

ශ්‍රී ලංකාව පසුගිය දා මුහුණ දුන් ආර්ථික පසුබෑම හේතු කොට ගෙන ඉදිකිරීම් ක්ෂේත්‍රයේ කොන්ත්‍රාත්කරුවන්ගේ වැඩ කටයුතු බොහෝ දුරට ඇණ හිට ඇති බවත් ඔවුන් සතු මානව සම්පත්, උපකරණ, යන්ත්‍ර සූත්‍ර ඌණ උපයෝජනයකට ලක්ව ඇති මේ අවස්ථාවේ මාලදිවයිනේ ඉදිකිරීම් ක්ෂේත්‍රය තුළ ඔවුන්ට අවස්ථාව ලබාදෙන්නේ නම් වගකීම් සහගතව එම කාර්යයන් ඉටුකිරීමට ශ්‍රී ලංකාවට ශක්තිය තිබෙන බවද ආචාර්ය, බන්දුල ගුණවර්ධන මහතා පෙන්වා දී තිබේ.

එමෙන්ම මෙරට පුහුණු ගුරුවරුන්ගේ හා තාක්ෂණික ශිල්පීන්ගේ හැකියාවන් මාලදිවයිනේ අධ්‍යාපන කටයුතු වෙනුවෙන් යොදා ගත හැකි ආකාරය ගැන ද මෙහිදී අමාත්‍යවරයා හා උපජනාධිපතිවරයා අතර සාකච්ඡා සිදු කර ඇත. මේ සාකච්ඡාවෙන් අනතුරුව මේ වසර නිමවීමට පෙරාතුව මාලදිවයිනේ ව්‍යාපාරික ප්‍රජාවට මෙරට බලධාරීන් හා ව්‍යාපාරික ප්‍රජාව හමුවීමට එක් දින වැඩමුළුවක් තමන් මැදිහත්ව සංවිධාන කරන බව උපජනාධිපතිවරයාට පොරොන්දු වූ බවද ඇමැති, ආචාර්ය බන්දුල ගුණවර්ධන මහතා දිනමිණට ඊයේ (04) පැවසීය.

ඒ අනුව ප්‍රවාහන හා මහාමාර්ග, වරාය, නාවික හා ගුවන්තොටුපොළ, සංචාරක, නාගරික සංවර්ධන අමාත්‍යාංශ ඒකාබද්ධව එම වැඩමුළුව සංවිධාන කිරීමට නියමිතය.

ශ්‍රී ලංකාවෙන් මාලදිවයිනට දිය හැකි ව්‍යාපාරික අවස්ථා ගැන ද එරට පෞද්ගලික අංශය දැනුවත් කිරීමට, මේ වැඩමුළුව කොළඹදී පැවැත්වීමට කටයුතු කරන බවද ඇමැතිවරයා කීවේය.

ඒ සඳහා ඉහත අමාත්‍යාංශ ලේකම්වරුන් සමඟ සාකච්ඡා කර වැඩමුළුව පැවැත්වීමට කටයුතු සූදානම් කරන්නැයි ප්‍රවාහන අමාත්‍යාංශ ලේකම් රංජිත් ප්‍රේමසිරි මහතාට පෙරේදා (03) දිනයේම උපදෙස් දුන් බව ද ඇමැතිවරයා පැවසීය.

සීමාසහිත එක්සත් ප්‍රවෘත්ති පත්‍ර සමාගම පාඩු පිට පාඩු ලබන බවට චෝදනා එල්ල වුව ද පසුගිය මාස කිහිපයේදී එය ලාභ ලබන තත්ත්වයට පත්ව ඇතැයි ජනමාධ්‍ය රාජ්‍ය ඇමැති ශාන්ත බණ්ඩාර මහතා පාර්ලිමේන්තුවේදී ඊයේ (28) ප්‍රකාශ කළේය.

ඔක්තෝබර් මාසයේ රුපියල් මිලියන 25ක් ද නොවැම්බර් මාසයේ රුපියල් මිලියන 30ක ද ලාභයක් ලබා ඇතැයි ද රාජ්‍ය ඇමැතිවරයා පැවසුවේය.

අය-වැය තුන්වැනිවර කියවීමේ විවාදයේදී ගාල්ල දිස්ත්‍රික් මන්ත්‍රී ශාන් විජයලාල් මහතා මතු කළ කරුණකට පිළිතුරු දෙමින් රාජ්‍ය ඇමැතිවරයා මේ බව පැවසුවේය.

රාජ්‍ය ඇමැති ශාන්ත බණ්ඩාර මහතා -

රාජ්‍ය බලපෑම නිසා රාජ්‍ය මාධ්‍ය ආයතන දුර්වලව ඇති බව පැවසුවා. එය වර්තමානයට අදාළ නැහැ. ඒ ආයතනවලට පූර්ණ නිදහස ලබා දී තිබෙනවා. ස්වයං මූල්‍ය උත්පාදන ආයතන ලෙස කටයුතු කිරීමේදී රජය බලපෑමක් කරන එකත් හොඳ නැහැ. පෞද්ගලික මාධ්‍ය හා රාජ්‍ය මාධ්‍ය ප්‍රවෘත්ති සමානයි. විපක්ෂයටත් විශාල වේලාවක් වෙන් කර තිබෙනවා ඔවුන්ගේ කරුණු ප්‍රචාරය සඳහා. මේ ආයතන පාඩු ලැබීමට හේතුවක් වනුයේ සේවකයන්ගේ වැඩි ප්‍රමාණය සහ පසුගිය කාලයේ කොවිඩ් නිසා සිදු වූ බලපෑම. සීමාසහිත එක්සත් ප්‍රවෘත්ති සමාගම පාඩු පිට පාඩු ලබන බවට චෝදනා ඉදිරිපත් වුණා. සතුටින් කිව හැකියි එහි සභාපතිවරයා ඇතුළු සේවක පිරිසගේ කැපවීම මත මේ ලාභය ලබා තිබෙනවා. ඔක්තෝබර් මාසයේ මිලියන 25 ක්, නොවැම්බර් මාසයේ මිලියන 30ක් දක්වා ලාභය දැන් වැඩි වෙලා තිබෙනවා. දෙසැම්බර් ටිකක් අඩු වෙයි. රටේ පැවැති තත්ත්වයත් සමඟ තමයි ඒ ඒ ආයතන පාඩු ලැබීම් සිදු වුණේ. මාධ්‍යවේදීන්ගේ සුබසාධනය සම්බන්ධයෙන් ද කටයුතු කරනවා. මාධ්‍යවේදීන්ට රක්ෂණාවරණයක් ලබාදීමට ද කටයුතු කරනවා. ප්‍රාදේශීය මාධ්‍යවේදීන්ට ද අවශ්‍ය සුබසාධන කටයුතු ලබාදීමට පියවර ගන්නවා.