පිබිදෙමු පොළොන්නරුව වැඩසටහන යටතේ රුපියල් මිලියන 14ක් වැය කරමින් ඉදිකළ මින්නේරිය හෙල බොජුන්හල සහ හරිත ප්‍රජා අලෙවි සංකිර්ණය ජනතා අයිතියට පවරා දීම ද ජනාධිපති ගරු මෛත්‍රීපාල සිරිසේන මැතිතුමාගේ ප්රධානත්වයෙන් සෙනසුරාදා (03) පෙරවරුවේ සිදු කෙරිණි.
සමරු ඵලකය නිරාවරණය කර හෙළ බොජුන් හළ විවෘත කළ ජනාධිපතිතුමා එහි නිරික්ෂණ චාරිකාවක ද නිරත විය.
ඓතිහාසික බෙල්ලන්විල රාජමහා විහාරයේ "යතිවර සමරු පහය" ගුණානුස්මරණ මන්දිරය විවෘත කිරීමේ පුණ්‍යෝත්සවය ජනාධිපති ගරු මෛත්‍රීපාල සිරිසේන මැතිතුමාගේ සහභාගිත්වයෙන් ඊයේ (04) පෙරවරුවේ පැවැත්විණි.
බෙල්ලන්විල විහාරස්ථානයේ හිටපු විහාරාධිපති පූජ්‍ය බෙල්ලන්විල සෝමරතන නායක හිමිපාණන් වහන්සේ සහ මහාචාර්ය පූජ්‍ය බෙල්ලන්විල විමලරතන අනුනායක හිමිපාණන් වහන්සේ ගුණානුස්මරණය කිරීම වෙනුවෙන් මෙම නව මන්දිරය ඉදි කර තිබේ.
අස්ගිරි පාර්ශ්වයේ මහානායක අතිපූජ්‍ය වරකාගොඩ ශ්‍රී ඥානරතන ස්වාමීන්වහන්සේ පුණ්‍යෝත්සවයේ මුලසුන හෙඹ වූ අතර ශ්‍රී ලංකා අමරපුර මහානිකායේ මහානායක අග්ගමහා පණ්ඩිත පූජ්‍ය කොටුගොඩ ධම්මාවාස ස්වාමීන්වහන්සේ ප්‍රමුඛ මහා සංඝරත්නය ද විපක්ෂ නායක මහින්ද රාජපක්ෂ මහතා ඇතුළු පක්ෂ විපක්ෂ දේශපාලන නියෝජිතයෝ රැසක් ද මෙම අවස්ථාවට එක්ව සිටියහ.
ණය ගෙවීමට හැකි ආර්ථිකයක් බිහිකිරීමට කටයුතු කළයුතු බව අග්රාමාත්ය රනිල් වික්රමසිංහ මැතිතුමා පවසයි. පසුගිය වසර කීපය තුළ අපනයන ආර්ථිකය දියුණු කරමින් සුළු හා මධ්‍යම පරිමාණයේ ව්‍යවසායකයන් බිහිකරමින් දෙස් විදෙස් ආයෝජන රටේ ඇති කරමින් සංචාරක ව්‍යාපාරයේ විශාල ප්‍රගතියක් අත්පත්කරගත් බව සිහිපත් කළ අගමැති, පාස්කු දිනයේ බෝම්බ ප්‍රහාර සිදු නොවුණා නම් ආර්ථිකයේ ඵලදායී දැවැන්ත පෙරළියක් සිදුවන බවත් ප්‍රකාශ කළේය.
මංතීරු හතරකින් හෙබි කඩුවෙල බියගම පාලම නිල වශයෙන් ජනගත කිරීම පෙරේදා (31) අගමැති රනිල් වික්රමසිංහ මහතා අතින් කඩුවෙලදී සිදුවුණේ සමරු ඵලකයක් නිරාවරණය කිරීමෙනි.අනතුරුව පැවැති මහජන රැස්වීමේදී අගමැතිවරයා මේ අදහස් පළ කළේය.
තම දරුවාගේ අනාගතයට ඉදිරි වසර දහයේ කුමන ප්‍රගතියක් සිදුවන්නේද යන්න කී දෙනෙකු සිතුවාදැයි යන්න ප්‍රශ්න කරමින් අගමැතිවරයා පෙන්වා දුන්නේ සිතිය යුත්තේ දරුවන්ගේ අනාගතය ගැන බවයි.
නවයුගයක නව දේශපාලනයට පිවිසීමේ අවශ්‍යතාව මතකයේ තබාගනිමින් ක්‍රියා කළයුතු බව අවධාරණය කළ අගමැතිවරයා, පාර්ලිමේන්තුවේ සිටින දෙසිය විසිපස් දෙනාටම වෙඩි තැබිය යුතු බවට ජනතාව නඟන හඬින් පැහැදිලි වන්නේ නව ප්‍රවණතාවක් රටේ ඇතිවිය යුතු බවයැයි ද සඳහන් කළේය. ඒ සඳහා තමයි විප්ලවීය ආර්ථික වෙනසක් රටේ සිදුකරමින් ලෝක වෙළෙඳපොළ ආක්‍රමණය කරගෙන ඉන්දීය සාගරයේ කේන්ද්‍රස්ථානය බවට අප රට පත්කරගැනීම අපගේ ඉලක්කය වී තිබෙන්නේ යැයිද අගමැතිවරයා ප්‍රකාශ කළේය.
ණය ගෙවීමට හැකි ආර්ථිකයක් රටේ ඇතිකරගැනීමට ඉදිරි වසර පහ තුළ ආර්ථිකයේ විශාල පිම්මක් පැනීම අරමුණ බවත් අගමැතිවරයා පැහැදිලි කළේය.
ශ්‍රී ලංකා මාර්ග සංවර්ධන අධිකාරිය රුපියල් මිලියන හාරසිය දොළහක ප්‍රතිපාදන මේ පාලම සඳහා වැය කළේය.
සියනෑ කෝරලයත් කොළොම්තොටත් යා කරන මේ පාලමේ දිග මීටර් දෙසිය අසූවකි. නව පාලමේ පළල මීටර් දහයයි දශම හතරකි. මංතීරු හතරකි. එක් පැත්තකට මගී මංතීරුව මීටර් එකයි දශම පහකි.
මේ අවස්ථාවට පැමිණි අගමැතිවරයා, දිවංගත ඇමැති එම්.ඩී.එච්. ජයවර්ධන මහතාගේ පිළිරුව හමුවේ පුෂ්පෝපහාර දැක්වූයේ පැමිණ සිටි මැති ඇමැතිවරු එක්කර ගනිමිනි. තිනියාවල පාලිත නාහිමියෝ පිරිස පංචශීලයේ පිහිටවනු ලැබීය. කඳුබොඩ අමරඥාන නාහිමි ඇතුළු මහා සංඝරත්නය, කතෝලික පූජකවරුන්ද මේ අවස්ථාවට එක්වූහ.
එහිදී වැඩිදුරටත් අගමැතිවරයා මෙසේද කීය.
ණය ගෙවීමට හැකි ආර්ථිකයක් ඇතිකර ගැනීමේදී අායෝජකයන් පැමිණෙනවා. නව නීති රීති සකස් වෙනවා. සංචාරකයන්ගේ පැමිණීමට ආකර්ෂණීය ක්‍රමවේද සැකසෙනවා. කොළඹ වරාය, මත්තල හම්බන්තොට ප්‍රජාවට නව ආර්ථික පුනරුදයක් ඇතිවෙනවා. අපනයන ආර්ථිකය ඉහළ නැංවීමට ක්‍රමවේද ඇති වෙනවා. ගම් නියම්ගම් පාසා නව තාක්ෂණය සැමටම ලබාදෙනවා. තවත් බොහෝ ක්‍රමවේද ණය ගෙවීමේ ආර්ථිකයට ඇතුළත් වෙනවා. හිඟන්නන් මෙන් හැමදාම ක්‍රියා කිරීමට නොහැකියි. හිස කෙළින් තබා‍ගෙන සැමට කටයුතු කළ හැකි පොහොසත් රටක් නිර්මාණය කරනවා.
මංතීරු හතරක පාලමක් බවට පත්වුණු මේ ස්ථානයේ අතීතයේ තිබුණේ තොටුපළක්. මතක අය මෙතන රැස්වෙලා සිටින පිරිස අතරේ ඉන්න පුළුවන්. ෂෙල්ටන් ඔබට එම අතීතය මතකයි නේද? මේ පාලම සෑදීමට ආරම්භක පදනම වැටුණේ මෙහෙමයි. එක්සත් ජාතික පක්ෂයේ ඇමැතිවරයකු ලෙස ක්‍රියා කළ දිවංගත එම්. ඩී.එච්. ජයවර්ධන මහතා 1977 ඡන්ද වැඩකටයුතු නිමා කර ගෙදර ගිහින් දුරකථනයෙන් මට කතා කළා. මේ ස්ථානයේ පාලමක් හදමු. ඒ සඳහා අපි දෙදෙනාම කතා කරමු කිව්වා. මැතිවරණය දිනාගෙන ඇමැති මණ්ඩලයට ගිහින් පාලමට මුදල් වෙන් කර ගත්තා. මට අවශ්‍ය වුණේ මංතීරු හතරක පාලමක් නිර්මාණය කරන්න. අනාගතය ගැන හිතලා එම අදහසේම ක්‍රියා කළා. එම්. ඩී.එච්. ඇමැතිතුමා පැවසුවේ මුලින්ම මංතීරු දෙකකට සීමා කර පසුව මංතීරු හතර දක්වා ගෙනයමු කියලා. එම අදහසට මම කැමති වුණා. මංතීරු හතරක පාලමක් නිර්මාණය කිරීමේ අදහස අතහැරියේ නෑ.
දිවංගත ප්‍රේමදාස අගමැතිතුමා ශ්‍රී ජයවර්ධනපුර කෝට්ටේ දියුණුව ඇති කිරීම පිළිබඳව කතා කළා. නව මාර්ග නිර්මාණය වුණා. කොටුවේ ඔරලෝසු කණුවේ සිට පාර්ලිමේන්තුව, රාජගිරිය දක්වා බැලුම්මහර පැත්තට ඒමට මාර්ගයක් තිබීමේ හොඳ අදහසක් තිබුණා. ඒ අනුව බියගම සපුගස්කන්ද බෙල්ල කපාපු හන්දිය (එතැනට කියන නම අදටත් මේ නම භාවිතා වෙනවා) දක්වා මාර්ගයක් ඇති කළා. පළමුවන මාර්ග පද්ධතිය එදා නිමකර වසර තිස්තුනකට පසුව දෙවන මාර්ග පද්ධතිය ඇතිවුණා. එම්. ඩී.එච්. ඇමැතිවරයා අදහස් පළ කළේ නැතිනම් මේ පාලම නෑ. මෙතැනදී තවත් අයකු සිහිපත් කළ යුතුයි. ඒ තමයි දිවංගත පෝල් පෙරේරා මන්ත්‍රීතුමා, එතුමාත් විශාල සහායක් ලබාදුන්නා. ඇමැති කබීර් හෂීම් මහතා මංතීරු හතරක පාලමක් ලෙස මෙය නිර්මාණය කර දුන්නා. වසර 2002 දී කොළඹ නගරයේ වට පාරක් නිර්මාණයට යෝජනා කළත් එදා එය සිදු කරන්න අපට නොහැකි වුණා.
කැලණි පාලම තව පුළුල් කර වරායට රාජගිරියට අතුරුගිරියට පුළුල් කරනවා. සැහැල්ලු දුම්රිය මාර්ග පැමිණෙනවා. මෙය සංචාරක ව්‍යාපාරයේ කොටසක්. රන් මාවත් වැඩසටහන යටතේ මාර්ග පද්ධතියේ උන්නතිය වෙනුවෙන් කබීර් ඇමැතිතුමා ඉටු කරන සේවයට ස්තුතියි. තවත් විශාල මාර්ග කොළඹ සිට හම්බන්තොටට පැමිණෙනවා. දඹුල්ල ත්‍රිකුණාමලය මාර්ග පද්ධති එනවා. මෙහිදී ඉඩම්වල පර්චස් එකක මිල ගණන් ලක්ෂ ගණනින් ශීඝ්‍රයෙන් ඉහළ යනවා. ඒ නිසා දැන්ම ඉඩම් විකුණන්න එපා. මාර්ග පද්ධති දියුණුවට විශාල වැඩසටහන් ඉදිරියේදී ක්‍රියාත්මක වෙනවා.
තාක්ෂණයෙන් රට පරිපූර්ණ කිරීමේ වගකීම භාරගෙන ඒ සඳහා කැපවීමෙන් ඇමැති සුජීව සේනසිංහ මහතා ලබාදෙන සහායට ප්‍රශංසා කරනවා. රටේ සෑම තැනම යමින් එක තැනක ඉන්නේ නැතුව එතුමා විශාල සේවයක් සිදු කරනවා.
වසර 1977 දිවංගත ජේ.ආර්. ජයවර්ධන මහතා ඇති කළ නව ආර්ථික විප්ලවය නිසා මාර්ග පද්ධති ඇතිවීමත් රට නව ආර්ථිකයකට පිවිසීමත් සිදුවුණා.
ගමේ නව ආර්ථිකයක් අප ඇති කරනවා. වසර 2015දී ආණ්ඩුව භාර ගත්තේ ණය කන්දක් සමඟයි. ඉන් පෙර ජාත්‍යන්තරයේ ණය ගත්තු උදවිය කොතරම් ණය ගත්තාදැයි කිවහොත් අපේ රටට ණය නොදෙන තත්ත්වයක් ජාත්‍යන්තරයේ තිබුණා. ඊට හේතුව ණය නොගෙවීමයි. මේ තත්තවය හමුවේ ණය ජාත්‍යන්තරයට ගෙවමින් ජාත්‍යන්තර විශ්වාසය අප දිනා ගත්තා. ඒ නිසා නැවත ජාත්‍යන්තරයෙන් අපට ණය ගැනීමට හැකිවුණා. ජාත්‍යන්තර ආධාර රටට අවශ්‍යයයි. ජාත්‍යන්තරයට ණය ගෙවීමට සිදුවීමෙන් අපි සේරම දුක්විඳිනවා. ආණ්ඩුවට දොස් පැවරුවත් සත්‍ය ජනතාව හමුවේ කියනවා.
සමාජ ආයෝජන සිදුකළා. සෞඛ්‍ය සේවයේ පෙර නොවූ විරූ පහසුකම් ලබාදුන්නා. බියගම රෝහලක් පිහිටුවනවා. ළඟම පාසල හොඳම පාසල බවට පත් කරමින් දරුවන්ට ටැබ් පරිගණක ලබාදෙමින් අධ්‍යාපනයේ සුවිශාල වෙනසක් සිදුකර තිබෙනවා. අමාත්‍යාංශ කීපයකින් නිවාස ඉදිකිරීම සිදුකරනවා. සමෘද්ධිය ලබාදුන්නා. ගමට මූල්‍ය පහුසකම් ලබාදෙමින් ගම්පෙරළිය යටතේ ගම සංවර්ධනය වෙනවා. සියලුම අංශවල සමාජ ආයෝජන යටිතල පහසුකම් සිදුවෙනවා.
වසර 2015ට වඩා බැංකු තැන්පත් ගිණුම්වල මුදල් තිබෙනවා. සමහර තැන්පතුවල මුදල් දෙගුණයක් වී තිබෙනවා. මේ ගැන බැංකුවලින් අසා දැනගන්න පුළුවනි. මුදල් නැතුව ඉදිරියට යෑමට නොහැකියි.
ගංවතුර නියඟ ස්වාභාවික විපත්වලින්ති බැටකමින් ප්‍රාදේශීය සභා ඡන්දය පැරදෙමින් දින පනස් හයේ අර්බුදයට මුහුණ දෙමින් සියලු අභියෝග ජයගනිමින් සංවර්ධනය දිගටම ගෙන ගියා. ඒ කිසිවකින් අපි පැරදුණේ නෑ.
ඉන්පසු පාස්කු දිනයේ බෝම්බ ප්‍රහාරය ඇතිවුණා. ඊට පෙර හොඳ ආර්ථිකයක් අපි ගොඩන‍ඟාගෙන තිබුණා. අවුරුදු උත්සව කීයක් නම් රට වටා සංවිධාන කර තිබුණාද. බෝම්බ ප්‍රහාරය නිසා ඒවා පැවැත්වීම නතර කළා.
පොලිසියට ස්තුතියි. සියලු තොරතුරු කඩිනමින් සොයාගෙන ඊට සම්බන්ධ සැවොම හඳුනාගත්තා. අත්අඩංගුවට ගත්තා. ත්‍රිවිධ හමුදාවත් රටේ ආරක්ෂාවට හොඳ සහායක් ලබාදුන්නා. ඒ ගැනත් ස්තුතිවන්ත වෙනවා.
මේ වනවිට පොලිසිය, දෙසිය දෙනෙකු අත්අඩංගුවට ගෙන තිබෙනවා. රැඳවුම් නියෝග මත ප්‍රශ්න කිරීම්ද සිදුකරනවා. ත්‍රස්තවාදීන්ට යම්තම් හෝ සබඳතා පැවැත්වූ සෑම අයකු ගැනම සොයා බලන්න උපදෙස් දී තිබෙනවා. අමෙරිකාවේ එෆ් බී අයි සේවාව මා සමඟ පැවසුවේ මාස දෙකක් තුළදී සැකකරුවන් අත්අඩංගුවට ගෙන සියලුම තොරතුරු සොයාගැනීම පිළිබඳව විමතියට පත්වන බවයි. මෙවැනි සොයාගැනීම් වෙනත් රටක සිදු වී නැති බව ඉන් පැහැදිලි වෙනවා.
බෝම්බ පිපිරීම සමඟ එම කාල පරාසයේ විශාල බියකින් ජනතාව කාලය ගෙව්වා. කිසිවකු එළිපෙහෙළියට ගියේ නෑ. වර්තමානය වන විට විශාල විශ්වාසයක් රටේ ඇති වී තිබෙනවා.
මෙවර කතරගම උත්සවයට ඉතිහාසයේ වැඩිම පිරිස සහභාගි වී තිබෙනවා. උත්සවය අවසන් වුන දිනයේ පැමිණි සෙනඟ කන්දරාව ඉතිහාසගත වෙනවා. රටේ ආරක්ෂාව තහවුරු වී තිබීම පිළිබඳව කදිම නිදර්ශනයක් ලෙස මෙය දැක්වූවා.
ඇතිවුණු බෝම්බ ප්‍රහාර වැනි සිදුවීම් නැවත ඇති නොවීමට අප සැවොම ක්‍රියා කළ යුතුයි. අප සැවොම නිරතුරුව විමසිල්ලෙන් සිටීම වැදගත්. සිදුවුණු කුමන්ත්‍රණ සියල්ල නිමයි යන මතයේ පිහිටා ක්‍රියා නොකළ යුතුයි.
ඇතිවුණ සිදුවීම් හමුවේ ආණ්ඩුව වැටෙනවා. වැටුණු ආර්ථිකය ගොඩ ගැනීමට නොහැකියි. ඇතැමුන් පැවසුවත් ඒ සියල්ල අසත්‍ය බවට දැන් ඔවුන්ට වැටහී තිබෙනවා.
සංචාරකයන් ලක්ෂයකට වඩා මේ වසරේ රටට පැමිණියා. දෙසැම්බරයේ සංචාරක පැමිණීම සංචාරක කර්මාන්තයෙන් ඉහළ ආදායම් ලැබීමට ක්‍රමවේද සකසා තිබෙනවා. ගුවන්ගමන් ගාස්තු, හෝටල් ගාස්තු මිල ගණන් පහත දමා තිබෙනවා. නොවැම්බර් දෙසැම්බර් මාසවලදී සංචාරක ව්‍යාපාරයේ නැවත දියුණුවක් ලබාගැනීම අරමුණ වී තිබෙනවා. ප්‍රශ්න තියෙනවා. පාඩු ලැබීම් තියනවා. රුපියල් මිලියන දෙසීයක පාඩුවක් බෝම්බ ප්‍රහාර නිසා සිදුවුණා. ඊටත් වඩා මිල කළ නොහැකි මිනිස් ජීවිත අහිමි වුණා.
සැප්තැම්බර් මාසය වනවිටදී ආර්ථිකයේ හොඳ වෙනසක් ඇති කරනවා. ඒ අනුව වසර අවසානය වන විටදී ස්ථාවර ආර්ථිකයකට රට පත් කරනවා.
අනාගතයේදී කඩුවෙල බියගම විශාල නාගරික සංකීර්ණයක් බවට පත්වෙනවා. නාගරික දියුණුව අවිස්සාවේල්ල දක්වාත් දීර්ඝ කරනවා. හෝමාගම දක්වා දැනටමත් නාගරික දියුණුව පුළුල් කිරීමට සැලසුම් තිබෙනවා.
අභියෝගවලට නොබියව මුහුණ දීමට ශක්තිය තිබෙනවා. මා කෙතරම් බැණුම් අසනවාද මා තරම් බැණුම් අසන්නකු තවත් නෑ. ඒ බැන්නාට කමක් නෑ. රටට හොඳ ස්ථාවර ආර්ථිකක් ලබාදී මහජන සුබසිද්ධිය ඇතිකර පොහොසත් රටක් නිර්මාණය කිරීමට දිවිහිමියෙන් ක්‍රියා කරනවා. සීතාවක රාජසිංහ රජුගේ බග කොටුව වුණු කඩුවෙලට පැමිණි ඔබ සැම හමුවීමට ලැබීම අභිමානයක් ලෙස සලකනවා. පාලමේ වැඩ කටයුත්තකටම සම්බන්ධ වුණු ඉදිකිරීම සිදුකළ සෑම තරාතිරමකම සේවකයන්ට කෘතඥතාව පළ කරනවා.
අමරපුර සිරි සද්ධම්මවංශ මහා නිකායේ ඌව පළාත් ප්රධාන සංඝනායක පදවියෙන් පිදුම් ලද පූජ්‍ය ගල්ගොඩගම සෝභිත නායක ස්වාමින් වහන්සේ වෙත අක්තපත්‍ර පිළිගැන්වීමේ පුණ්‍ය මහෝත්සවය ජනාධිපති ගරු මෛත්‍රීපාල සිරිසේන මැතිතුමාගේ ප්රධානත්වයෙන් අද (01) පෙරවරුවේ බණ්ඩාරවෙල නගරශාලා ශ්‍රවණාගාරයේ දී පැවැත්විණි.
අභිනව නායක හිමිපාණන් වහන්සේ වෙත විජිණිපත පිළිගැන්වීම ජනාධිපතිතුමා අතින් සිදු විය.
සමස්තලංකා අමරපුර මහා සංඝ සභාවේ මහ ලේඛකාධිකාරී පණ්ඩිත ආචාර්ය පූජ්‍ය පල්ලේකන්දේ රතනසාර අනුනායක ස්වාමින් වහන්සේ, ඌව මඩකලපුව තෙපළාතේ ප්රධාන සංඝනායක පූජ්‍ය කහත්තේවෙල සිරි නිවාසාභිධාන නායක ස්වාමින් වහන්සේ ප්‍රමුඛ මහා සංඝරත්නය ද, හිටපු අමාත්‍ය නිමල් සිරිපාල ද සිල්වා, ආණ්ඩුකාර රජිත කීර්ති තෙන්නකෝන්, ඌව පළාත් ප්රධාන අමාත්‍ය චාමර සම්පත් දසනායක යන මහත්වරුන් ඇතුළු පළාතේ දේශපාලන නියෝජිතයන් රැසක් සහ සැදැහැවතුන් මෙම උත්සවයට එක්ව සිටියහ.
"පොළොන්නරුව" පර්යේෂණාත්මක ශාස්ත්‍රීය සංග්‍රහය සහ "Moragahakanda Dream Reservoir" ග්‍රන්ථ ද්විත්වය ජනගත කිරීම ජනපති ප්රධානත්වයෙන් ...
"පොළොන්නරුව" නරපති යුගයේ සිට ජනපති යුගය දක්වා ශාස්ත්‍රීය සංග්‍රහය සහ, "Moragahakanda Dream Reservoir" , යන ග්‍රන්ථ ද්විත්වය ජනගත කිරීමේ උත්සවය ජනාධිපති ගරු මෛත්‍රීපාල සිරිසේන මැතිතුමාගේ ප්රධානත්වයෙන් අද (31) පස්වරුවේ කොළඹ බණ්ඩාරනායක ජාත්‍යන්තර සම්මන්ත්රණ ශාලාවේ දි පැවැත්විණි.
නව දැනුම උකහා ගැනීමත්, අතීතය හා සබැඳි වර්තමානය තරණය කොට සක්‍රිය අනාගතයත් කරා එළැඹීම සඳහා ජනාධිපති ගරු මෛත්‍රීපාල සිරිසේන මැතිතුමාගේ අපේක්ෂාවන් ඉටු කරමින් මේ ග්‍රන්ථ සම්පාදනය කොට තිබේ.
ශ්‍රී ලාංකේය ඉතිහාසයේ පොළොන්නරුවට හිමිවන්නේ අද්විතීය ස්ථානයකි. වසර එකසිය හැට හයක් පමණ පැවති ඓතිහාසික පොළොන්නරු රාජ්‍ය බිඳවැටීමෙන් පසුව මින්නේරිය ගොවි ජනපද ව්‍යාපාරය ආරම්භයත් සමග යළිත් වරක් මෙම පළාත් තුළ ජනාවාසකරණය ඇරඹීණි. එමෙන්ම මෙම ප්‍රදේශය ජාතියට බත සපයන සශ්‍රීක භූමි භාගයකින් හෙබි, ඓතිහාසික වටිනාකම් රැසක් සහිත පළාතකි.
මෙම ප්‍රදේශය ආශ්‍රිතව ගොඩනැගුණු අනුස්මරණීය ඉතිහාසය සහ පසුකාලීන ක්‍රමික සංවර්ධනය මුද්‍රිත ප්‍රකාශයක් ලෙස එළිදක්වමින් "පොළොන්නරුව" ශාස්ත්‍රීය සංග්‍රහය සම්පාදනය කොට තිබේ.
ඓතිහාසික අර්ථකථනයන්ට පමණක් ගෝචර නොවී හුදු ජනයාගේ පිපාසාව සංසිදුවීම පිණිස සමාන විෂය ක්ෂේත්‍රයන්ගෙන් විසංයුක්ත ලිපි සරණියක් මෙහි ඇතුළත්ය.
ග්‍රන්ථ ද්විත්වය එළිදක්වමින් මහා සංඝරත්නය වෙත ග්‍රන්ථ පිළිගැන්වීම ජනාධිපතිතුමා අතින් සිදු විය.
පාසල් සිසුන්ට, විශ්වවිද්‍යාල සඳහා මෙන්ම විද්‍යාර්ථයන් වෙත සංකේතාත්මකව ග්‍රන්ථ පිළිගැන්වීම ද ජනාධිපතිතුමා අතින් සිදු කෙරිණි.
මේ අතර ශ්‍රී ලංකා ටෙලිකොම් ආයතනයේ Kiyawamu.lk ඔස්සේ ඊ ග්‍රන්ථයක් සහ කථන ග්‍රන්ථයක් ලෙස ග්‍රන්ථය ප්‍රකාශයට පත් කෙරුණේ ද ජනාධිපතිතුමා අතිනි.
ලේඛක මණ්ඩලය වෙත සිහිවටන තිළිණ පිළිගැන්වීම ද ජනාධිපතිතුමා අතින් සිදු විය.
සමස්ත ලේඛක මණ්ඩලයේ සුභාශිංසන ජනාධිපතිතුමා වෙත පිළිගන්වමින් සමරු තිළිණයක් ජනාධිපතිතුමා වෙත ද පිළිගැන්විණි.
මහා සංඝරත්නය ප්‍රමුඛ අන්‍යාගමික පූජකවරුන් ද, අග්රාමාත්ය රනිල් වික්රමසිංහ, කථානායක කරූ ජයසූරිය යන මහත්වරුන් ඇතුළු පක්ෂ විපක්ෂ මැති ඇමතිවරු රැසක් ද, රාජ්‍ය නිලධාරින්, විද්වතුන්, කලාකරුවන් ඇතුළු සම්භාවනීය ආරාධිත පිරිසක් උත්සවයට එක්ව සිටියහ.
අප්‍රේල් 21 වනදා සිදුවීමෙන් බිඳුණු හදවත් යළි එක් කිරීමට ආගමික නායකයන් නායකත්වය ගත යුතු අතර පටු දේශපාලන න්‍යාය පත්‍ර පසෙකලා දේශපාලනඥයන් ද ඒ සඳහා ජාතියේ වගකීම ඉටුකළ යුතු බව ජනාධිපතිතුමා අවධාරණය කරයි.
ජනාධිපති ගරු මෛත්‍රීපාල සිරිසේන මැතිතුමා මේ බව ප්‍රකාශ කළේ කොළඹ නෙළුම් පොකුණ රඟහලේ පැවති සාමය, සමගිය සහ සහජීවනය සඳහා වූ ජාතික සමුළුව අමතමිනි.
අප්‍රේල් 21 වනදා සිදුවීමෙන් අහිමි වූ ජීවිත නැවත ලබාදිය නොහැකි වුවත් අන්තවාදය පරාජය කර මතු පරපුර වෙනුවෙන් රට තුළ සාමය, සමඟිය සහ සහජීවනය තහවුරු කිරීමට සියලුදෙනාට එකට එක් විය හැකි බව ජනාධිපතිතුමා පෙන්වා දුන්නේ ය.
මෙහි දී අදහස් දැක්වූ ජනාධිපතිතුමා වැඩිදුරටත් සඳහන් කළේ අප්‍රේල් 21 සිදුවීමත් සමග රටේ ජනතාව අතර ඇති වූ වෛරය, බිය, සැක සහ අවිශ්වාසය තුරන් කිරීමට රජයක් ලෙස ගත හැකි සෑම පියවරක්ම ගෙන තිබෙන බවයි.
සාමය, සහෝදරත්වය සහ සහජීවනය ගොඩනැංවීම උදෙසා කැපවීමෙන් කටයුතු කරනවා සේම ත්‍රස්තවාදය විනාශ කිරීමට ද කැපවි සිටින බව අවධාරණය කළ ජනාධිපතිතුමා ත්‍රස්තවාදයට රටේ කිසිදු තැනක ඉඩක් ලබා නොදෙන බවත් එය විනාශ කිරීම වෙනුවෙන් රාජ්‍ය බලය උපරිම ලෙස යොදවා තිබෙන බවත් පැවසීය.
මේ අතර ජනාධිපතිතුමා වැඩිදුරටත් කියා සිටියේ රටේ ජාතික සමගිය වෙනුවෙන් සියලු ආගමික නායකයන්ගේ මඟපෙන්වීමෙන් සියලු දේශපාලන පක්ෂ එක මතයකට පැමිණිය යුතු බවයි.
ඒ අනුව ජනතාව අතර බිය සැක සහ අවිශ්වාසය ඇතිකරන ක්‍රියාවන්ගෙන් සහ හැසිරීම්වලින් සියලුදෙනා බැහැරව කටයුතු කිරීමේ වගකීම ද ජනාධිපතිතුමා පෙන්වා දුන්නේ ය.
ති‍්‍රපිටක සංරක්ෂණ මණ්ඩලයේ සාමාජිකයන් වෙත පත්වීම් ලිපි පිළිගැන්වීම ජනාධිපති ගරු මෛතී‍්‍රපාල සිරිසේන මැතිතුමාගේ ප්රධානත්වයෙන් ඊයේ ජනාධිපති කාර්යාලයේ දී සිදු විය.
මල්වතු පාර්ශ්වයේ අනුනායක පූජ්‍ය නියංගොඩ විජිතසිරි, අස්ගිරි පාර්ශ්වයේ අනුනායක පූජ්‍ය ආණමඩුවේ ධම්මදස්සි, සෝමාවති රජමහා විහාරාධිපති පූජ්‍ය පහමුණේ සුමංගල, පූජ්‍ය මැදගම ධම්මානන්ද, පූජ්‍ය ති‍්‍රකුණාමලයේ ආනන්ද යන නායක ස්වාමින් වහන්සේලාගේ මූලිකත්වයෙන් ගිහි පැවිදි සාමාජිකයන් 43 දෙනෙකුගෙන් යුත් කණ්ඩායමකින් යුතුව ජනාධිපතිතුමා විසින් මෙම ති‍්‍රපිටක සංරක්ෂණ මණ්ඩලය පත් කර තිබේ.
වසර දෙදහස් පන්සියයකට අධික කාලයක සිට වර්තමානය දක්වා මෙරට භික්ෂු පරම්පරාවේ දායකත්වයෙන් සුරක්ෂිතව රැුගෙන ආ නිර්මල ථෙරවාදි බුදු දහම ඇතුළත් ති‍්‍රපිටකය ජාතික උරුමයක් කිරීමට ජනාධිපතිතුමා පසුගියදා පියවර ගත් ඉන් නොනැවති ථෙරවාදි ති‍්‍රපිටකය ලෝක උරුමයක් ලෙස සංරක්ෂණය කිරීමට අදාළ වැඩපිළිවෙළ ද සකස් කරන ලදී.
අධර්මවාදී බලවේගවලින් ති‍්‍රපිටක ධර්මය ආරක්ෂාකර ගැනීමේ පරම චේතනාව ඇතිව මෙරට රාජ්‍ය නායකයෙකු සම්බුද්ධ ශාසනය වෙනුවෙන් සපුරාලූ ඓතිහාසික කාර්යභාර්ය සනිටුහන් කරමින් ජනාධිපතිතුමා එම ජතික වගකීම ඉටු කළ අතර ජනාධිපතිතුමා විසින් අද දින පත් කරන ලද ති‍්‍රපිටක සංරක්ෂණ මණ්ඩලයේ අනුමැතියෙන් තොරව ඉදිරියේ දී ති‍්‍රපිටකය නැවත මුද්‍රණය හෝ සංස්කරණය සපුරා තහනම් වනු ඇත.
එඩින්බරෝ ආදිපාද ජාත්‍යන්තර තිළිණ ප්‍රදානෝත්සවය අග්රාමාත්ය රනිල් වික්රමසිංහ මහතාගේ ප්රධානත්වයෙන් ඊයේ (31) දින අරලියගහ මන්දිරයේදී පැවැත්විණි.
ජාතික තරුණ සේවා සභාව විසින් සංවිධානය කර තිබූ මෙම උත්සවයට එහි සභාපති සහ අධ්‍යක්‍ෂ ජෙනරාල් නීතිඥ එරංග වැලිඅංගේ, ජාතික යෞවන තිළිණ අධිකාරියේ ජාතික අධ්‍යක්‍ෂක තිස්ස සමරසිංහ යන මහත්වරුන් ප්‍රමුඛ ජාතික තරුණ සේවා සභාවේ සහ ජාතික යෞවන තිළිණ අධිකාරියේ නිලධාරී මහත්ම මහත්මීන්ද , තිළිණලාභින් රැසක් ද සහභාගි වී සිටියහ.
2019 කන්ද උඩරට ඇසළ පෙරහර මංගල්ලය වෙනුවෙන් මාධ්‍ය දැනුවත් කිරීමේ සාකච්ඡාවක් අද (31) පෙරවරුවේ ජනමාධ්‍ය අමාත්‍යංශ ශ්‍රවණාගාරයේදී පැවැත්විය. මෙම අවස්ථාවට සමගාමීව ඇසළ පෙරහැර මංගල්‍යය සඳහා මාධ්‍ය ප්‍රචාරය ලබාදිය හැකි ආකාරය පිළිබඳව මාධ්‍ය ආයතන ප්‍රධානීන් සමග විශේෂ සාකච්ඡාවක් ද, පැවැතිවිණ. ජනමාධ්‍ය අමාත්‍යංශයේ ලේකම් සුනිල් සමරවීර මහතා සහ දළදා මාලිගාවේ දියවඩන නිලමේ ප්‍රදීප් නිලංග දෑල මහතාගේ ප්රධානත්වයෙන් පැවති මෙම මාධ්‍ය දැනුවත් කිරීමේ රැස්වීමේ දී මෙවර පෙරහර මංගල්ලය පැවැත්වෙන දින වකවානූ පිළිබඳ නිල වශයෙන් ප්‍රකාශයට පත් කරන ලදී.
රටේ ජාතික උරුමයක් වන දළදා ඉතිහාසය සම්බන්ධ මෙම පෙරහැර වාර්ෂිකව පැවැත්වීම මගින් එහි සංස්කෘතික වටිනාකම් අනාගත පරපුරට දැකගැනීම සඳහා ආරක්ෂා කිරීමේ වැදගත්කම ජනමාධ්‍ය ලේකම් සුනිල් සමරවීර මහතා, උපරිම ආරක්ෂාවක් සලසා ඇති, උත්කර්ෂවත් අන්දමින් පැවැත්වීමට නියමිත මෙවර පෙරහැර සඳහා සියලු මාධ්‍ය මගින් පුළුල් ප්‍රචාරයක් ලබාදීමට කටයුතු කිරීමේ වැදගත්කම ද, පෙන්වා දුන්නේ ය.
අගෝස්තු මස 2 වන දින කප් සිටුවීමෙන් ආරම්භ වන මෙම පෙරහැර මංගල්‍යයය 15 වනදා උදෑසනින් අවසන්වීමට නියමිතය. පෙරහැර නැරැඹීම සඳහා සහභාගිවන ශ්‍රී ලාංකිකයන් මෙන්ම විදේශීය රටවලින් පැමිණෙන සැදැහැවතුන්ට ආරක්ෂාව සැපයීම සඳහා විශේෂ ආරක්ෂක වැඩපිළිවෙලක් සකසා ඇති බව ප්‍රදීප් නිලංග දෑල මහතා පැවැසීය. ඒ සඳහා පොලිස් නිලධාරීන් 6000 ක් සහ ත්‍රිවිධ හමුදා නිලධාරීන් 2000 ක් ආරක්ෂක අමාත්‍යංශයේ මැදිහත්වීමෙන් යෙදවීමට කටයුතු යොදා ඇති බව ද, ඔහු වැඩිදුරටත් පැවැසීය.
අනගිභවනීය වැදගත්කම් රැසකින් හෙබි දළදා වහන්සේ මූලික කරගනිමින් කෙරෙන ඇසළ පෙරහැර හෙවත් මහනුවර දළදා පෙරහැර වනාහි සියලු ලෝකවාසී බෞද්ධ ජනයා ඉතා උනන්දුවෙන් නරඹන අති උත්කෘෂ්ට බෞද්ධ මංගල්‍යයකි. භක්තිමත් ආගමික මංගල්‍යයක් මෙන්ම ලෝ වාසී වෙනත් ජනයාට මනස්කාන්ත සංස්කෘතික මංගල්‍යයකි. පුරාණ ප්‍රෞඩ රජ දරුවන්ගේ ඖදාර්යය මනාව පිළිබිඹු කෙරෙමින් අතීතයේ පැවැති සෞන්දර්යය මනාව පිළිබිඹු වන ආකාරයට සෑම වසරකම මහනුවරදී ඇසළ පෙරහැර පවත්වනු ලබයි.
ඈත අතීතයේ පටන්ම පැරණි ආගමික වතාවත් ජාතික සිරිත් විරිත්, ඇදුම් පැළඳුම්, ක්‍රීඩා කලා ආදී ජාතියේ විවිධ සංස්කෘතික දායාදයන් එක්තැන් කොට වර්ෂයක් පාසා පවත්වන ඇසළ පෙරහැර අද්විතීය වටිනාකමකින් යුත් සංස්කෘතික කලා මංගල්‍යයක් වේ. දින ගණනාවක් පුරා පැවැත්වෙන ඇසැළ පෙරහැරේ ඉතිහාසය දීර්ඝ කාලයක් තිස්සේ ගොඩනැගුණකි.
අගෝස්තු මස 5 වෙනි දා සිට 15 වෙනි දා තෙක් පෙරහර පැවැත්වෙන අතර, එදින දහවල් පෙරහැරෙන් 2019 වසරේ ඇසළ පෙරහර නිමාවට පත්කිරීමට නියමිතව තිබේ.
ලෝක මුස්ලිම් සම්මේලනයේ මහලේකම් සහ ජාත්‍යන්තර විද්වතුන්ගේ සංගමයේ සභාපති ආචාර්ය මොහොමඩ් බින් අබ්දුල්ලා කරීම් අල් ඉසා මහතා ඇතුළු දූත පිරිස සහ ශ්‍රී ලංකා අග්රාමාත්ය රනිල් වික්රමසිංහ මහතා අතර හමුවක් අද (31) දින අරලියගහ මන්දිරයේදී පැවැත්විණි.
ශ්‍රී ලංකාව තුල ආගමික සහජීවනය හා සංහිදියාව ඇති කිරීම පිළිබදව මෙම සාකච්ඡාවේදී වැඩි අවධානයක් යොමු කෙරිණි.
පසුගිය අප්‍රේල් 21 වෙනිදා බෝම්බ ප්‍රහාරය එල්ලවීමත් සමඟ ආරක්ෂක අංශ සමඟ සාකච්ඡා කරමින් ඊට සම්බන්ධ ත්‍රස්තවාදීන් නීතියේ රැහැනට හසුකර ගැනීමටත් රට සාමාන්‍ය තත්වයට පත්කිරීමටත් තමා ගත් පියවර පිළිබදව අග්රාමාත්ය රනිල් වික්රමසිංහ මහතා මෙහිදී මහලේකම් වරයාට දැනුවත් කළේය.
ජාතීන් අතර සහජීවනය ඇතිකිරීමට තමා කැපවන බව පෙන්වා දුන් ලෝක මුස්ලිම් සම්මේලනයේ මහ ලේකම් ආචාර්ය මොහොමඩ් බින් අබ්දුල්ලා කරීම් අල් ඉසා මහතා පසුගිය අප්‍රේල් 21 වෙනිදා මෙරට ස්ථාන කිහිපයක සිදුවූ බෝම්බ ප්‍රහාර සම්බන්ධව සිය කනගාටුව පළ කළ අතර, එම ප්‍රහාරය එල්ල වී ඉතා කෙටි කලක් තුල රට සාමාන්‍ය තත්වයට පත්කිරීමට හැකිවීම පිළිබඳව අග්රාමාත්ය රනිල් වික්රමසිංහ මහතා වෙත සිය ප්‍රසාදය පළ කරන ලදී.
මේ සංචාරයේදී තමනට මහා සංඝරත්නය සමග සාකච්ඡා ගණනාවක් පැවත්වීමට අවකාශ සැලසුණු බවත්, ලොවටම මෛත්‍රිය පතුරුවාලන ධර්මයක් ලෙස බුදු දහමෙහි හරයාත්මක වටිනාකම් ඒ සාකච්ඡාවන්හිදී යළි යළිත් තහවුරු වූ බවද මහලේකම්වරයා පෙන්වා දුන්නේය.
පාස්කු දින ත්‍රස්ත ප්‍රහාරයෙන් පීඩාවට පත්වූවන්ට සහන සැලසීම සඳහා වන අරමුදල උදෙසා අමෙරිකානු ඩොලර මිලියන 5 ක මුදලක් පරිත්‍යාග කරන බවද ඔහු පැවසීය.
ත්‍රස්ත ප්‍රහාරයට ලක්වූ ජනතාව සම්බන්ධව සොයා බලමින් ඔවුන්ට උදව් උපකාර කිරීම සඳහා ශ්‍රී ලංකාවට පැමිණීම පිළිබඳව ලෝක මුස්ලිම් සම්මේලනයේ මහලේකම්වරයාට වික්රමසිංහ මහතා සිය ස්තුතිය පළ කළේය.
මෙම අවස්ථාවට තැපැල් සේවා හා මුස්ලිම් ආගමික කටයුතු අමාත්‍ය එම්. එච්. ඒ. හලීම්, බස්නාහිර පළාත් ආණ්ඩුකාර ඒ. ජේ. එම්. මුසම්මීල් යන මහත්වරුන් ද එක් වූහ.
රාජ්‍ය බැංකු වඩාත් ශක්තිමත් කරනු මිස එය කිසිසේත් පෞද්ගලිකරණය නොකළ යුතු බව ජනාධිපතිතුමා අවධාරණය කරයි.
එය එදා මෙන්ම අද දවසේ ද තම දේශපාලන ප‍්‍රතිපත්තිය බව ජනාධිපතිතුමා සඳහන් කළේය.
ජනාධිපති මෛතී‍්‍රපාල සිරිසේන මැතිතුමා මේ බව සඳහන් කළේ ලංකා බැංකුවට වසර අසූවක් සපිරීම නිමිත්තෙන් (30) පස්වරුවේ කොළඹ බණ්ඩාරනායක ජාත්‍යන්තර සම්මන්ත්රණ ශාලාවේ පැවති උත්සවය අමතමිනි.
පුළුල් පරාසයක විහිදුණු සාඩම්බර ගමන් මඟක් ඔස්සේ ජනතාවට අද්විතීය මූල්‍ය සේවා පිරිනමමින් මෙරට ප‍්‍රමුඛතම මුල්‍ය සේවා සම්පාදකයා බවට පත්වෙමින් වාණිජ බැංකුකරණය, වෙළෙඳ මුල්‍යයනය, සංවර්ධන මුල්‍ය පහසුකම්, උකස් මූල්‍ය පහසුම් සහ වෙනත් මුල්‍යමය සේවා රැසක් ජනතාව වෙත සපයන ලංකා බැංකුව සිය අසූ වන සංවත්සරය “නව්‍යකරණයෙන් ඉදිරියට” යන තේමාව යටතේ සමරයි.
මෙම උත්සවය ඇමතූ ජනාධිපතිතුමා වැඩිදුරටත් සඳහන් කළේ ආයතනික වශයෙන් ඇති දූෂණ, අදක්ෂ කළමනාකරණ සහ වෘත්තීය සමිතිවල අන්තනෝමතික කි‍්‍රයාවන් හේතුවෙන් රජයට ආදායම් උපයා දෙන ආයතනවල මතු ව ඇති තත්ත්වය කිසිවෙකුට රහසක් නොවන බවයි.
එම ආයතනවලට අද දවසේ ශක්තියක් වී ඇත්තේ රාජ්‍ය බැංකු බවද පෙන්වා දුන් ජනාධිපතිතුමා මෙරට ජාතික ආර්ථිකය ශක්තිමත් කිරීම වෙනුවෙන් වසර අසූවක් පුරා ලංකා බැංකුව ඉටුකරන මෙහෙවර ද ඇගැයීමට ලක් කළේය.
ලංකා බැංකුවේ අසුවන සංවත්සරය වෙනුවෙන් සමරු මුද්දරයක් සහ මුල්දින කවරයක් එළිදැක්වීම ද සිදු කෙරිණි.
ජනාධිපතිතුමා වෙනුවෙන් ද සිහිවටන තිළිණයක් පිළිගැන්විණි.
අග්රාමාත්ය රනිල් වික්රමසිංහ, කථානායක කරූ ජයසුරිය යන මහත්වරුන් ඇතුළු ආරාධිත පිරිසක් ද, ලංකා බැංකුවේ සභාපති රොනඞ්ල් සී. පෙරේරා, ප්රධාන විධායක නිලධාරි සෙනරත් බණ්ඩාර යන මහත්වරුන් ඇතුළු කාර්ය මණ්ඩලය මෙම අවස්ථාවට එක්ව සිටියහ.
රැකියා විරහිත උපාධිධාරීන් වෙත අභ්‍යාසලාභී පුහුණු නිලධාරී පත්වීම් ලිපි ප්‍රදානය කිරීමේ උත්සවය අග්රාමාත්ය රනිල් වික්රමසිංහ මහතාගේ ප්රධානත්වයෙන් 2019.07.30 දින අරලියගහ මන්දිරයේදී පැවැත්විණි.
මෙම අවස්ථාවට රාජ්‍ය පරිපාලන, ආපදා කළමනාකරණ සහ පශු සම්පත් සංවර්ධන අමාත්‍ය රංජිත් මද්දුමබණ්ඩාර, අභ්‍යන්තර හා ස්වදේශ කටයුතු සහ පළාත් සභා හා පළාත් පාලන අමාත්‍ය වජිර අබේවර්ධන, අධ්‍යාපන අමාත්‍ය සහ එක්සත් ජාතික පක්ෂයේ මහලේකම් අකිල විරාජ් කාරියවසම්, ප්‍රවාහන හා සිවිල් ගුවන් සේවා අමාත්‍ය අර්ජුන රණතුංග, මුදල් රාජ්‍ය අමාත්‍ය ඉරාන් වික්‍රමරත්න, ජාතික ප්‍රතිපත්ති, ආර්ථික කටයුතු, නැවත පදිංචි කිරීම් හා පුනරුත්ථාපන, උතුරු පළාත් සංවර්ධන සහ යෞවන කටයුතු රාජ්‍ය අමාත්‍ය නිරෝෂන් පෙරේරා, අභ්‍යන්තර ස්වදේශ කටයුතු සහ පළාත් සභා හා පළාත් පාලන රාජ්‍ය අමාත්‍ය ජේ. සී. අලවතුවල, ජනමාධ්‍ය සහ ආරක්ෂක රාජ්‍ය අමාත්‍ය රුවන් විජයවර්ධන, පාර්ලිමේන්තු මන්ත්‍රීවරුන් වන ඒ.එච්.එම්. ෆවුසි, විජේපාල හෙට්ටිආරච්චි, විජිත් විජයමුණි සොයිසා, කාවින්ද ජයවර්ධන, මුජිබුර් රහුමාන්, එස්. අලී සාහීර් මවුලානා යන මහත්වරුන් ප්‍රමුඛ දේශපාලනඥයන් ඇතුළු රාජ්‍ය නිලධාරීන් සහ පත්වීම්ලාභීන් විශාල පිරිසක් සහභාගි වී සිටියහ.
